YESU ofungidi kikilu makasi, nga ke wau ko? Nga ozeye ekuma kafungila makasi? Mu kuma kia wantu awaya muna tempelo a Nzambi muna Yerusaleme. Akw’eloko kikilu. Nzimbu zayingi bebakanga kwa wantu bekwizanga mu sambila Nzambi.

Nga omwene e ngombe, mameme ye mayembe mama mawonso? Mu tekwa mena muna tempelo. Nga ozeye ekuma? Mu kuma kia sia vo Aneyisaele bulu bavwanga o mfunu mu kelela Nzambi e kimenga.

O nsiku a Nzambi wavovanga vo, avo mwisi Isaele ovangidi edi diambi kafwete vana lukau kwa Nzambi, ye bavananga mpe tukau mu kuma yakaka. Kansi, akweyi Aneyisaele babakilanga e nuni ye bulu yakaka muna vana lukau kwa Nzambi?

Akaka bakala ye nuni ye bulu yakaka. Ozevo, bakelanga yo se yimenga. Kansi, ndonga ke bakala ye nuni ko ngatu bulu yakaka. Akaka ku vala bazingilanga ye Yerusaleme, ozevo ke balendanga nata e bulu yau kuna tempelo ko. Muna kuma kiaki, basumbanga e bulu bavwanga o mfunu muna tempelo. Kansi, ateki awaya ntalu zayingi batekanga lekwa yau. Nkangu bavunanga. Vana ntandu, ke bafwana tekela muna tempelo a Nzambi ko.

Ekiaki i kuma o Yesu kafungila makasi. Okindwidi meza ma wantu, oyitidi nzimbu zau. Ovangidi mpe nsuangi, ovaikisi e bulu yawonso muna tempelo. Ovovese ana batekanga mayembe vo: ‘Nukatula lekwa yayi mwamu; ke nukitula nzo Es’ame se fulu kia tekela lekwa ko.’

Alandi akaka a Yesu bayenda yandi entwadi muna tempelo muna Yerusaleme. Basivikidi mu mana kavanga o Yesu. Bayindwidi edi diasonama muna Nkand’a Nzambi mu kuma kia Mwan’a Nzambi vo: ‘Eketo dia nzo a Nzambi dimpempwele.’

O Yesu ekolo kakala muna Yerusaleme, kun’elambu dia Nduta wavanga masivi mayingi. I bosi, wavaika muna Yuda yo yantika nkangalu andi kuna Ngalili. Kansi, waviokela muna Samaria. Yambula twazaya dina diabwa ko.