E lumbu kumi ina yavioka tuka Yesu katombokela kuna zulu ye ngiz’a mwand’avelela muna lumbu kia Pentikosti, i ziku isonganga vo Yesu kuna zulu kena. Vena mpe ye mambu mankaka mayiza vangama. Vitila Setefano wa nlongoki katubilwa matadi mu kuma kia umbangi wandi wakwikizi una kasia, Setefano wavova vo: “Tala, mbwene zulu diziukidi yo Mwan’a muntu otelamene kuna koko kwalunene kwa Nzambi.”—Mavangu 7:56.

Wau kena kuna zulu yo Se diandi, Yesu mu vingila kena e ntangwa ina yasakulwa muna Diambu dia Nzambi. Davidi wasoneka muna lusadisu lwa mwand’avelela vo: “O Yave ovovese mfumu ame [Yesu] vo, ‘Vuand’oku koko kwame kwalunene yavana nsia mbeni zaku se nsikinw’a tambi yaku.’” Vava kifokoka e kolo kiaki kevingilanga, Yesu ‘oyala vana vena mbeni zandi.’ (Nkunga 110:1, 2) Nkia salu o Yesu kesala kuna zulu ekolo kevingilanga e ntangwa ina kefwasa mbeni zandi?

Kina kia Pentikosti ya mvu wa 33 wa tandu kieto i lumbu kiasikidiswa e nkutakani ya Akristu. Tuka kuna zulu, Yesu wayantika yala alongoki andi basolwa muna mwand’avelela. (Kolosai 1:13) Yesu wayantika twadisa e salu kia samuna nsangu zambote yo kubika alongoki mu kuma kia mbebe betambula kuna sentu. Nkia mbebe? Alongoki ana besikila ye kwikizi yamuna lufwa befuluka yo yala kumosi yo Yesu muna Kintinu kia zulu.

Mosi muna yau okala se ntinu kuna sentu i Saulu, otomene zayakana muna nkumbu a Paulu, i nkumbu andi ya kisi Roma. Nyuda kakala ye watoma lundanga Nsiku mia Nzambi, kansi mfumu za mabundu ma Ayuda bamvengomona yavana katonda nkutu vo Setefano katubilwa matadi. Wau “kavumisanga yo vava vonda alongoki a Mfumu,” kuna kwalanda Saulu wele kuna Damaseke. Kayafa wa Ngang’ambuta umvene o nswa wa kanga alongoki a Yesu yo kubatwasa muna Yerusaleme. (Mavangu 7:58; 9:1) Kansi, ekolo Saulu kena muna nzila, o ntemo untemene, obwidi vana ntoto.

E ndinga itukidi kuna zulu, ivovele vo: “E Saulu, e Saulu, ekuma okumbangikilanga?” Saulu oyuvuidi vo: “Ongeye u nani e Mfumu?” E ndinga ivutwidi vo: “Mono i Yesu, ona obangikanga.”—Mavangu 9:4, 5.

Yesu ovovese Saulu kakota muna Damaseke yo vingila luludiku lwankaka. Kansi muntu ankaka ofwete kunlwakisa muna mbanza, kadi o ntemo wasivi kamwene umvondele meso. Muna mona-meso kiankaka Yesu ovaikidi Ananiya, mosi muna alongoki andi muna Damaseke. Yesu ovovese Ananiya kenda monana yo Saulu va fulu kimosi. Ananiya omwene wonga, kansi Yesu umvovese vo: “O muntu ndioyo i sadilwa yasola mu nata e nkumbu ame kwa esi zula, kw’atinu yo wan’a Isaele.” Kuna kwalanda, meso ma Saulu matemokene, muna Damaseke “oyantikidi longa muna masambilu mu kuma kia Yesu vo, yandi i Mwan’a Nzambi.”—Mavangu 9:15, 20.

Yesu osadisi Paulu ye ateleki ankaka benda samuni e nsangu zambote zina yandi kibeni kayantika. Nzambi otomene sambula e salu kiau. Vava kiavioka mvu 25 tuka Yesu kavovana yo Paulu muna nzil’a Damaseke, Paulu wayiza soneka vo nsangu zambote “zasamunwa muna nsema wawonso kuna nsi a zulu.”—Kolosai 1:23.

Vava kiavioka mvu miayingi, Yesu wasonga mona-meso yayingi kwa ntumwa Yoane ona katoma zolanga. E mona-meso yayi ina muna Nkand’a Nzambi, muna Lusengomono. Muna lusadisu lwa mona-meso yayi, Yoane wazinga mvu miayingi yo mono e ngiz’a Yesu muna nkembo a Kintinu kiandi. (Yoane 21:22) “Muna mwand’avelela [Yoane] kakadila muna lumbu kia Mfumu.” (Lusengomono 1:10) Nkia ntangwa kiayantika?

Muna longokanga ungunza wa Nkand’a Nzambi ye sungididi kiawonso, diabakulwa vo “e lumbu kia Mfumu” kiayantika omu lumbu yeto. O mvu wa 1914 i mvu wanwanwa e Vita Yantete ya Nz’avimba. Tuka muna mvu wauna e vita zasaka ova nza, vuku, nzala, nzakama za ntoto, ye mambu mankaka mesonganga e ndungan’a “sinsu” kina Yesu kavana kwa ntumwa zandi mu kuma kia “ngiz’andi” ye “mbaninu” a tandu kiaki. (Matai 24:3, 7, 8, 14) E nsangu zambote za Kintinu mu samunwa zina, ke muna Roma kaka ko, kansi mu nza yawonso.

Muna lusadisu lwa mwand’avelela, Yoane wakiesesa e nsas’a diambu diadi, oku vo: “Owau, o luvuluzu luizidi, ye nkuma, ye Kintinu kia Nzambi eto ye wisa kia Kuswa kiandi.” (Lusengomono 12:10) Kieleka, e Kintinu kia Nzambi kuna zulu, kina o Yesu kasila umbangi vava kakala ova ntoto, kia ludi kikilu!

Ekwe nsangu zambote kwa alongoki awonso a Yesu ana besonganga e kwikizi! Balenda kwikila muna mvovo mia Yoane, oku vo: “Dianu vo, yangalala e zulu yo yeno nukalanga mo! Tâtu kwa nza ye kalunga, e kuma kadi Nkadi ampemba unukulumukini, makasi mayingi kena mau, wau kazeye wo vo kolo kiandwelo kaka kasidi kiau.”—Lusengomono 12:12.

Yesu kevuandanga diaka kuna koko kwalunene lwa Se diandi ko yo vingila e ntangw’andi. O Yesu mu yala kena se Ntinu, ke kolo ko ofukisa e mbeni zandi zawonso. (Ayibere 10:12, 13) Ekwe mambu mambote mekutuvingilanga!