VAVA Petelo yo Yoane bavutuka, Maria wasala yandi mosi. Watelama kaka vana mbazi a nkala, yo dilanga. I bosi, kavetama yo tala muna nkala, nze una tumwene muna fwaniswa kiviokele. Omwene mbasi zole banyuvwidi: ‘Ekuma odidilanga?’

Maria ovutwidi vo: ‘E kuma kadi, bakatwidi Mfumu ame, kizeye kwame ko kuna bansidi.’ Vava kavovele wo, ovilukidi, omwene muntu, unyuvwidi vo: ‘Nani ovavanga?’

Maria edi kabenze vo muntu ndioyo mvati, nanga yandi okatwidi evimbu dia Yesu. Umvovese vo: “Ovo kwakaka unete, unsamunwina ko kuna unsidi, yankatula.” Kansi, muntu ndioyo i Yesu kibeni. Wavwata nitu ina kalenda sungamena ko o Maria. Kansi, vava kambokela muna nkumbu andi, Maria obakwidi vo muntu ndioyo i Yesu. Olundumukini, wele samunwina alongoki vo: “Mbwene o Mfumu.”

Oku masika, muna lumbu kiakina, alongoki wole bayendanga kun’evata dia Emau muntu mosi ubafinamene, wele yau. Alongoki bakendalala kikilu mu kuma kia mfw’a Yesu. Kansi, wau bamokenanga o muntu ndioyo ubafiaulwisi, ubavovese mambu mayingi ma Nkand’a Nzambi. Vava bavunda mu dia, alongoki babakwidi vo muntu ndioyo i Yesu, ovempokele. Alongoki awaya bavutukidi kuna Yerusaleme bele samunwina kw’antumwa mana bamona.

Ekolo bayendanga, o Yesu wamoneka mpe kwa Petelo. Akaka basivikidi vava bawa mambu mama. Vava alongoki wole awaya balwaka kuna Yerusaleme muna mwakala antumwa, babavovese una Yesu kabamonekena mpe muna nzila. Una bavovelenge mambu mama, nga ozeye diambu diabwa?

Tala muna fwaniswa kiaki. O Yesu omonekene vana vena alongoki kana una vo bakala mun’esuku ye kielo kiazikama. Alongoki bayangalele kikilu. Nga ke lumbu kiakiese ko ekiaki? Nga olenda tanga nkumbu nkwa kamonekene kala o Yesu kw’alongoki andi? Nkumbu ntanu.

O Toma wa ntumwa kakala vo ko vava kabamonekena o Yesu. Ozevo, alongoki bamvovese vo: “Tumwene o Mfumu.” Kansi, Toma ovutwidi vo, ‘ovo kimwene mu meso mame ko kikwikila ko.’ Lumbu nana yavioka, alongoki andi bakedi diaka mun’esuku ye kielo kiazikama, o Toma mpe wakala yau. O Yesu omonekene mun’esuku bakala. Owau o Toma okwikidi.