E DUMBELELE kiaki omwene vava kimbuta kia mvu 12 kena. O Yesu unsimbidi vana koko, o ngw’andi yo s’andi batelamene vana ndambu. Nga ozeye ekuma benena ye kiese kiayingi? Yambula twazaya.

O se dia dumbelele kiaki muntu ampwena kakala, wayikilwanga vo Yairo. Lumbu kimosi mwan’andi ankento oyelele, olekeso vana mfulu. Kansi, kasasukidi ko, e kimbevo kisakidi. Yairo yo nkaz’andi batokanene kikilu kadi mwan’au se kefwa. I mwan’au amosi kaka. Ikuma, o Yairo wele vava Yesu. Wazaya masivi kavanganga o Yesu.

Yairo omwene Yesu wazungwa kwa ndong’ayingi. Kansi, olendele kota vana kakala, ofukamene vana malu ma Yesu. Undodokele vo: ‘O mwan’ame oyelele kikilu, wenda kunsasula.’ O Yesu umvovese vo okwenda kunsasula.

Ekolo bayendanga, e ndonga imfinangese. Vana vau o Yesu oningamene yo yuvula: “Nani umpiakene?” Yesu omwene vo muntu umviakene kadi ngolo zimvaikidi. Nani wamviakana? I nkento wayelanga se mvu 12. Waviakana nswiku a mvwatu a Yesu yo wukwa.

Ediadi diafiaulwisa Yairo kadi wamona vo diambu diakete kwa Yesu muna wuka o muntu. Kansi valueke muntu otwese nsangu kwa Yairo vo: ‘O mwan’aku ofwidi; kutokanesa diaka Yesu ko.’ O Yesu owidi wo, ovovese Yairo vo: ‘Kumoni wonga ko: osasuka kwandi.’

Vava baluaka kuna nzo a Yairo, ndong’a wantu mu dila bena ye ntantu zayingi. O Yesu ovovele vo: ‘Ke nudidi ko; kadi mwana kafwidi ko, leka kaka kalele.’ Kansi, bansevele, wau bazeye wo vo mwana ofwidi.

O Yesu obongele se dia mwana ye ngudi andi ye alongoki andi tatu bakotele muna suku diakala o mwana. Osimbidi koko kwandi, yo vova: “Zangumuka kwaku.” O mwana ofulukidi nze una omwene vava. Otelamene, odiete. Ekiaki i kuma o s’andi yo ngw’andi bakadila ye kiese kiayingi.

Ke yandi ko i muntu antete kafula o Yesu muna lufwa. Muntu antete oyikwanga muna Nkand’a Nzambi i mwana a nkento ansona wazingilanga muna mbanz’a Naini. Yesu wafula mpe Lazaro wa mpangi a Maria yo Mareta. Vava Yesu keyala se ntinu a kintinu kia Nzambi wantu ayingi bafwa bevutuka o zinga. Nga ketufwete yangalala ko mu diadi?