Kwa mpangi zeto azolwa:

Nze una ozeye, Nkand’a Nzambi i nkanda utoma vovelanga oma ma zingu kia wantu. Ndonga muna yau, akala ye akento akwikizi ana banwananga ye mpasi nze zina tunwananga zau. Bakala ye ngindu ‘nze zeto.’ (Yakobo 5:17) Akaka banwananga ye mambu mampasi ye ntelekw’a moyo. Akaka bamweswa e mpasi kwa yitu ye kwa akwau akwikidi. Ayingi bayitumbanga mu kuma kia vilwa wa yau kibeni.

Nga wantu awaya bayambula emvimba sadila Yave? Ve. Ndonga bakala nze ntozi a nkunga ona wasamba vo: “Yazungana nze ememe diavila; vava ntaudi aku; kadi e nkanikinu miaku kivilakeno mio ko.” (Nkunga 119:176) Nga walwakilwa kala e ngindu zazi?

Yave kalendi vilakana asambidi andi ko ana bakatuka muna kambi. Kansi, okubavavanga. Nkumbu miayingi, ovanganga wo muna sadila akwau akwikidi. Muna bong’e nona, yindula una Yave kasadisila Yobi wa selo kiandi ona wabwilwa mpasi za mpila mu mpila. Wavidisa mavwa mandi, wan’andi azolwa ye selo yandi yo bakama kimbevo kiampasi. Yobi wazizidila mpe mvovo mia luvezo mia wantu ana bafwana kumfiaulwisa. Kana una vo e ngindu zandi zabendomoka mu fikolo, Yobi kayambula Yave ko. (Yobi 1:22; 2:10) Aweyi Yave kasadisila Yobi kimana kavutukila e ngindu zasikila?

Imosi muna mpila Yave kasadisila Yobi, i sadila Eleyu wa nkwandi a nkwikidi. Vava Yobi kasonga e ntokani zandi, Eleyu wawunikina ye sungididi kiawonso i bosi kavova. Adieyi kavova? Nga watumba Yobi yovo kumfusulwisa e nsoni yo kunsonga vo nkwa kuma muna mpasi zandi? Nga Eleyu wakibadikila vo osundidi Yobi? Ka yindula wo nkutu ko! Muna lusadisu lwa mwand’a Nzambi, Eleyu wavova vo: “Ngin’oku kwa Nzambi owu win’ongeye: Omono mpe yabumbwa muna tuma.” I bosi watoma songa kwa Yobi vo: ‘Ke vena diambu diampasi ko oku kwa mono dikuvumisa ngatu koko kwame kwazita oku wina.’ (Yobi 33:6, 7) Vana fulu kia kudikila e mpasi za Yobi, Eleyu kuna zola kwawonso wamvana e longi yo lukasakeso kavwanga o mfunu.

Sungamena dio vo e ngindu zazi i zau zatufididi mu kubika finkanda fiafi. Entete, twawidi ye sungididi kiawonso yo toma badika mambu ye mvovo mia wantu ayingi ana bayivambula ye kambi. (Ngana 18:13) Twafimpidi e sono yo samba, i bosi twabadikidi tusansu twa Nkand’a Nzambi tusonganga una Yave kasadisila selo yandi kuna nz’ankulu ana bawanana ye mambu mau mamosi. I bosi, twasadidi tusansu twatu twa Nkand’a Nzambi kumosi ye mambu mevangamanga mu lumbu yeto mu vaikisa finkanda fiafi. Tuwondelele walongoka finkanda fiafi. Kala ye ziku vo tutoma kuzolanga.

Buka kia Selo Yambuta kia Mbangi za Yave