Eyayi nsungi a masanza. I ntangwa ina e kanda dia Yosefe kumosi y’akundi ye yitu yau, bevanganga o nkangalu wa konso mvu kuna Yerusaleme. Bekwendanga ko mu kembelela Nduta, wauna diasikidiswa muna Nsiku. (Nsiku 16:16) Tuka Nazarete mu kulumuka kuna Yerusaleme, tezo kia 120 ma kilometa bediatanga. Ntangw’a kiese ye salu yayingi kwa awonso. Owau Yesu mvu 12 kena miau, ovingilanga ye kiese kiawonso o nkinzi wau ye lau dia kala diaka lukufi ye tempelo.

Kuna kwa Yesu ye kanda diandi, e Nduta ke mpasi nkinzi wa lumbu kimosi ko. Kuna nim’a Nduta, e lumbu kilandilanga i “lumbu kiantete kia Mbolo Zakondwa Mfuna.” O Nkinzi wa Mbolo Zakondwa Mfuna, lumbu nsambwadi uvanganga. (Maku 14:1) Nkinzi wau i dimosi muna nkubika za nsungi a Nduta. Tuka kuna Nazarete yakuna Yerusaleme, o nkangalu wa kwenda yo vutuka ye lumbu ina bekalanga ko, tumingu tole bevanganga. Kansi omu mvu wau, lumbu yayingi bavangidi ko mu kuma kia dina Yesu kavangidi. E diambu diadi divangamene ekolo bevutukanga kuna Nazarete.

Ekolo bekangalanga, Yosefe yo Maria babenze vo Yesu una kumosi ye yitu ye akundi. Wau vo kuma kufwidi, baningamene, Yesu kamonekene ko. Bele mvavi muna buka y’awana bekangalanga yau kumosi, kansi kamonekene ko. Ke vena diaka fulu ko balenda kumvavila. Dianu vo, Yosefe yo Maria bavutukidi kuna Yerusaleme mu kwenda kumvava.

Bamvavidi lumbu kiamvimba, yandi kebamoni. Muna lumbu kianzole bamvavidi diaka, kansi kamonekene ko. I bosi, muna lumbu kiatatu, bansolwele muna tempelo. Bamwene Yesu ovuende vana kati kwa alongi a Ayuda. Okubawunikinanga yo kubadia yuvu. Alongi basivikidi kikilu mu kuma kia umbakuzi wandi.

Maria unyuvuidi vo: “E mwana, ekuma utuvangìdi wau? Omono yo se diaku ngeye tukwend’avavinge.”—Luka 2:48.

Yesu osivikidi wau balembele zaya e fulu kina kafwete kala. Ubayuvuidi vo: “Ekuma numpavìdi? Ke nuzeye wo ko vo omu nzo a Se diame i mfwete kal’e?”—Luka 2:49.

Wau basolwele Yesu, Yosefe yo Maria bavutukidi yandi kuna Nazarete. Yesu okwamanene kubalemvokela. Onungunukini muna zayi ye ntela. Kana una vo kindende, oyangalelwanga kwa Nzambi ye kwa wantu. Kieleka, tuka muna kileke, Yesu osonganga mbandu ambote muna sia mambu ma Nzambi va fulu kiantete yo zitisa mase mandi.