Vitila o kuma kwafwa, Yesu olongele ntumwa zandi o mfunu wa songa lulembamu vava kasukwidi malu mau. Kuna mfoko a lambu dia Nduta, nanga Yesu oyikidi e mvovo mia ungunza wa Davidi, oku vo: “Ona mbundidi e vuvu, wadia madia mame, Unzangwidi bombo kia kulu.” I bosi, osasidi vo: “Mosi vovo nwina okungiekola.”—Nkunga 41:9; Yoane 13:18, 21.

Antumwa batalanene, konso muntu oyuvuidi vo: “E Mfumu, nga i mono e?” Kana nkutu Yuda wa musi Kereote unyuvuidi mpe. I bosi, Petelo ovovese Yoane una vana ndambu a Yesu kavav’o zaya kana nani ovanga wo. Dianu vo, Yoane oyekamene Yesu, unyuvuidi vo: “E Mfumu, nani ndioyo?”—Matai 26:22; Yoane 13:25.

Yesu umvutwidi vo: “I yandi yuna ivana tini kia mbolo kina ivungila muna longa.” Yesu ovungidi tini kia mbolo muna longa dina vana meza, ovene kio kwa Yuda, i bosi ovovele vo: “Mwan’a muntu okwenda vondwa, nze una wasonama mu kuma kiandi, kansi tâtu kwa ndiona oyekola Mwan’a muntu! Diambote diadi kala, kele vo muntu ndioyo kawutuka ko.” (Yoane 13:26; Matai 26:24) I bosi, Satana okotele muna Yuda. Wau vo o ntim’a Yuda ke una diaka wambote ko, ukivene mu vanga luzolo lwa Nkadi ampemba, muna kuma kiaki okitukidi se “mwan’a lufwasu.”—Yoane 6:64, 70; 12:4; 17:12.

Yesu ovovese Yuda vo: “Dina ovanga, vanga dio mu nzaki.” Antumwa edi babenze vo, wau vo Yuda nkela ya nzimbu kelundanga, nanga Yesu umvovese vo: “Sumba kina tuvuidi o mfunu mu lambu,” yovo kavana má kwa asukami.” (Yoane 13:27-30) Kinga, Yuda ovaikidi kimana kayekola Yesu.

Muna fuku wa lambu dia Nduta, Yesu osikidisi e lambu diampa. Obongele mbolo, ovangidi sambu kia matondo, obukwini e mbolo, ovene yo kwa ntumwa zandi badia. Ovovele vo: “Eyayi nitu ame isunzulanga, ina ivaninwa mu kuma kieno. I wau wuwu nuvanganga muna luyindulu lwame.” (Luka 22:19) E tini ya mbolo iviokeso kwa konso ntumwa, badidi yo.

I bosi, Yesu obongele kopo dia vinyu, ovangidi sambu kia matondo, ovene yo kwa yau. Yau awonso banwini, Yesu ovovele vo: “Diau adimosi mpe kavangidi ye kopo, vava bamene dia nlekelo, ovovele vo: “E kopo diadi kangu diampa disunzulanga muna diambu dia menga mame, mana mebungukila mu kuma kieno.”—Luka 22:20.

Muna mpila yayi, Yesu osikidisi o luyindulu lwa lufwa lwandi, luna alongoki andi bekala yindula konso mvu muna lumbu kia 14 kia Nisani. Lukala kubasungamesa dina Yesu yo Se diandi bavanga kwa akwa kwikizi kimana bavuluzwa muna tumbu kia sumu yo lufwa. Nlekelo a mfumu usundidi e Nduta ya Ayuda, kadi usongele vo akwa kwikizi bevuluzwa kikilu.

Yesu ovovele vo menga mandi “mebungukila muna kuma kia wantu ayingi muna luloloko lwa masumu.” E ntumwa za kwikizi ye wantu akaka akwikizi belolokwa masumu mau. I yau beyala kumosi yo Yesu muna Kintinu kia Se diandi.—Matai 26:28, 29.