TALA diambu dibwidi vava. O nleke ndioyo olele vana ntoto nanga ofwidi. O muntu ovaikidi kuna mbazi, i Paulu. Nga omwene mpe Timoteo? O nleke obwidi tuka vana zianela.

O Paulu mu fila kena elongi kw’alongoki kuna Troa. Wazaya wo vo ke bevika monana diaka ko kadi e lumbu kilanda mwakaka kekwenda. Ozevo, olambwidi elongi diandi yaku dingidingi.

Etoko diadi nkumbu andi Yutoko wafonga vana zianela, owondokele yo tulu twayingi. Obwidi tuka kuna banga kietatu yavana ntoto. Ekiaki i kuma omwenene wantu vava batokanene kikilu. Vava bakulumuka mu kumbaka, ofwidinge kwandi.

Vava Paulu kamona vo etoko difwidi, umbwididi, umbimbakene, ovovese ampangi vo: ‘Ke nutokani ko, una kwandi o moyo.’ Nga una kikilu moyo? Elo, kadi Paulu wavanga esivi, wamvutula o moyo. O nkangu uyangalele kikilu.

Yau awonso batombokele diaka mun’esuku diantandu yo dia. O Paulu ubamokesene yavana kwakia. Kansi, o Yutoko kaleka diaka ko. I bosi, Paulu yo Timoteo y’ana bakangalanga entwadi bakotele muna nzaza. Ng’ozeye kuna bayenda?

O Paulu ofokwele nkangalu andi wa samuna nsangu zambote mu nkumbu wetatu. Wau ovutukidi kuna vata diandi. Paulu wanangina kuna Efeso mvu ntatu. Owau i nkangalu kaluta zingila ke mu una wezole ko.

Vava kasisa Troa wele kuna Miletu. Wau vo Efeso ke yakala vala ko ye Miletu, Paulu obokelese akuluntu a nkutakani ya esi Efeso beza kuna Miletu kimana kamokena yau e mbokena yansuka. Vava kiafwana e ntangwa kwa Paulu mu kubasisa, ampangi bamwene ntantu.

Kuna mfoko, Paulu obongele nzaza yakuna Kaisaria. Onangini muna nzo ya Filipo. O Angabo wa ngunza ozaisi Paulu vo mu pelezo kesiwa kele vo wele kuna Yerusaleme. I wau mpe wavangama. Paulu okedi mvu miole muna pelezo kuna Kaisaria. I bosi, wafilwa kuna Roma, kafundiswa kwa Kaisa wa nyandi a Roma. Yambula twazaya edi diambwila vava kayenda kuna Roma.