O nkangu uzolele vo Yesu kafwa. Pilato ubavovese vo: “Omono . . . kimwene kwame kuma ko numfundidi. Erodi mpe kamwene kuma ko.” (Luka 23:14, 15) Pilato ozolele vukisa Yesu, muna diadi osadidi ndekwa zankaka, oyuvuidi nkangu vo: “Wau kina vo i fu kieno yanuyambulwila muntu muna Nduta, nga nuzolele yanuyambulwil’o Ntinu a Ayuda e?”—Yoane 18:39.

Pilato ozeye mbakami mosi una ye nkumbu a Baraba, muivi, nkwa mvuanga ye mvondi a wantu. Dianu vo, Pilato oyuvuidi vo: “Nani nuzolele yanuyambulwila, Baraba yovo Yesu ona oyikilwanga vo Kristu?” Nganga za mbuta bakomekene nkangu balomba Baraba, ke Yesu ko. Pilato ubayuvuidi diaka vo: “Nani vana vena yau awole nuzolele vo yanuyambulwila?” O nkangu bakazi vo: “Baraba!”—Matai 27:17, 21.

Pilato okendalele, ubayuvuidi vo: “Ozevo, adieyi mfwete vanga kwa Yesu oyikilwanga vo Kristu?” O nkangu ukazidi vo: “Kamanikwa vana nti!” (Matai 27:22) Ke bena ye nsoni ko, balombele lufwa lwa muntu una vo munkondwa kuma. Pilato ubavovese vo: “Nkia diambu diambi kavangidi muntu ndioyu? Kimwene kuma ko kina kafwete zengelwa tumbu kia lufwa; dianu, ikuntumba yo kunyambula.”—Luka 23:22.

Kana una vo Pilato ovangidi mawonso muna yambula Yesu, o nkangu ukazidi vo: “Yambula kamanikwa vana nti!” (Matai 27:23) Mfumu za mabundu yau bakomekene nkangu mu funga makasi kimana o menga mabunguka. Kansi ke menga ma kimpumbula ko yovo mvondi a wantu. I menga ma munkondwa kuma, ona o nkangu wau batambula muna Yerusaleme nze Ntinu, lumbu tanu kaka iviokele. Avo alongoki a Yesu va fulu kiaki bena, babutamene kwau, ke mosi ko uyisunzuidi.

Pilato obakwidi vo mawonso kavangidi ke matwese nluta ko. Wau vo e mvuanga isakidi, Pilato obongele maza, osukwidi moko mandi vana meso ma nkangu. Ubavovese vo: “I munkondwa kuma muna menga ma muntu ndioyo. Manutadidi.” Kansi o nkangu ke uzolele soba ngindu zau ko. Dianu vo, Pilato ubavutwidi vo: “Yambula o menga mandi makala vana ntu mieto ye vana ntu mia wan’eto.”—Matai 27:24, 25.

Pilato kazolele vanga diambu dia unsongi ko, oyambwidi vo dina nkangu basiandamene diavanga kaka. Ozevo, muna lemvokela mvovo miau, Pilato ovaikisi Baraba muna pelezo. Okanikini makesa bavula Yesu e mvuatu yo kunwanda mfimbu.

Vava banwende, makesa bokotese Yesu muna lûmbu lwa nguvulu. Makesa mawonso bakutakene, bayantikidi veza Yesu. Bavangidi kolowa kia nsende, bamvuikidi kio vana ntu. Makesa bansimbisi e tutu vana koko kwandi kwalunene, bamvuikidi mvuatu ambwaki, nga una o ntinu kevuatanga. Bansakanene, oku vo: “Kiambote kiaku, e Ntinu a Ayuda!” (Matai 27:28, 29) Bantaulwidi mete yo kunwanda e mbata vana luse. Babongele e tutu dina vana moko mandi, banwende dio vana ntu. E nsende za “kolowa” kia luvezo zikotele muna ntu andi.

Pilato osivikidi wau kamwene o zitu wa Yesu yo unkabu wandi muna ntonta zazi zawonso. Ovavidi e ndekwa zankaka kimana kakatuka mu nkanu wau, ovovele vo: “Tala, imvaikisi kwa yeno, kimana nwazaya wo vo kimwene kwame kuma ko muna yandi.” Nanga Pilato edi kayindwidi vo, avo ovayikisi Yesu ku mbazi, o nkangu bamona e mputa zandi yo menga mesonsanga, balenda soba e ngindu zau. Yesu otelamene vana ntwal’a nkangu wau akwa ntima miambi, Pilato ovovele vo: “Tala, o muntu!”—Yoane 19:4, 5.

Kana una vo Yesu owendo yo luekwa, otatididi o zitu wandi lembi vova diambu. Pilato otomene dio bakula, kadi e mvovo miandi misongele zitu ye nkenda zandi mu kuma kia Yesu.