NLEKE una vava yo Paulu i Tomoteo. Timoteo wazinganga y’esi nzo andi kuna Luseta. O ngw’andi nkumbu andi Yuniki, e nkak’andi ankento nkumbu andi Loi.

Owau i nkumbu etatu o Paulu kekingulanga Luseta. Mvu mosi wavioka tuka Paulu yo Banaba bayiza samunwina nsangu zambote kuna Luseta mu nkumbu antete, owau, Paulu ovutukidi ko ye Sila wa nkundi andi.

Nga ozeye nkia diambu kevovanga Paulu kwa Timoteo? Oyuvwidi Timoteo vo: ‘Ng’ozolele kangala yame yo Sila? Lusadisu lwaku tuvava muna samuna nsangu zambote ku fulu yakaka.’

Timoteo umvutwidi vo: ‘Elo, nkwenda yeno.’ Ke kolo ko, Timoteo osisidi esi nzo andi yo kwenda yo Paulu yo Sila. Kansi, una ke tulongokele ko oma ma nkangalu wau, yambula twateka zaya mana mabwila Paulu. Mvu 17 miavioka tuka Yesu kamonekena kwa Paulu muna nzil’a Dameseke.

Sungamena vo o Paulu wayenda kuna Dameseke mu kanga alongoki a Yesu. Oku kwalanda, yandi kibeni owau okitukidi se nlongoki a Yesu. Ke kolo ko, atantu bavavidi vonda Paulu kadi ke bazolanga malongi mandi ko, wau vo oma ma Yesu kalonganga. Kansi, alongoki batinisa Paulu. Bansidi muna mbangu, bankulumwinini muna yaka, kuna mbazi a mbanza.

I bosi, Paulu wele sila umbangi kuna Antiokia. Muna Antiokia alongoki a Yesu mu bateka yikilwa vo Akristu. Tuka kwakuna, o Paulu yo Banaba bafilwa benda samuna nsangu zambote muna nsi zakaka. Imosi muna mbanza bakingula i Luseta, mbanza kawutukila o Timoteo.

Owau, vioka mvu mosi, Paulu ovutukidi kuna Luseta, muna nkangalu andi wezole. O Timoteo vava kayenda yo Paulu ye Sila nga ozeye kuna bayenda? Tala muna mapa mu zaya eyaka fulu ina bayenda.

Entete bayenda kuna mbanza Ikonio, i bosi, kuna mbanza yakaka yayikilwanga vo Antiokia. I bosi bayenda kuna Troa, Filipi, Tesalonika ye kuna Beroya. Nga omwene Atenai muna mapa? Paulu wasamuna nsangu zambote muna mbanza yayi. I bosi, bayenda samuna nsangu zambote kuna Korinto, mvu mosi ye ndambu. Olandila bayenda kuna Efeso. I bosi, bavutuka kuna Kaisaria, yo kwenda kuna Antiokia, o Paulu osidi muna mbanza yayi.

Ozevo, o Timoteo wakangala mazunda ye mazunda ma kilometa mu sadisa Paulu muna salu kia samuna “nsangu zambote” yo ziula nkutakani zayingi za Akristu. Vava onungunuka e ntela nga okala selo kiakwikizi kia Nzambi nze Timoteo?