LUMBU kimosi Yesu wazayisa kwa muntu mosi vo kafwete zolanga akw’andi. O muntu ndioyo oyuvwidi Yesu vo: ‘Nani i nkw’ame?’ O Yesu wazaya makani mandi. Edi kabanzanga vo o nkw’aku i ndiona kaka nwina ekanda dimosi ye nsambila imosi. Ozevo, tuwa mana kamvovesa o Yesu.

Ezak’e ntangwa, o Yesu wavovanga yingana muna longa o wantu. I wau kevanga ovava. Oyikidi kingana kia Nyuda yo Nsamaria mosi. Twalongokele kala vo ndonga ya Ayuda ke bazolanga Asamaria ko. E kiaki i kingana kia Yesu:

Vakedi Nyuda mosi okulumukini tuka kuna Yerusaleme yakuna Yeriko. Olwakilu kwa mivi. Babongele nzimbu zandi, bamwende bansisidi wafw’e kiambu.

Ke kolo ko, nganga Ayuda okulumukìni muna nzila yayina. Omwene muntu ndioyo wa wandwa. Adieyi obenze kavanga? Osaukidi kuna diak’esambu dia nzila wele kwandi. I bosi, vezidi nkwikidi wakaka muna nzila yayina. Nlevi mpe. Nga waningama? Ve, kaningama ko muna sadisa muntu wa wandwa. Tala nganga yo Nlevi, basimbidi e nzila, bele kwau.

Kansi, nani una yo muntu wawandwa? Nsamaria kwandi. Mu sadisa kena o Nyuda ndioyo. Osidi nlongo muna mputa zandi. Unete vana fulu kalenda tambulwila lusadisu lwafwana.

Vava kamana vova kingana kiaki, o Yesu oyuvwidi kwa muntu wandia e kiuvu: ‘Awaya atatu, nani wakala nkw’andi a ndiona wa wandwa kwa mivi? Nganga, Nlevi yovo Nsamaria?’

O muntu ovutwidi vo: ‘Nsamaria, yandi wasonga e nkenda kwa muntu wa wandwa.’

O Yesu umvovese vo: “Wenda vanga diau adimosi.”

Nga kuyangalele ko e mpila kalongelanga o Yesu? Tulenda longoka mambu mayingi mamfunu avo tuwila mana Kevovanga Yesu muna Nkand’a Nzambi. Nga ke wau ko?