Vava kaviokese lumbu 40 muna makanga, vitila kavutuka kuna Ngalili, Yesu ovutukidi kwa Yoane ona wamvubidi. Ekolo Yesu kefinamanga, Yoane unsongele kw’awana bena yandi, ovovele vo: “Tala Mwana meme a Nzambi, on’okatula e sumu dia nza! I yandi yuna ngikidinge vo: ‘O muntu okwiz’a ndandila, umvitidi oku ntwala, kadi wateka zinga.’” (Yoane 1:29, 30) Kana una vo Yoane oviokele Yesu muna kimbuta, ozeye wo vo Yesu wateka zinga kuna zulu se vangu kia mwanda.

Vitila tumingu twakete, vava Yesu kayiza vubwa, nanga Yoane kakala ye ziku ko vo Yesu i Masia. Yoane ovovele vo: “Wau vo kinzeye kwame ko, i diau ngizidi avubila muna maza kimana kasengomoka kwa Isaele.”—Yoane 1:31.

I bosi, Yoane ozayisi kwa awana bekunwanga dina diabwa vava kavuba Yesu, ovovele vo: “Yamwene mwanda ukulumukini kuna zulu nze yembe, wizidi kala vana yandi. Wau vo kinzeye kwame ko, Ndiona wantuma yavubila muna maza, yandi wampovesa vo: ‘Konso ona omona okulumukina mwanda yo kala vana yandi, i yandi ndiona ovubila muna mwand’avelela.’ Yamona wo, yasia umbangi vo yandi i Mwan’a Nzambi.”—Yoane 1:32-34.

Muna lumbu kialanda, Yoane wau kakedi ye alongoki andi awole, Yesu wele diaka vana bena. Yoane ovovele vo: “Tala Mwana meme a Nzambi!” (Yoane 1:36) I bosi, alongoki awole a Yoane wa Mvubi balende Yesu. O mosi nkumbu andi Andere. Wankaka i Yoane, ona wasoneka lusansu lwalu. Nanga Yoane ndioyu mpangi a Yesu, kadi mwan’a Salome. Nanga Salome nsang’a Maria, e nkumbu a nkaz’andi Zebedayo.

Wau katadidi ku nima, omwene Andere yo Yoane bekunlandanga, Yesu ubayuvuidi vo: “Adieyi nuzolele?”

Bamvutwidi vo: “E Rabi, akweyi okalanga?”

Yesu ovutwidi vo: “Nwiza, nwatala.”—Yoane 1:37-39.

Se tezo kia ola ya yá mu nkokela, Andere yo Yoane banangini yandi lumbu kiawonso. Andere oyangalele kikilu. Vava kawananene yo Simone wa mpangi andi, ona oyikilwanga mpe vo Petelo, umvovese vo: “Tusolwele Masia.” (Yoane 1:41) Andere onete Petelo kwa Yesu. I bosi, Yoane owananene mpe yo Yakobo wa mpangi andi unete kwa Yesu; kansi, Yoane kayika diambu diadi ko muna lusansu kasoneka.

Muna lumbu kialanda, Yesu owananene yo Filipo wa musi Betesaida ina lukufi ye node ya Mbu a Ngalili, i vata dia Andere yo Petelo. Yesu ovovese Filipo vo: “Undanda.”—Yoane 1:43.

I bosi, Filipo owananene yo Natanaele, oyikilwanga mpe vo Batalomai, umvovese vo: “Tusolwele ona wayikwa kwa Mose muna Nsiku ye kuna kwa Angunza: Yesu wa Nazarete, wa mwan’a Yosefe.” Natanaele okatikisi, ovovese Filipo vo: “Nga muna Nazarete mulenda tuka má kiambote e?”

Filipo umvovese vo: “Wiza tala.” Yesu omwene Natanaele okwizanga, umvovese vo: “Tala Nyisaele akieleka, muna yandi ke muna umpûki ko.”

Natanaele unyuvuidi vo: “Aweyi unzayidi?”

Yesu umvutwidi vo: “Vava kwabokelo kwa Filipo ko, ekolo okedi kuna nsi a nsanda, yakumona.”

Natanaele osivikidi, ovovele vo: “E Rabi, ngeye u Mwan’a Nzambi, ngeye u Ntinu a Isaele.”

Yesu unyuvuidi vo: “Nga okwikidi wau ivovese vo yakumona kuna nsi a nsand’e? Osinga mona mambu maviokele omama.” I bosi, Yesu unsididi nsilu vo: “Kieleka, kieleka, inusamunwini vo, numona zulu diziuka ye mbasi za Nzambi zitomboka yo kulumuka kwa Mwan’a muntu.”—Yoane 1:45-51.

I bosi, Yesu y’alongoki andi antete bakatukidi vana ndimb’a Yodani, bele kuna Ngalili.