TALA Yesu ofongele ovava. Mu longa kena ndonga yayi yawonso vana mongo a Ngalili. Awana bafongele va ndambu andi alongoki andi. Wasola 12 mu kala se antumwa zandi. Antumwa zazi, alongoki amfunu a Yesu. Nga ozeye e nkumbu zau?

Vena ye Simone Petelo ye mpangi andi Andere. Yakobo yo Yoane wa mpangi andi. Vena mpe ye ntumwa wakaka wayikilwanga vo Yakobo, wakaka Simone. Antumwa zole bayikilwanga vo Yuda. Omosi i Yuda mwisi Kereote, wakaka Yuda wayikilwanga mpe vo Tadai. Vena mpe ye Filipo ye Natanaele (oyikilwanga mpe vo Batolomai), ye Matai yo Toma.

O Yesu vava kavutuka tuka kuna Samaria wayantika samuna nsangu zambote oku vo: ‘Kintinu ki’ezulu kifinamene.’ Nga ozeye e kintinu kiaki? I luyalu lwakieleka lwa Nzambi. Yesu i ntinu. Oyala tuka kun’ezulu yo twasa luvuvamu ova ntoto. Muna kintinu kia Nzambi, e nza yawonso ikituka se paradiso.

Ovava, Yesu mu longa kena o wantu oma ma kintinu. Wavova vo: “I nsamba yiyi nusamba: E S’eto koko’zulu, yambula nkumbu aku yazitiswa. E kintinu kiaku kiza. O luzolo luaku luavangam’ova nza nze koko’zulu.” Ndonga beyikilanga sambu kiaki vo ‘Sambu kia S’eto.’ Akaka vo ‘S’eto.’ Nga olenda vova sambu kiaki kiawonso?

O Yesu walonga mpe wantu e mpila balenda kadila muntu yo nkw’andi. Wavova vo: “Konso una nuzolele o wantu vo banuvanga, i nuvanga mpe kwa yau.” Nga kuzolanga ko vava akaka bekadilanga yaku mu mpil’ambote? Ozevo, o Yesu ovovanga vo tufwete vanga akaka oma mambote. Nga kedikala diambote ko muna paradiso vava konso muntu kevanga edi diambote?