Muna lutumu lwa Yesu, Petelo ye Yoane balueke muna Yerusaleme mu kubika e Nduta. Ke kolo ko, Yesu wizidi landi kumosi ye ntumwa zandi kumi. Mu masika balueke, e ntangwa se idimuka kuna weste, Yesu ye alongoki andi bakulumukini kuna Mongo a Olive. Ekiaki i lumbu kiansuka o Yesu kezidi va mongo wau. Ovutuka vo diaka vava kefuluka.

Ke vavioka kolo ko, Yesu ye alongoki andi balueke muna mbaza, bakotele muna nzo ivangamena e lambu dia Nduta. Batombokele kuna suku dia ntandu. Bawene mawonso makubikilu mu kuma kia lambu. Yesu wasutilanga e lumbu kiaki, kadi wavova vo: “Tima diayingi ngina diau mu dia e Nduta yayi vamosi yo yeno ekolo kiamwene mpasi ko.”—Luka 22:15.

Tuka mvu miayingi, o wantu bayantika e fu kia viokesa makopo ma vinyu vana moko ma wantu bayiza dianga e Nduta. O Yesu vava katambwidi e kopo, ovutwidi matondo, ovovele vo: “Nubonga, nunua dio, konso muntu kaviokesa kwa nkw’andi, kadi inusamunwini vo, tuk’omu unu, kinua diaka má kia bundu kia vinyu ko yavana kikwiz’e Kintinu kia Nzambi.” (Luka 22:17, 18) Owau o lufwa lwandi lufinamene.

Wau bevanganga o nkinzi a lambu dia Nduta, diambu diasivi divangamene. Yesu otelamene, okatwidi yunga kiandi kiantandu, obongele twaya. I bosi obukwidi maza muna longa. Nkumbu miayingi, o ntambwidi a nzenza wavavanga zaya kana vo selo kiandi osukwidi malu ma nzenza zandi. (Luka 7:44) Kansi muna Nduta yayi, ke batambwilu kwa muntu ko, dianu o Yesu kavangidi wo yandi mosi. Konso ntumwa wadi kala ye lau dia vanga wo, kansi ke mosi ko muna yau ovangidi wo. Nga ke bavangidi wo ko mu kuma kia ntantani zau kana nani osundidi onene? Ke tuzeye ko. Bafusukidi e nsoni wau bamwene Yesu kesukulanga malu mau.

O Yesu vava kalueke kwa Petelo, Petelo kazolele ko, ovovele vo: “Kulendi sukula malu mame ko.” Yesu umvutwidi vo: “Avo kisukwidi malu maku ko, kuna yame ntwadi ko.” Simone Petelo umvutwidi vo: “E Mfumu, kusukula kaka malu mame ko, kansi yo moko mpe yo ntu ame.” Petelo osivikidi vava Yesu kamvovese vo: “Konso ona oyowele, kavuidi mfunu akuyisukula ko, nanga malu mandi kaka, kadi watoma velela kwandi. Oyeno nwavelela, kansi ke yeno awonso ko.”—Yoane 13:8-10.

Yesu osukwidi malu ma ntumwa zandi 12, kumosi mpe yo malu ma Yuda wa musi Kereote. I bosi, Yesu ovuete yunga kiandi kiantandu, ovuende diaka vana meza, ubayuvuidi vo: “Nga nubakwidi dina inuvangidi e? Oyeno nukungikilanga vo, ‘Nlongi’ ye ‘Mfumu,’ nulungidi kweno, kadi i ngina wowo. Dianu vo, omono avo i Mfumu ye Nlongi, nsukwidi malu meno, oyeno mpe nufwete sukuziana malu. Kadi inuvene e mbandu, wauna inuvangidi, i nufwete vanganga mpe. Kieleka, kieleka, inusamunwini vo, o ntaudi kaviokele mfumu andi o nene ko, ngatu o ntumwa kavioka ona wantuma. Avo nuzeye mambu mama, nu akwa nsambu avo nuvanga mo.”—Yoane 13:12-17.

Yesu ubalongele o mfunu wa sala e salu yasakalala. Alongoki a Yesu ke bafwete vavanga fulu yambote ko, yo kuyibadikila vo basundidi o mfunu ye bafwete sadilwa. Bafwete landanga mbandu a Yesu, ke yasukula malu ko, kansi ya sadila akaka kuna zola yo lulembamu lembi tala ndose.