VAVA kamene wuka mpofo zole, o Yesu wele muna mpat’avata yafinama Yerusaleme. Otumini alongoki wole vo: ‘Nwenda muna mpat’avata eyi, nuwana ebuluku dikangamene, nukangula dio, nwantwasila dio.’

Vava bantwasidi ebuluku, o Yesu ovwende dio. Wele kuna Yerusaleme. Vava kafinama muna mbanza, ndong’ayingi yizidi kunkika. Bayalumwini mvwatu miau muna nzila. Akaka bazengele ndala, bayalumwini zo muna nzila yo vova vo: ‘E Nzambi sambula ntinu okwizila muna nkumbu a Yave.’

Kuna nz’ankulu, atinu ampa a Isaele bamantanga van’ebuluku yo kota muna Yerusaleme mu kuyisunzula kwa nkangu. I wau mpe kavanga o Yesu. O wantu bazolele vo Yesu kakala se ntinu au. Kansi, ke awonso ko banzola. Tuzeye wo muna dina diabwa vava kakota muna tempelo.

Muna tempelo, o Yesu wawuka ampofo ye avanguki. Vava yingyanangyana yamona mavangu mama bakembelele Yesu. Kansi, ediadi diafungisa anganga makasi, bavovese Yesu vo: ‘Ng’owidi owu bevovanga yingyanangyana e?’

O Yesu ubavovese vo: ‘Ingeta: nga ke nutangidi wo nkutu ko, ovo, muna nua mia nsedia i muvaika lusanisinu lwa Nzambi e?’ Ozevo, yingyanangyana yikwamanene sanisina ntinu wasolwa kwa Nzambi.

Tufwete kala nze yingyanangyana yayi, nga ke wau ko? Akaka nanga balenda kutusima mu samuna oma ma kintinu kia Nzambi. Kansi, tufwete kwamanana samuna kwa wantu o masivi kevanga Yesu mu kuma kia wantu.

Vava Yesu kakala ova nza ke yau ko i ntangwa mu yantika yala nze ntinu. Nkia ntangwa keyala? Alongoki a Yesu bazola yo zaya. Tulongoka dio mun’elongi dilanda.