KUNKA KIA 3
Lukendalalu—Avo ‘Diambu Tubakanene yo Muntu’
“Mpangi mosi ankento muna nkutakani ame wayindula vo nzimbu zandi yayiya. Akaka muna nkutakani vava bawá e nsangu zazi bayisia kuna sambu diandi. Kuna kwalanda, mpangi ankento wampovesa vo nsangu kawa zasonga vo dina kayindulanga mu kuma kiame dialuvunu. Kana una vo wandomba e ndoloki, yavova muna nsi a ntima vo kilendi kunloloka ko muna dina kampanga.”—Linda.
NGA wabwilwa kala dina diabwila Linda ona wakendelekwa kwa nkwandi a nkwikidi? Diankenda kikilu vo akaka bakendalala mu kuma kia fu ya akaka, bayambula vo lukendalalu lwafwasa kimwanda kiau. Nga diabwila kala ediadi?
Nga Muntu ‘Olenda Kutuvambula Muna Zola kwa Nzambi’?
Kieleka, dilenda kala diampasi mu loloka nkweto a nkwikidi ona utuvangidi e mbi. Vana ntandu, Akristu bafwete zolaziananga. (Yoane 13:34, 35) Avo nkweto Nkristu mbi katuvangidi, tulenda kendalala yo mona e mpasi.—Nkunga 55:12.
O Nkand’a Nzambi utoma songanga vo vekalanga ye ntangwa ina Akristu ‘balenda bakana e diambu.’ (Kolosai 3:13) Kana una vo i wau, vava tubwilwanga e diambu diadi, dilanda kala diampasi mu zizidila dio. Nga vena ye diambu dilenda kutusadisa? Badika nkanikinu tatu mia Nkand’a Nzambi:
Se Dieto dia Zulu Ozeye Mawonso. Yave omonanga mawonso mevangamanga, kumosi yo vilwa bekutuvanganga ye mpasi ukututwasilanga. (Ayibere 4:13) Vana ntandu, vava tumweswanga e mpasi, Yave mpe omonanga e mpasi. (Yesaya 63:9) Kalendi yambula ko vo ‘mpasi ngatu lukendalalu’ yovo konso diambu kana nkutu selo kiandi kiakaka ‘kiatuvambula muna zola kwa Nzambi.’ (Roma 8:35, 38, 39) Nga ke diau adimosi ko tufwete vanga? Katufwete yambula konso diambu ko ngatu muntu katuvambula yo Yave.
O loloka ke yambulwila ko. Vava tulolokanga awana bekutuvanganga e mbi ke disongele ko vo vilwa wau tuvezanga ngatu yambulwila mavangu mau. Sungamena dio vo Yave ketondanga sumu ko kansi ololokanga masumu vava kekalanga ye kuma kiasikila mu vanga wo. (Nkunga 103:12, 13; Kabakuke 1:13) Vava kekutukasakesanga vo twalolokanga akaka, Yave okutulombanga vo twantanginina. Yave ke ‘funganga makasi ko yakwele mvu.’—Nkunga 103:9; Matai 6:14.
Avo tuyambwidi lunda makasi, yeto kibeni tubaka nluta. Mu nkia mpila? Badika e nona eki: Yindula vo ozangwidi e tadi, nanga ke dina ye zitu diayingi ko. Kansi ozangwidi dio yavana vesukila moko maku. Avo ozangwidi dio mu fikolo, nanga kumona mpasi zayingi ko. Kansi adieyi tuvova avo ozangwidi dio mu kolo kiayingi? Kolo kwa olenda zizidila e zitu? Miniti miakete? Ola mosi? Yovo vioka? Kalukatikisu ko vo moko maku mesuka! Dialudi vo e zitu dia tadi ke disoba ko. Kansi avo ozangwidi dio mu kolo kiayingi, e zitu diyantika wokela. Diau adimosi mpe divangama avo tukala ye fu kia lunda makasi. O lunda makasi mu kolo kiandá kana nkutu mu mambu makete, dilenda kututwasila mfwilu miayingi. Ekiaki i kuma Yave kekutukasakeselanga vo twayambula e fu kia lunda makasi. Vava tuvanganga wo yeto kibeni tubakanga nluta.—Ngana 11:17.
Vava tuyambulanga lunda makasi yeto kibeni tubakanga nluta
“Yamona nze Yandi Kibeni Yave Wamokenanga Yame”
Nki kiasadisa Linda mu lembi lunda makasi mu kuma kia dina mpangi kamvanga? Vena ye mambu mayingi mansadisa, Linda wabadika dina Nkand’a Nzambi uvovanga mu kuma kia loloka. (Nkunga 130:3, 4) O zaya vo loloka akaka difilanga Yave mu kutuloloka mpe, diafila Linda mu loloka mpangi andi. (Efeso 4:32–5:2) Muna yika una kamona, Linda wavova vo: “Yamona nze yandi kibeni Yave wamokenanga yame.”
Kuna kwalanda, Linda wayambula lunda makasi. Kuna mvevo wawonso, waloloka mpangi andi, owau mpangi ndiona nkundi andi. Linda wawokesa e salu kiandi kwa Yave. Kala ye ziku vo Yave mpe ozolele kusadisa wavanga diau dimosi.
Nanga Oyangalela Mpe Malongi Mama
EYINGIDILU (DIA LONGOKA)
Nuyambuziananga
EYINGIDILU (DIA LONGOKA)
