TALA diambu diansisi divangamene ovava! O Yesu ovondelo. Okomeno muna nti. E nsonso zikotele muna moko ye mu malu. Ekuma bavangila ediadi kwa Yesu?

Ekuma kadi, akaka wantu ke bazolanga Yesu ko. Nga ozeye aki nani bamenganga? Mosi muna yau i Nkadi Ampemba wa Satana. Yandi wafila Adami yo Eva mu kolamena Yave. Yandi mpe wafila atantu a Yesu mu vanga diambu diadi diansisi.

Una kakomeno ko muna nti, atantu a Yesu bamvanga mambu mayingi mambi. Nga osungamene una bakotela muna mpatu ya Ngetesemane yo kumbaka e? Aki nani atantu awaya? Ambuta za nganga. Yambula twazaya mana malanda.

O Yesu oneto kwa ambuta za nganga, alongoki andi batinini. Basisidi Yesu yandi amosi ye atantu andi, kadi wonga ubabakidi. Kansi Petelo ye Yoane wa ntumwa ke batinina vala ko. Balende kuna vala mu zaya dina dibwila Yesu.

Anganga banete Yesu kwa Anasi, ona wateka kala se ngang’ambuta. Kansi, ke bazingila vo ko. Banete Yesu kuna nzo a Kayafa una vo i ngang’ambuta owau. Ndonga muna ambuta za nganga balungalakana muna nzo a Kayafa.

Bamfundisi. Bavavidi umbangi waluvunu muna Yesu. Bavovele vo: “Fwa kumfwene.” I bosi bamvumini mete vana luse, bambundidi nkome.

Vo i Petelo, ofongele vana mbazi, vana yanzala. Fuku wa kiozi wakala. Nkangu bakwididi tiya mu yotela. Ekolo bayotelanga, ntaudi ankento omwene Petelo umvovese vo: “Ongeye mpe wakala yo Yesu.”

Petelo ovutwidi vo: “Kinzeye kwame ko.”

Nkumbu ntatu bavovesa Petelo vo wakala yo Yesu. Kansi, wavananga nkalu vo kakala yandi ko. Vava Petelo kavana nkalu ntatu, o Yesu untadidi. O Petelo okendalele wau kavunini mpila yayi, ovaikidi kwandi, obokomokene ye dilu.

Okuma, ova kwakia, se Kietanu mu mene, anganga banete Yesu kun’eseka diau diampwena dia Mbanda-banda. Bamokenena mana bevanga kwa Yesu. Banete kwa Pontio Pilato wa nyadi a nsi a Yuda.

Bavovese Pilato vo: ‘Muntu ambi, fwa kumfwene.’ Vava kamene yuvula Yesu, Pilato ovovele vo: ‘Kimwene kuma ko muna muntu ndioyo.’ Pilato untumini kuna kwa Erodi Antipa. Erodi nyadi a Ngalili, kansi muna Yerusaleme kakala e lumbu yina. O Erodi kamwene mbi kavangidi ko o Yesu, umvutwidi kwa Pilato.

O Pilato ozolele yambula Yesu. Kansi, atantu a Yesu balombele vo kabayambulwila muntu akaka vana fulu kiandi. Muntu wasiwa muna pelezo, Baraba wa mwivi. Muna ola kumi ye zole, o Pilato ovaikisi Yesu kuna mbazi. Ovovese nkangu vo: ‘Tala, ntinu eno.’ Kansi, mbuta za nganga bakazidi oku vo: ‘Unkoma, unkoma muna nti.’ Ozevo, Pilato oyambwidi Baraba, oyau banete Yesu muna kumvonda.

Kina Kietanu muna masika o Yesu okomeno muna nti. Kana una vo ke basongelo ko mu fwaniswa kiaki, vena ye yimpumbulu yole bakomwa kumosi yo Yesu. Mosi kuna koko kwalunene, wakaka kuna lumonso. Una se kefwa o Yesu, kimpumbulu kimosi ovovese Yesu vo: “Ungindula vav’oluaka muna kintinu kiaku.” O Yesu umvovese vo: ‘Kieleka isamunwini o unu vo, okala yame muna Paradiso.’

Nga ke nsilu ambote ko wau? Ozeye paradiso kayika o Yesu? Akweyi yakala paradiso kavanga Nzambi kuna lubantiku? Vava ntoto. Vava Yesu keyala se ntinu kun’ezulu ofula muntu ndioyo, mu zingila mu Paradiso ampa ova ntoto. Nga ke diakiese ko mu zaya ediadi?