KUNKA KIA 5

Nuvutuka kwa ‘Mvungudi yo Nkengi a Mioyo Mieno’

WINIKINA MU

Nga onwananga ye diambu dimosi yovo mayingi muna mambu mayikilu mu finkanda fiafi? Avo i wau, kuna ngeye mosi ko. Selo yayingi ya kwikizi ya Nzambi kuna nz’ankulu ye ya lumbu yeto, benwananga mpe ye mpasi zau zimosi. Nze una basadisilwa kwa Yave mu sunda e mpasi zazi, ongeye mpe olenda zo sunda.

Yave okala yaku avo ovutukidi kwa yandi

KALA ye ziku vo Yave okala yaku avo ovutukidi kwa yandi. Okusadisa mu zizidila e ntelekw’a moyo yo lukendalalu, okala ye luvuvamu lwa ntima lutukanga muna kala ye ntona zavelela. I bosi, olenda diaka vutukila sadila Yave kumosi ye mpangi zaku. E mpasi onwananga zau zafwanana ye zina banwananga zau Akristu akaka muna tandu kiantete ana Petelo wa ntumwa kasonekena vo: “Kadi nwatungianini nga mameme; kansi owau, nuvutukidi kwa mvungudi wa nkengi a mioyo mieno.”—1 Petelo 2:25.

O vutuka kwa Yave i diambu disundidi o mfunu ofwete vanga. Ekuma? Kadi oyangidika ntim’a Yave. (Ngana 27:11) Nze una ozeye, Yave nkenda ye ntantu kemonanga, o mavangu meto diambu mevanganga kwa yandi. Kieleka, Yave ke kutukomekenanga ko vo twansadila ngatu kunzola. (Nsiku 30:19, 20) Nkwa ngangu mosi ofimpanga oma ma Nkand’a Nzambi wavova vo: “Divavanga vo muntu yandi kibeni kaziula o ntim’andi.” Muna sambila Yave yo zola kwa nsi a ntima, tulenda ziula o ntim’eto. Vava tuvanganga wo, tukumvananga lukau lwantalu, i sia vo kwikizi kieto eki kiyangidika ntim’andi. Kieleka ke vena lekwa ko tulenda tezanesa ye kiese tuvwanga muna vana kwa Yave e nsambila yimfwanukini.—Mavangu 20:35; Lusengomono 4:11.

Vana ntandu, vava ovutukila e salu yaku ya mwanda, e nsatu zaku za mwanda zilungiswa. (Matai 5:3) Mu nkia mpila? Wantu mu nza yawonso bekiyuvulanga, ‘Ekuma twinina ova nza?’ Bekalanga ye tima dia zaya e mvutu za yuvu mu kuma kia zingu. Kadi Yave wabavanga ye tima diadi. Yave ozolele vo twakala ye kiese muna kunsadila. Ke vena ye kiese kisundidi kiaki ko kia zaya vo tusambilanga Yave kuna zola kwawonso.—Nkunga 63:1-5.

Zaya wo vo Yave ozolele vo wavutuka kwa yandi. Aweyi olenda kadila ye ziku kiaki? Badika edi: Twasamba kwayingi muna toma kubika finkanda fiafi. Nanga watambwidi fio kwa akuluntu yovo kwa Nkristu wakaka. I bosi, watangidi fio yo yangalela mana mena mo. Mawonso mama mesonganga vo Yave kavilakana ko. Kansi, kuna zola kwawonso ozolele vo wavutuka kwa yandi.—Yoane 6:44.

Tulenda fiaulwiswa mu zaya vo Yave kalendi vilakana selo yandi ko ana bavila. I diau kamona mpangi mosi a nkento una ye nkumbu a Donna. Wavova vo: “Malembe-malembe yayambula e ludi, kansi nkumbu miayingi yayindulanga e sono kia Nkunga 139:23, 24 kivovanga vo: “Unsata, e Nzambi, wazaya ntim’ame: Untonta wazaya ngindu zame: Tala kana nzila mpasi in’omu mono, yo kumfila muna nzil’a mvu ya mvu.” Yazaya wo vo kimwisi nza ko, kiakulukilwa zingu kia nza ko, kansi e fulu kiame muna nkubik’a Yave kiakala. Yayantika bakula vo Yave kangiambula ko; edi kaka yavavanga vo yavutuka kwa yandi. Ngina ye kiese kiayingi mu zaya vo i diau yavanga!”

“Yayantika bakula vo Yave kangiambula ko; edi kaka yavavanga vo yavutuka kwa yandi”

Tusambanga ye ziku kiawonso vo ngeye mpe wavutukila diaka “e kiese kia Yave.” (Nekemiya 8:10) Avo ovutukidi kwa Yave, kusinga kuyibanza nkutu ko.

Mvutu za Yuvu mu Kuma kia Muntu Ozolele Vutuka kwa Yave

AVEYI IYANTIKILA?

