NGA ozeye nki ketanganga kingyana-ngyana kiaki ye akundi andi? Elo, i nkanda wau otanganga ongeye: Tusansu twa Nkand’a Nzambi. Lusansu lwalu otanganga i lwau mpe betanganga: “Aweyi Olenda Zingila Yakwele Mvu.”

Nga ozeye adieyi belongokanga? Diantete, avo tuzolele zinga yakwele mvu tufwete longoka oma ma Yave ye Mwan’andi Yesu. Nkand’a Nzambi uvovanga vo: ‘I wau wuwu olenda zingila yakwele mvu. Zaya Nzambi aludi ye Mwan’andi Yesu Kristu ona katuma.’

Aweyi tulenda zayila oma ma Yave wa Nzambi ye Mwan’andi Yesu Kristu? Muna tanganga Nkanda wa Tusansu twa Nkand’a Nzambi tuka lubantiku yakuna mfoko. Mayingi uyikanga mu kuma kia Yave yo Yesu Kristu, nga ke wau ko? Uyikanga mpe mambu mayingi bavanga ye mana besinga vanga. Kansi, tufwete vanga mpe mayingi ke tanga kaka nkanda wau ko.

Nga omwene nkanda wakaka una vana ndambu? I Nkand’a Nzambi. Lomba kwa muntu katangila tini ya Nkand’a Nzambi muna mubongelo tusansu twa nkanda wau. Nkand’a Nzambi ukutuzayisanga mawonso tuvwidi o mfunu muna sadila Yave una ufwene mu baka moyo a mvu ya mvu. Ozevo, yambula kiakala se fu kieto kia tanganga Nkand’a Nzambi e lumbu yawonso.

Kansi, ozaya kaka oma ma Yave ye Yesu Kristu ke diafwana ko. O muntu olenda kwandi zaya mayingi mu kuma kiau ye malongi mau yo lembi vwa moyo a mvu ya mvu. Nga ozeye adieyi diaka ofwete vanga?

Tufwete zingilaga e ngwizani yo mana tulongokanga. Nga osungamene Yuda mwisi Kereote? Wakala mosi muna alongoki 12 kasola o Yesu mu kala antumwa zandi. Yuda wakala yo zayi wayingi mu kuma kia Yave yo Yesu. Kansi, adieyi diambwila? Wakituka se nkw’eloko, yo teka Yesu kw’atantu muna palatala 30. O Yuda kevwa moyo a mvu ya mvu ko.

Nga sungamene Ngekazi muna lusansu lwa 69? Wazola tambula nzimbu ye mvwatu miangani. Muna kuma kiaki, wavuna mu vwa mio. Kansi, Yave wantumba. Okututumba mpe avo ke tulemvokele nsiku miandi ko.

Kansi, vena mpe ye wantu ayingi ambote awana basadila Yave ye kwikizi kiawonso. Tuzolele kala nze yau, nga ke wau ko? Nleke Samuele, wasonga mbandu ambote tufwete tanginina. Nze una tumwene muna Lusansu lwa 55, wakala ye kimbuta kia mvu nyá yovo tanu vava kayantika sadila Yave muna saba kiandi. Ozevo, ongeye mpe olenda kwaku sadila Yave.

Kieleka, Yesu Kristu i muntu tuzolele tanginina yeto awonso. Kana vava kakala kindende, wayangalelanga kala muna tempelo yo mokena y’akaka mu kuma kia S’andi ezulu, nze una usonganga Lusansu lwa 87. Mbula twatanginina mbandu andi. Tufwete zayisa mpe kwa ndonga ya wantu oma ma Yave wa Nzambi eto ambote yo Mwan’andi Yesu Kristu. Avo tuvanga wo ozevo tuzingila yakwele mvu muna paradiso ampa ova ntoto.