Yosefe yo Maria ke bavutukidi kuna Nazarete ko, bakinu kaka muna Beteleme. Vava Yesu kalungisi lumbu nana, banzengese nze una wasonama muna Nsiku a Nzambi kwa Isaele. (Fuka 12:2, 3) Ekiaki i lumbu kiavewanga mpe e nkumbu kwa mwan’a yakala. Dianu vo, bavene mwan’au nkumbu a Yesu, nze una bakanikinwa kwa mbasi Ngambiele.

Ngonde amvimba iviokele kala, Yesu olungisi lumbu 40. O se ye ngudi andi akweyi bekwenda yandi? Muna Tempelo kuna Yerusaleme, ina lukufi ye mbanza ina bezingilanga. O Nsiku uvovanga vo, o ngudi avo owutidi mwan’a yakala, vava kelungisa lumbu 40, kafwete kwenda sunzula lukau lwa luveleleso muna tempelo.—Fuka 12:4-8.

Maria i diau kavangidi. Onete nsweswe miole mia nuni. Ediadi disongele vo Yosefe yo Maria ke bena kwau ye mavua mayingi ko. Landila Nsiku, mwan’a meme ye nuni bafwete vana. Kansi, o ngudi avo kena ye mwan’a meme ko, mbwela zole yovo mayembe mole kafwete vana. Maria mbwela zole kaka kavene.

Wau bena muna tempelo, yakala dimosi dia nunu ofinamene Yosefe yo Maria. Nkumbu andi Simone. Nzambi wamvovesa vo vitila kafwa, omona Kristu yovo Masia ona Yave kasil’o nsilu. Muna lumbu kiaki, mwand’avelela ufididi Simone muna tempelo, i mûna kawananene yo Yosefe yo Maria yo mwan’au. Simone olelele mwana vana moko mandi.

Ekolo kena yo Yesu vana moko, Simone otondele Nzambi, oku vo: “E Mfumu Nzambi, wau se sindika ntaudi aku muna luvuvamu, wauna wavova, kadi o meso mame mamwene nzil’aku otwasila luvuluzu luna wakubika vana ndose a nkangu miawonso, ntemo ukatula e tombe kwa zula yo nkembo kwa nkangu aku Isaele.”—Luka 2:29-32.

Yosefe yo Maria basivikidi wau bawidi mambu mama. Simone ubasambwidi, ovovese Maria vo, mwan’andi “wasolwa mu bwisa yo telamesa diaka ayingi muna Isaele.” E ntantu zitobola Maria nze nsosolo watoma twa.—Luka 2:34.

Muntu wankaka diaka owanukini muna tempelo. I Ana wa ngunza ankento, una ye mvu 84. Ana ke kondwanga muna tempelo ko. Owau olweke vana vena Yosefe, Maria yo Yesu wa nsedia. Ana ovutwidi matondo kwa Nzambi, oyantikidi vova oma ma Yesu kwa awonso bekunwanga.

Yindula e kiese bamwene Yosefe yo Maria mu kuma kia mawonso mavangamene muna tempelo! Kieleka, mawonso mama masongele vo mwan’au yandi kikilu Wasilwa Nsilu kwa Nzambi.