O muntu obakamene kimbevo, malembe-malembe keyelokanga. Diau dimosi mpe, olenda kumika kimwanda kiaku muna yantika dia malembe malembe madia ma mwanda konso lumbu. Kuyindudi ko vo olenda vanga mawonso mu nkumbu mosi. Nanga olenda vaula miniti miakete mu tanga yovo wá e ntangilu a Nkand’a Nzambi, longoka umosi muna nkanda mieto, tala e programa zeto za tv ya Mbangi za Yave muna nzil’eto ya jw.org. Olenda vanga mpe ngolo mu yantika lungana muna tukutakanu. Vana ntandu, samba kwa Yave yo lomba lusadisu. “O nteleko eno a moyo awonso, nusia wo muna yandi, e kuma kadi, yeno kasidi o moyo.”—1 Petelo 5:7.

“Vava yayoya muna mwanda, nsoni zayingi yamonanga kana nkutu za samba. Vava yavanga e ngolo za samba, nkuluntu mosi a nkutakani wankingula. Wansadisa mu bakula vo Yave kambembola ko. O nkuluntu wampovesa vo yayantika tanga o Nkand’a Nzambi lumbu yawonso. Vava yavanga wo, yayantika vwa o nkuma wa kwenda diaka muna tukutakanu. Kuna kwalanda, yayantika diaka sala e salu kia umbangi. Iyangalalanga kikilu wau vo Yave kambembola ko.”—Eeva.

AWEYI AMPANGI MUNA NKUTAKANI BEKUNTAMBULWILA?

Kala ye ziku vo ampangi muna nkutakani bekutambula kuna ngemba zawonso. Vana fulu kia kutumba yovo kufundisa, bekusonga vo zola kikilu bekuzolanga yo kukasakesa. —Ayibere 10:24, 25.

“Nsoni zayingi yamonanga mu kwenda kuna Seka dia Kintinu. Yakiyuvulanga, aweyi akundi bekumbadikila. Mosi muna mpangi ankento wa nunu ona wakala mu nkutakani se vioka mvu 30 wampovesa vo ‘Ngiz’a mbote e Mwana!’ Ediadi diasimba kikilu o ntim’ame. Yamona vo yavutuka kikilu ku nzo.”—Javier.

“Yayenda kuna Seka dia Kintinu yo vwanda vana kunda kiansuka kimana yalembi moneka kwa wantu. Kansi, ndonga bayantika kunsungamena wau vo yayendanga mu tukutakanu ekolo yakala nleke. Bantambula yo kumbimbakana kuna ngemba zawonso. Muna kuma kiaki, yamona luvuvamu lwa ntima. Diakala nze mono yavutuka ku nzo.”—Marco.

AWEYI AKULUNTU BEKUNSADISILA?

Akuluntu bekutambula kuna ngemba zawonso. Bekusanisina muna ngolo ovanga za vutukila e “nzol’aku antete.” (Lusengomono 2:4) Kuna walakazi wawonso bekusadisa mu singika konso vilwa wavanga kuna “mwand’alembama.” (Ngalatia 6:1; Ngana 28:13) Akuluntu bevanga e nkubika kimana mpangi mosi kalongoka yaku o nkanda, Finama Yave yovo “Zinga ye Kiese Yakwele Mvu!.” Kala ye ziku vo akuluntu bekufiaulwisa yo kuvana konso lusadisu mu singika e ntambi zaku muna nzila.—Yesaya 32:1, 2.

“Muna mvu nana yayoya muna mwanda, akuluntu bakwamanana kunkingula. Lumbu kimosi, nkuluntu mosi wansonga e mafoto katukatula. E mafoto momo mansungamesa mambu mayingi mamfunu, i bosi yayantika yindula e kiese yamonanga vava yasadilanga Yave. Kuna zola kwawonso, o nkuluntu wansadisa mu vutukila e salu yame ya mwanda.”—Victor.

“Yave Okukumika”

O nkanda eto wa nkunga, Tuyimbidila Yave, una ye nkunga miayingi miakiese milenda kufiaulwisa yo kukasakesa mu vutukila salu yaku ya mwanda. Badika e mvovo mia nkunga wa 38, mibongelo muna 1 Petelo 5:10 una ye ntu a diambu, “Yave Okukumika.”

Zay’e kuma Nzambi kasongela ludi

Yo kuvaikisa muna tombe.

Wamona ntim’aku yo luzolo lwaku

Lwazaya ludi ye nzila zandi.

Mu sambu kiaku wakiyekola;

Yave kasadisa wasikila.
Nzambi watuma Kristu mu wete diaku;

I luzolo lwandi wakumama.

Wauna kavana Mwan’andi anzolwa,

Okuvana nkum’ovuidi mfunu.

Nzambi kakondelo unsongi ko;

Ke vilakana selo yandi ko.

(MVUTUKILU)

Kwa Nzambi wasumbwa mu menga ma mwan’andi.

Kwa Nzambi ovwilu, i ntanini aku.

Yave okufila e lumbu, yawonsono.

Kwa yandi ovuilu, osinga kumikwa.