VAVA kakangalanga muna nsi, o Yesu wawukanga mbevo. E nsangu zamwangana muna mavata mawonso ye mbanza. Nkangu wantwasilanga avanguki, mpofo, fwa matu ye mbevo zakaka. Yesu wabawukanga.

Mvu ntatu miviokele kala tuka Yesu kavubilwa kwa Yoane. O Yesu ovovese alongoki andi vo, okwenda kuna Yerusaleme, yo vondwa, i bosi kefuluka. Muna fikolo fiafi, o Yesu wawuka mbevo.

Lumbu kimosi o Yesu walonganga muna Lumbu kia Vundu. E lumbu kiaki Ayuda ke bavanganga konso salu ko. O nkento omwene vava mbevo kikilu. Wayelanga se mvu 18; wakovama beni, kalendi vumbuka nkutu ko. O Yesu Unyambikidi o moko, osingamene yo sasuka.

Ambuta za nganga bayisawidi. Mosi ovovele kwa ndonga vo: ‘Lumbu sambanu i ifwete salwanga: muna yau i nwiza wukwa, ke mu Lumbu kia Vundu ko.’

O Yesu ovutwidi vo: ‘Yeno nu akwa kuvunina, nga ke wau ko, konso muntu vovo nwina, vo muna lumbu kia vundu, okutulula ngombe andi, ovo ebuluku van’edilu diandi, kenda nu’e? Mwan’ankento ndioyu nkwa mayela se mvu 18 nga kafwete wukwa muna lumbu kia vundu ko e?’ E mvutu za Yesu zifusulwisi atantu andi e nsoni.

I bosi, Yesu ye alongoki andi bele kuna Yerusaleme. Una se bevaika muna Yeriko mpofo zole wau bawidi vo Yesu se kevioka, bakazidi, oku vo: ‘E Yesu utusadisa.’

O Yesu ubabokele, ubayuvwidi vo: ‘Aweyi nuzolele yanuvangila?’ Bamvovese vo: “E Mfumu, twatemokw’o meso.” O Yesu oviakene meso mau, vana vau bamwene. Nga ozeye ekuma Yesu kavangilanga masivi mama mawonso? Wantu kazolanga. Wazola vo bakwikila muna yandi. Oyeto mpe tulenda kala ye ziku vo, vava keyala se Ntinu ke vekala muntu ko ova ntoto oyela diaka.