Nkand’a Nzambi wawonso ulenda yikilwa vo nsangu za Nzambi. Se dieto una kuna zulu watuvana wo kimana watulonganga. Yambula twavovela nsamu miole miamfunu miazayiswa se vioka 2.000 ma mvu. E nsangu zazi mbasi Ngambiele ona ‘otelamene vana ndose a Nzambi’ wazayisa zo. (Luka 1:19) Nkia ntangwa mbasi kasamuna e nsangu zazi zamfunu?

Muna mvu wa 3 vitila tandu kieto. Mbasi Ngambiele akweyi kasamunwina e nsangu zantete? Kuna londe lwa Yuda, nanga lukufi ye mbanz’a Yerusaleme. I kûna kwazingilanga ngang’a Yave mosi, nkumbu andi Zakariya. Oyandi yo nkaz’andi Elizabete se anunu kwau, ke bena yo wana ko. E ntangwa ifwene kwa Zakariya kenda sala e salu kia kinganga muna tempelo a Nzambi kuna Yerusaleme. Vava Zakariya kena muna tempelo, kuna kinsalukisa mbasi Ngambiele otelamene vana ndambu a ziku dia ndumbu.

Zakariya omwene kikilu o wonga. Kansi, mbasi Ngambiele ovuvikidi ntim’andi, umvovese vo: “E Zakariya, kumoni wonga ko, kadi ndodokela zaku ziwakanene, o nkaz’aku Elisabete okuwutila mwan’a yakala, okumvana e nkumbu Yoane.” Mbasi Ngambiele okudikidi vo, “nene kekala vana meso ma Yave,” ‘okubikila Yave nkangu akubama.’ —Luka 1:13-17.

Zakariaya kakwikidi mu mvovo miami ko. Ekuma? Ekuma kadi yandi yo Elisabete se anunu kwau. Muna kuma kiaki, mbasi Ngambiele umvovese vo: “Baba okala, kuvova diaka ko yamuna lumbu kina mevangama mambu mama, kadi kukwikidi mambu mame ko.”—Luka 1:20.

O nkangu vana mbazi mu tokana wina kadi Zakariya kolo kiayingi se kena muna tempelo. Vava kavaikidi, okitukidi baba. Zakariya oyantikidi vanga sinsu muna moko. Dimonekene vo sivi divangamene muna tempelo.

Wau kafokwele salu kiandi muna tempelo, Zakariya ovutukidi kuna nzo andi. Ke vaviokele kolo kiayingi ko, Elisabete oyimiti. Ekolo kevingilanga e lumbu kewuta, Elisabete okedi ngonde tanu muna nzo lembi vaika.

I bosi, mbasi Ngambiele omonekene diaka mu nkumbu anzole. Kwa nani kamonekene? Kwa mwan’a ndumba mosi wampumpa, nkumbu andi Maria, ozingilanga muna vata dia Nazarete, muna zunga kia Yuda, kuna node a Yerusaleme. O mbasi adieyi kamvovese? Umvovese vo: “Nzambi usongel’e dienga. Tala! yimita oyimita, mwan’a yakala owuta, okumvana e nkumbu a Yesu.” Mbasi Ngambiele okudikidi vo: “Nene kekala, mwan’a Mpungu keyikilwa, . . . okala se Ntinu muna nzo a Yakobo yakwele mvu, e Kintinu kiandi ke kisuka ko.”—Luka 1:30-33.

Kieleka, mbasi Ngambiele kiese kiayingi kena kiau mu zayisa e nsamu miole. Ekolo tutanga mayingi mu kuma kia Yoane yo Yesu, tutoma bakula ekuma e nsamu miole mitukidi kwa Nzambi minina o mfunu.