WANTU awaya omwene vava alongoki a Yesu. Nkanikinu andi balemvokela wa vingila muna Yerusaleme. Ekolo bavingilanga, ezu diangolo, dizele nzo yawonso, ina bavwende. Dikedi nze mpekomok’a tembwa kiangolo. I bosi, vamonekene tubini tuna nze tiya vana ntu a konso nlongoki. Nga omwene o tiya toto vana ntu miau? Nki i nsasa diambu diadi?

Ediadi vangu diasivi. O Yesu wavutuka kun’ezulu kw’eS’andi. Yandi opongwele mwand’avelela a Nzambi kw’alongoki andi. Nga ozeye una wabasadisila? Yau awonso babantikidi o vovela muna ndinga zakaka.

Ndonga muna Yerusaleme bawa ezu diadi nze mpekomok’a tembwa kiangolo, bezidi, bazaya dina diabwa. Akaka muna yau, esi zula yakaka bayiza muna Yerusaleme mu kembelela nkinzi wa Aneyisaele muna lumbu kia Pentikosti. Nkia diambu diasivi bamona anzenza zazi? Alongoki babavovesela konso muntu muna yandi ndinga o mavangu masivi kavangidi o Nzambi.

Basivikidi, bavovele vo: ‘Wantu awaya nga ke Mingalili ko e? Aweyi bevovesela konso muntu muna yandi ndinga ina kawutukila?’

O Petelo, otelamene, oyantikidi kubasasila mambu mama. Ovovese kwa nkangu una Yesu kafwila, ye una Yave kamfudila muna mafwa. ‘Owau Yesu una kun’ezulu kuna koko kwalunene kwa Nzambi. ‘Yandi obungwidi mwand’avelela wau. Ekiaki i kuma numwenene yo wila masivi mama.’

Vava Petelo kavovele mawonso mama, ndonga bamwene e nkenda mu mana mavangwa kwa Yesu. Bayuvwidi vo: ‘Aweyi tufwete vanga?’ O Petelo ubavutwidi vo: ‘Nuvilukw’e ntima, yo vubwa.’ Muna lumbu kiakina tezo kia 3.000 ma wantu bavubwa yo kituka s’alandi a Yesu.