NDIOYO i Yesu vana Mongo a Olive. Wantu yá kena yau i alongoki andi. Andere yo mpangi andi Petelo. Yakobo yo mpangi andi Yoane. Nga omwene tempelo a Nzambi muna Yerusaleme?

Lumbu yole yavioka tuka Yesu kakotela muna Yerusaleme wamanta vana ebuluku. Kina kia Nzole, muna mene-mene, o Yesu okotele muna tempelo. Anganga bavavidi kanga Yesu mu kumvonda. Kansi, bamwene nkangu o wonga kadi bazolanga Yesu.

“Nu nioka, nu wan’a mpidi,” u kayikila Yesu afidi awaya a nsambila. Wabavovesa vo o Nzambi okubatumba mu kuma kia mambi bevanganga. I bosi, Yesu wele kuna Mongo a Olive. Alongoki andi ayá bayantikidi kunyuvula yuvu. Nga ozeye mana beyuvulanga kwa Yesu?

Mambu mebwa kuna sentu beyuvulanga. Bazeye wo vo o Yesu osukisa mbi yawonso ova ntoto. Kansi, bazolele zaya nkia ntangwa mevangama omama. Nkia ntangwa kekwiza o Yesu mu yala se Ntinu.

O Yesu wazaya wo vo alandi andi ova ntoto ke bekumona ko vava kekwiza. Kadi kun’ezulu kekala, ikuma, ke balendi kumona ko. Ozevo, Yesu wazayisa alongoki andi mambu makaka mebwa ova ntoto vava keyala nze Ntinu kun’ezulu. Nkia mambu?

Yesu wavova vo vekala ye vita zampwena, nzala, mayela, nsoki ye nzakama za ntoto. Yesu wavova mpe vo e nsangu zambote za kintinu kia Nzambi zisamunwa muna nza yawonso. Nga tumonanga mambu mama mevangamanga muna lumbu yeto? Elo. Ozevo, tulenda kala ye ziku vo o Yesu oyalanga wau se ntinu kun’ezulu. Ke kolo ko osukisa mambi mawonso ova ntoto.