Yesu kaswekele Pilato ko vo yandi kikilu i ntinu. Kansi e Kintinu kiandi ke kivumisa luyalu lwa Roma ko. Yesu ovovele vo: “E Kintinu kiame ke kia nza yayi ko. Kele vo Kintinu kiame kiakala kia nza yayi, asadi ame badi nwana kimana yalembi yekolwa kwa Ayuda. Kansi, e Kintinu kiame ke kitukidi mu nza yayi ko.” (Yoane 18:36) Kieleka, Yesu ovuidi Kintinu, kansi ke kia nza yayi ko.

Pilato kazolele yambula moko kiaki ko. Oyuvuidi diaka Yesu vo: “Ongeye u ntinu e?” Muna mvutu zandi, Yesu osongele vo Pilato obakwidi e mbut’a diambu, umvutwidi vo: “Ngeye kibeni ovovele wo vo mono i ntinu. Kadi i diau yawutukila, i diau yayizila ova nza, yasila e ludi umbangi. Konso ona wina kuna sambu dia ludi owanga nding’ame.”—Yoane 18:37.

Yesu wateka vovesa Toma vo: “Mono i nzila ye ludi yo moyo.” Owau kana nkutu Pilato owidi vo Yesu wayiza ova ntoto ye kani dia sila “ludi” umbangi, musungula e ludi mu kuma kia Kintinu kiandi. Yesu obakidi e nzengo za tatidila e ludi kiaki kana nkutu divava vo kafwa. Pilato oyuvuidi Yesu vo: “Nki i ludi?” kansi kazolele zaya mvutu ko. Edi kabenze vo wafwana fundisa Yesu kadi mayingi kawidi mu kuma kiandi.—Yoane 14:6; 18:38.

Pilato ovaikidi muna nzo, wele kwa ndonga ina kuna mbazi. Nanga Yesu va ndambu a Pilato kena vava kavovese mbuta za nganga ye wantu andi vo: “Kimwene diambu diambi ko muna muntu ndioyu.” O nkangu ufungidi makasi, basiandamene vova vo: “Nkangu kevukumunanga wau kelonganga muna Yuda yawonso, tuka muna Ngalili yakuku.”—Luka 23:4, 5.

Pilato osivikidi mana Ayuda bavovele. Ekolo mbuta za nganga ye akuluntu bekazanga, Pilato oyuvuidi Yesu vo: “Nga kuwidi ko ulolo wa mambu bekusilanga kimbangi e?” (Matai 27:13) Yesu kavene mvutu ko. Wau kabutamene kwandi vana ndose a wantu bekumfundanga, Pilato osiviki kikilu.

Ayuda bavovele vo Yesu wantu kevukumunanga ‘tuka muna Ngalili.’ E mvovo miami mifididi Pilato mu yindula vo Yesu musi Ngalili kena. Pilato oyindwidi dina kalenda vanga muna kuyivevola muna mfundu a Yesu. Erodi Antipa (mwan’a Erodi Wanene) yandi oyalanga e Ngalili, una muna Yerusaleme wau vo eyayi i nsungi a Nduta. Pilato osindikidi Yesu kwa Erodi. Erodi Antipa yandi wazengesa ntu a Yoane wa Mvubi. Kuna kwalanda, vava kawá vo Yesu masivi mayingi kevanganga, Erodi wayindula vo nanga Yoane ofulukidi muna mafwa.—Luka 9:7-9.

Erodi oyangalele wau kamwene Yesu ovutukidi. E diadi ke disongele ko vo Erodi ozolele sadisa Yesu yovo vava zaya kana vo mana o wantu bavovele mu kuma kiandi ma ludi. Erodi ozolele kaka vo’ kamona e sinsu ina Yesu kevanga.’ (Luka 23:8) Kansi o Yesu kavangidi sinsu ko muna yangidika Erodi. Vava Erodi kekunyuvulanga, Yesu kabatwini nu’andi ko. Erodi yo makesa mandi bakendalele, “basakanene” Yesu. (Luka 23:11) Bamvuikidi mvuatu ukezimanga, bayantikidi kunseva. I bosi Erodi ovutwidi Yesu kwa Pilato. Erodi yo Pilato ke bewizananga ko, kansi owau e kikundi kitomene sikila.

O Yesu vava kalueke, Pilato obokelese mbuta za nganga, mfumu za Ayuda yo nkangu, ubavovese vo: “Omono imfimpidi vana ndose eno, kansi kimwene kwame kuma ko numfundidi. Erodi mpe kamwene kuma ko, kadi utuvutulwidi yandi, tala, kavangidi diambu ko dina kafwene zengelwa tumbu kia lufwa. Dianu vo, ikuntumba yo kunyambula.”—Luka 23:14-16.

Pilato ozolele yambula Yesu kenda kwandi, kadi obakwidi vo mbuta za nganga bamfundidi mu kuma kia kimpala. Vena ye diambu diankaka dikwikidisi Pilato mu yambula Yesu. Wau kavuende vana kunda kia lufundisu, o nkaz’andi untwikidi e nsangu, oku vo: “Kuvangi diambu ko kwa muntu ndioyo wansongi, kadi mpasi zayingi mbwene o unu muna ndozi mu kuma kiandi.”—Matai 27:19.

Aweyi Pilato keyambulwila Yesu wa munkondwa kuma?