WANTU awonso belwakilwanga kwa ntelekw’a moyo, kana nkutu nkangu a Nzambi. Ntozi a nkunga wasoneka vo, “muna ulolo wa ngindu zame za mbundu.” (Nkunga 94:19) Yesu wavova vo omu lumbu yambaninu e ntokani za zingu zilenda kituka se nkaku wampwena muna sadila Yave. (Luka 21:34) Adieyi tuvova mu kuma kiaku? Nga ntokani zayingi okalanga zau mu kuma kia mpasi za nzimbu, za esi nzo yovo kondwa kwa vimpi? Aweyi Yave kalenda kusadisila mu zizidila ntokani zazi?

Ka tulendi zizidila ntokani muna nkuma wa yeto kibeni ko. Paulu wa ntumwa wasoneka vo: “Tuniemenenwa muna ndambu zawonso.” “Tuyangamw’e mioyo . . . ; tubangikwa.” Kansi wavova mpe vo “yeto ke tukosakana,” “yeto ke tudimbula vuvu,” “yeto ke tuyambulwa kwa Nzambi” ye “yeto ke tufwaswa.” Nki kikutusadisanga mu zizidila? “Ulolo wa nkuma” owu utukanga kwa Yave wa Nzambi eto a mpungu-ngolo.—2 Korinto 4:7-9.

Sungamena una watambulwilanga “ulolo wa nkuma” muna lumbu yavioka. Nga osungamene una longi dimosi dia lukasakeso diawokesela luyangalalu lwaku muna zola kwa Yave? Nga lukwikilu lwaku muna nsilu mia Yave ke lwakumama ko vava wasamunanga e vuvu kia Paradiso kwa akaka? Vava tulungananga muna tukutakanu yo samuna mana tukwikilanga kwa akaka, tukumikwanga mu zizidila e ntokani za zingu, tukalanga ye luvuvamu lwa ntima, muna mpila yayi tulenda sadila Yave ye kiese kiawonso.

Dialudi vo olenda kala ye ngindu za landa nzila zayingi mu nkumbu mosi. Kasikil’owu, Yave okutulombanga twavavanga ntete e Kintinu yo kuyivana muna salu ya mwanda. (Matai 6:33; Luka 13:24) Kansi, adieyi tuvova avo lubangamu, mayela yovo mpasi za esi nzo zikuyoyesanga muna nitu? Adieyi tuvova avo e salu kiaku kikudiang’e ntangwa ye ngolo olenda sadila muna salu ya nkutakani? O bwilwa mambu mayingi mampasi yo lembi kala ye ntangwa yafwana ye ngolo mu singika mo, dilenda kuyoyesa yo kukendeleka. Nanga otokananga yo yindula vo Yave mayingi kevingilanga kwa ngeye.

Yave obakulanga e ntokani zeto. Kalendi kutulomba mana katulendi vanga ko. Ozeye wo mpe vo ntangwa divavanga muna vutulwisa e ngolo muna nitu yo sunda e ntokani zeto.—Nkunga 103:13, 14.

Badika una Yave kasadisila Eleya wa ngunza. Vava Eleya kakendalala yo mona wonga yo tina muna makanga, nga Yave wantumba yo kumvovesa vo kavutukila e kiyekwa kiandi? Ve. Yave nkumbu miole katuma mbasi mu kasakesa  Eleya yo kumvana madia. Kana una vo i wau, vioka lumbu 40 Eleya wakendalala diaka yo mona wonga. Adieyi diaka kavanga o Yave muna kunsadisa? Diantete, Yave wansonga vo okuntanina. Diazole, Yave wakasakesa Eleya muna ‘ndinga yakuluka yo lembama.’ Kuna mfoko, Yave wansonga vo vakala ye mazunda ma selo yakaka yakwikizi basambilanga Nzambi. Vana vau Eleya wavutukila diaka e salu kiandi kia kingunza yo vema kwawonso. (1 Ntinu 19:1-19) Adieyi tulenda longoka muna nona kiaki? Vava Eleya kakendalala, Yave wakadila yandi kuna luzindalalu yo walakazi. Yave kasoba ko. Okutuvwanga o mfunu nze una kavanga kwa Eleya.

Vava oyindulanga kina olenda vana kwa Yave, kala ye nyindu asikila. Kutezanisa ko mana olenda vanga o unu ye mana wavanganga muna lumbu yavioka. Muna bong’e nona, o muntu olundumukanga avo oyambwidi nana e nitu mu ngonde zayingi yovo mvu, kalendi vutukila lundumuka ko vana vau nze una kalundumukinanga. Kansi, kafwete yantika malembe malembe yavana nitu andi ikulukilwa diaka mu toma lundumuka. Akristu bena nze alundumuki. Bekubamanga ye kani diasikila. (1 Korinto 9:24-27) Ekuma olembi sikidisila ekani dia mwanda dina olenda lungisa owau? Kasikil’owu, olenda sikidisa ekani dia yantika kwenda muna tukutakanu. Lomba kwa Yave kasadisa mu lungisa ekani diaku. Ekolo ovutulwisa kimwanda kiaku, ‘omika yo mona vo Yave wambote kikilu.’ (Nkunga 34:8) Sungamena dio vo konso diambu ovanga mu songa o zola kwaku muna Yave, kana nkutu diakete, ditoma kunyangidika.—Luka 21:1-4.

Aweyi Yave kakasakesela June mu vutuka kwa yandi? Wavova vo: “Yakwamanana samba kwa Yave yo kunlomba kansadisa. I bosi, o nkaz’a mwan’ame ayakala wanzayisa lukutakanu lwa lumbu yole lwakubikwanga mu zunga kieto. Yabaka e nzengo za kwenda lumbu kimosi. Ekwe kiese yamona wau yavutuka kala diaka vamosi yo nkangu a Yave! O lukutakanu lwaluna, i lukasakeso yavwanga o mfunu. Owau, isadilanga diaka Yave ye kiese kiawonso. E zingu kiame kiavutuka kala ye nsasa. Edi disundidi o mfunu, i zaya vo ke diambote ko mu kuyivambula ye mpangi zame za mwanda ngatu fila zingu kiame mono kibeni. Ivutulanga matondo wau vo yakikadila ye ntangwa yavutuka.”