NGA ozeye nkento ndioyo ye wantu wole awaya? O nkento i Maria Mandala wa nkundi a Yesu. Wantu awaya bavwete mvwatu miampembe, i mbasi. E fisuku fiafi ketalanga Maria, i fulu kiasiwa evimbu dia Yesu vava kafwa. Kiyikilwanga vo nkala. Kansi evimbu dia Yesu ke dina mo ko. Nani okatwidi dio? Yambula twawa.

Vava Yesu kafwa, ambuta za nganga bayenda kwa Pilato oku vo: ‘Vava kakala moyo o Yesu, wavovanga vo ofuluka muna lumbu kietatu. Dianu vo, sia ayingidi vana nkala. Alongoki andi benkwa kwiza yiya evimbu diandi yo vovesa nkangu vo, ofulukidi muna mafwa.’ O Pilato ubavovese vo, basia ayingidi vana nkala.

Kansi, muna lumbu kietatu kina kafuluka o Yesu, vana vau mbasi a Yave wizidi mu mene-mene onengomwene etadi muna nkala. Ayingidi bamwene kikilu wonga, bafwidi kiambu. I bosi, vava batala muna nkala, evimbu divididi. Ayingidi akaka bele kuna mbanza mu samunwina kw’ambuta za nganga mawonso mabwa. Nga ozeye una bavanga afidi awaya? Bavana nzimbu zayingi kwa makesa kimana bavova luvunu, babavovese: ‘Nuvova vo, alongoki andi bezidi o fuku bayiyidi evimbu diandi ekolo tulele.’

E ntangwa ina, akento ana bakala akundi a Yesu bezidi tal’o nkala. Basivikidi kikilu kadi evimbu ke dina mo ko. Vana vau vezidi mbasi zole mu mvwatu miampembe babayuvwidi vo: ‘Ekuma nuvavilanga Yesu ovava? Ofulukidi kwandi. Nwenda-nwenda nwasamunwina alongiki andi.’ Balundumukini, bele samun’e nsangu kw’alongoki andi. Kansi, muna nzila muntu mosi ubaningamese. Nga ozeye kana nani? I Yesu. Ubavovese vo: ‘Nwenda samunwina alongoki ame.’

Vava akento bavovesa alongoki vo o Yesu un’o moyo, ye mpe vo bamwene, alongoki babavunisi. Petelo yo Yoane bel’e ntinu kuna nkala, kansi e nkala usidi e nkatu. Vava Petelo yo Yoane bayenda kwau, Maria Mandala otelamene kaka vana mbazi a nkala. Vava katala muna nkala omwene mbasi zole.

Nga ozeye dina diabwila evimbu dia Yesu? Nzambi wavidisa dio. Kafula Yesu ye nitu akimuntu ina kafwila ko. Wavana Yesu nitu ampa ya mwanda, nze nitu ambasi kun’ezulu. Kansi, muna songa kwa wantu vo un’o moyo, o Yesu wavwatanga nitu akimuntu eyi ilenda moneka kwa wantu nze una tusinga mona.