ADIEYI omwene ovava? Elo, makesa vana mvalu miampembe. Akweyi betuka? Kun’ezulu, muna matuti bediatilanga. Nga kuna kieleka ye mvalu kun’ezulu?

Ve. E mvalu ke milendi diatila muna matuti ko. Kansi, Nkand’a Nzambi uyikanga vo kuna ye mvalu kun’ezulu. Nga ozeye ekuma?

E kuma kadi, kuna nz’ankulu wantu mvalu basadilanga muna nwana e vita. Ozevo, Nkand’a Nzambi usonganga vo wantu bamente mu mvalu yo kulumuka tuka kun’ezulu mu songa vo Nzambi onwana vita yo wantu ova ntoto. Nga ozeye nkumbu a vita yayi? Armangedo. E vita yayi isukisa e mbi yawonso ova ntoto.

Yesu okala se ntu muna vita ya Armangedo. Sungamena vo Yesu wasolwa kwa Nzambi mu yala se ntinu muna luyalu lwandi. Ekiaki i kuma o Yesu kavwatidi kolowa a kintinu. E nsosolo vana koko kwandi, usonganga vo ofwasa atantu a Nzambi awonso. Nga difwene kutusivikisa vo Nzambi ofwasa yimpumbulu yawonso?

Tala muna Lusansu lwa 10. Adieyi omwene? Elo, Kizalu kiampwena kiafwasa wantu ambi. Nani watwasa Kizalu kiaki? Yave wa Nzambi. Owau, tala Lusansu lwa 15. Nkia diambu disongwanga mo? Sodomo ye Ngomora ifwasilu muna tiya katwika o Nzambi.

Ziula Lusansu lwa 33. Tala dina diabwila mvalu ye akwa mvalu mia Angipito. Nani wabadimunwisa muna maza? Yave. Wavanga wo muna tanina nkangu andi. Tala Lusansu lwa 76. O Yave wayambula nkangu andi, Aneyisaele bavondwa mu kuma kia bi wau.

Ozevo, ka tufwete sivika ko vo o Yave ofila makesa mandi m’ezulu mu sukisa mbi yawonso ova ntoto. Aweyi disongele ediadi? Tala lukaya lulende.