Vava Yesu kavubwa, ke vavioka kolo kiayingi ko watontwa kwa mbeni ona wavavanga vo Yesu kasumuka vitila kayantika e salu kiandi. Nkadi ampemba nkumbu miayingi katonta Yesu. Kuna kwalanda Yesu wavova mu kuma kia Nkadi ampemba vo: “O nyadi a nza mu kwiza kena, kena ye wisa ko omu mono.”—Yoane 14:30.

Yoane wa ntumwa wamona muna mona-meso e mambu mebwila ‘ngobodi anene, nioka yankulu, ona oyikilwanga vo Nkadi ampemba ye Satana.’ O mbeni ndioyo wambi wayingwa kuna zulu, “makasi mayingi kena mau, wau kazeye wo vo kolo kiandwelo kaka kasidi kiau.” (Lusengomono 12:9, 12) Akristu bena ye kuma kiasikila mu kwikila vo mu lumbu ya “kolo kiandwelo” bezingilanga, ye ke kolo ko “e ngobodi, nioka yankulu,” osiwa muna mbilu ye okala mûna mu kolo kia 1.000 dia mvu vava Yesu keyala e nza muna Kintinu kia Nzambi.—Lusengomono 20:1, 2.

Muna kolo kiakina, nkia mambu mevangama ova ntoto? Nani ozingila ova ntoto? E zingu aweyi kikala? Yesu yandi kibeni wavana e mvutu. Muna kingana kia mameme ye nkombo, Yesu wasonga vo mambu mambote mevingilanga akwa unsongi bena nga mameme, ana besalanga e ntwadi ye mpangi za Yesu yo kubavangila o wete. Yesu watoma kiesesa mpe o mambu mebwila awana bena nga nkombo, ana ke besadisanga mpangi zandi ko. Yesu wavova vo: “Awaya [e nkombo] bekwenda kuna lufwasu lwa mvu ya mvu, kansi ansongi kuna moyo a mvu ya mvu.”—Matai 25:46.

Owau tubakwidi e mvovo mina Yesu kavovesa kimpumbulu kina kiakomwa vana ndambu andi. O muntu ndioyo kavewa e vuvu kimosi ko ye ntumwa zakwikizi, e vuvu kia kwenda yala kumosi yo Yesu muna Kintinu kia zulu. Tala o nsilu  una Yesu kasila e kimpumbulu kiaki: “Kieleka, o unu isamunwini vo, okala yame muna Paradiso.” (Luka 23:43) Muna mvovo miami, Yesu wavana kwa muntu ndioyo e vuvu kia zingila muna Paradiso, fulu kiambote-mbote, yovo mpatu ambote. O unu, o wantu ana besonganga muna mavangu vo bena nga mameme, yo kota “muna moyo a mvu ya mvu,” oyau mpe muna Paradiso yayi bekala.

E ngindu zazi ngwizani zina yo mambu mana Yoane wa ntumwa kavova mesinga vangama ova ntoto. Wavova vo: “E saba kia Nzambi kina yo wantu, kakala yau, bekala nkangu andi. O Nzambi yandi kibeni okala yau. Okunguna mansanga mawonso muna meso mau, lufwa ke lukala diaka ko, ngatu kala diaka dilu, yovo kazu ngatu mpasi. Mambu mantete maviokele.”—Lusengomono 21:3, 4.

E kimpumbulu kiakina muna kota muna Paradiso, kafwete futumunwa muna mafwa. Ke yandi kaka ko osinga futumunwa. Yesu watoma kiesesa e diambu diadi vava kavova vo: “E ntangwa ikwiza, ina ikala vo awonso bena muna ziami bewa nding’andi yo vaika, amimpanga mawete, muna lufuluku lwa moyo, amimpanga mambi, muna lufuluku lwa mfundu.”—Yoane 5:28, 29.

Kansi adieyi tuvova mu kuma kia ntumwa zakwikizi yo lutangu lwakete lwa awana beyala kumosi yo Yesu kuna zulu? Nkand’a Nzambi uvovanga vo: “Bekala se nganga za Nzambi yo Kristu, beyala yandi muna 1.000 dia mvu.” (Lusengomono 20:6) Muna buka kiau vena ye akala ye akento, yau awonso bateka zinga ova ntoto. Ediadi dikubasadisa mu kala ntinu miambote ye akwa nkenda vava beyala o wantu ova ntoto.—Lusengomono 5:10.

Yesu osadila e kimenga kiandi kakûdila o wantu ova ntoto yo kubavevola emvimba muna tumbu kia sumu basambukila. O Yesu yo wantu keyala yau bekitula akwa kwikizi se wantu alunga. Kieleka, o wantu bevutukila e zingu kina Nzambi kateka kubikila wantu vava kavovesa Adami yo Eva bawutana yo zadisa e nza yayi. O lufwa luna lwayizila muna sumu dia Adami ke lukala diaka ko.

Muna ntangwa yayina, Yesu olungisa mawonso mana Yave kamvovesa kavanga. Kuna mfoko a Luyalu lwandi lwa Funda dia Mvu, Yesu ovutula e Kintinu ye kanda dia wantu alunga vana moko ma Se diandi. Mu kuma kia vangu diadi dia lulembamu lwa Yesu, Paulu wa ntumwa wasoneka vo: “Vava lekwa yawonso isakidikwa kwa yandi, o Mwana yandi kibeni okuyisakidika mpe kwa Nzambi, ona wansakidikila lekwa yawonso, kimana o Nzambi kakala mawonso muna awonso.”—1 Korinto 15:28.

Kieleka, o Yesu mbebe ampwena kena yau muna lunganisa o mambu mawonso mana Nzambi kakana. Vava o mambu mama melungana yakwele mvu, tusinga mona e ndungan’a mvovo mina yandi kibeni Yesu kavova: “Mono i nzila ye ludi yo moyo.”—Yoane 14:6.