Yosefe osikamese Maria kuna tulu kimana kanzayisa e nsangu zamfunu. Mbasi a Yave omonekene kwa Yosefe muna ndozi, umvovese vo: “Telama, bonga e kingiana-ngiana yo ngudi andi yo tinina kuna Engipito, kala kuna yavana ikuvovesa e diambu, kadi Erodi ovavanga kingiana-ngiana kamvonda.”—Matai 2:13.

Vana vau, Yosefe, Maria yo mwan’au batinini muna fuku. Bavaikidi mu ntangw’ambote, kadi Erodi obakwidi wo vo afimpi a tetembwa bamvunini. Wabavovesa vo bavutuka kwa yandi banzayisa e nsangu. Kansi, bele kwau lembi wo vanga. Erodi ofungidi kikilu makasi. Wau vo ozolele vonda Yesu, Erodi ovene nswa vo wan’amakala awonso muna Beteleme ye zunga yandi bavondwa, ana bena ye mvu miole yovo mvu mosi. Mana kavoveso kwa afimpi a ntetembwa batukidi kuna Este mansadisi mu zaya e mvu mia wan’amakala ana bafwete vondwa.

Diambi kikilu kavangidi wau kavondese yingiana-ngiana yawonso! Katuzeye ko lutangu lwa yingiana-ngiana kavondese, kansi e ntantu ye dilu kia ngudi za wana kilunganese ungunza wa Nkand’a Nzambi wasakulwa kwa Yeremiya wa ngunz’a Nzambi.—Yeremiya 31:15.

Muna kolo kiaki, Yosefe ye nzo andi batinini kuna Engipito, bakwamanene zingila kûna. I bosi, mbasi a Yave omonekene diaka kwa Yosefe muna ndozi. Umvovese vo: “Telama, bong’e kingiana-ngiana yo ngudi andi, wenda kuna nsi a Isaele, kadi awana bavavanga moyo a kingiana-ngiana, bamene fwa.” (Matai 2:20) Owau, Yosefe obakwidi vo esi nzo andi balenda vutuka kuna nsi au. Ediadi dilunganese diaka ungunza wankaka wa Nkand’a Nzambi: Mwan’a Nzambi obokelo kavaika muna Engipito.—Osea 11:1.

Nanga Yosefe ozolele vo esi nzo andi bakala muna Yuda, ina lukufi ye vata dia Beteleme dina bazingilanga vitila batinina kuna Engipito. Kansi obakwidi vo Ankelao, wa mwan’ambi wa Erodi, oyadidi se ntinu muna Yuda. Muna ndozi, Nzambi olukisi diaka Yosefe mu kuma kia vonza kiaki. Dianu vo, Yosefe ye esi nzo andi bele kuna node yo zingila muna mbanz’a Nazarete muna zunga kia Ngalili, kwandá ye sambilu dia sina dia Ayuda. Yesu osansukidi muna Nazarete, ediadi dilunganese diaka ungunza uvovanga vo: “Oyikilwa vo mwisi Nazarete.”—Matai 2:23.