Ekolo kena muna Yerusaleme mu kembelela e Nduta ya mvu a 30 wa tandu kieto, Yesu ovangidi sinsu yovo sivi diampwena. Mu kuma kia sivi diadi, wantu ayingi bakwikidi muna yandi. Mfarisi mosi, nkumbu andi Nikodemo, mosi muna akuluntu a Mbazi a Nkanu Anene iyikilwanga vo Sanedina, osivikidi kikilu. Wau kazolele zaya mayingi, wizidi kingula Yesu mu fuku. Nanga ovangidi wo mu kuma kia wonga wa kulula o zitu wandi avo omonekene kwa akuluntu ankaka a Yuda.

Nikodemo ovovele vo: “E Rabi, tuzeye wo vo nge i nlongi watuka kwa Nzambi, kadi ke vena ona olenda vanga sinsu ina ovanganga ko, nanga vo Nzambi kakala yandi.” Yesu ovutwidi Nikodemo vo, o muntu mu lenda kota muna Kintinu kia Nzambi, kafwete “wutuluka.”—Yoane 3:2, 3.

Nikodemo unyuvuidi vo: O muntu aweyi kalenda wutulukila? “Nga lenda kwandi kota muna vumu kia ngudi andi, kawutuluk’e?”—Yoane 3:4.

Ke yau ko i nsas’a wutuluka. Yesu osasidi vo: O ‘muntu avo kalembi wutwa kwa maza yo mwanda ko, kalendi kota muna Kintinu kia Nzambi ko.’ (Yoane 3:5) Vava Yesu kavubwa yo kulumukina mwand’avelela, ‘wawutwa kwa maza yo mwanda.’ Muna ntangwa yayina, e ndinga yatuka kuna zulu, oku vo: “Ndioyo i Mwan’ame anzolwa, ona iyangalelanga.” (Matai 3:16, 17) Muna mpila yayi, Nzambi osamwini vo Yesu owutulukidi se vangwa kia mwanda ye kani dia kota muna Kintinu kia zulu. Kuna kulanda, muna Pentikosti ya mvu wa 33 wa tandu kieto, o mwand’avelela a Nzambi ubungulwa kw’akaka ana bevubwa, i sia vo bewutuluka se wan’a Nzambi muna mwanda.—Mavangu 2:1-4.

Kieleka, diampasi kwa Nikodemo mu bakula dina kelongwanga kwa Yesu mu kuma kia Kintinu. Dianu vo, Yesu otomene kunsasila vo yandi i Mwan’a Nzambi. Unsasidi mpe kiyekwa kiandi kiamfunu. Yesu ovovele vo: “Wauna Mose kamanikin’e nioka vana makanga, i una kafwete manikinwa o Mwan’a muntu, kimana konso on’okwikilanga muna yandi, kavua moyo a mvu ya mvu.”—Yoane 3:14, 15.

Kuna nz’ankulu, Aneyisaele ana batewa kwa nioka, muna vuluka diavavanga vo batala e nioka ansongo yamanikwa vana nti. (Ntalu 21:9) Diau dimosi mpe, wantu awonso muna vuluzwa muna tumbu kia lufwa yo vua moyo a mvu ya mvu, bafwete kwikila muna Mwan’a Nzambi. Muna toma songa o zola kwa Yave, Yesu ovovese diaka Nikodemo vo: “Muna nzola katoma zola e nza o Nzambi i kavanin’o Mwan’andi amosi, kimana konso on’okwikilanga muna yandi ke fwaswa ko, moyo a mvu ya mvu kevua.” (Yoane 3:16) Muna kuma kiaki, ekolo kena omu Yerusaleme, vioka ngonde sambanu tuka kayantikila e salu kiandi, Yesu otomene dio songa vo yandi i nzil’a luvuluzu lwa wantu.

Yesu ovovese Nikodemo vo: “O Nzambi watuma Mwan’andi ova nza, ke mu fundisa nza ko.” Ediadi disongele vo oyandi katumwa ko mu fundisa nza, ngatu fwasa wantu awonso. Kansi watumwa kimana ‘e nza yavuluzilwa muna yandi.’—Yoane 3:17.

Muna kuma kia wonga, Nikodemo wizidi kwa Yesu mu fuku. Kiaki i kuma Yesu kafokolwele e moko kiau mu mvovo emi: “Kiaki i kuma kia lufundisu, o ntemo [i sia vo zingu kia Yesu, ye malongi mandi] wizidi omu nza, kansi wantu balutidi zola tombe ke mu ntemo ko, kadi mavangu mau mambi. Kadi konso on’ovanganga mambi omengene o ntemo, kekwiza ku ntemo ko, kimana mavangu mandi malembi tumbwa. Kansi konso on’ovanganga oma maludi okwiz’oku ntemo, kimana mavangu mandi masengomoka, wau vo muna luzolo lwa Nzambi mavangamena.”—Yoane 3:19-21.

Nikodemo wa Mfarisi, una vo nlongi a Isaele, owau kafwete yindula mana kawidi mu kuma kia kiyekwa kia Yesu muna kani dia Nzambi.