Yesu ovangidi mawonso muna sadisa o nkangu basingika e ngwizani au yo Nzambi. Obakidi diaka e lau diankaka vava kafokwele mokena yo wantu kuna mbazi, vava kavaikidi muna nzo ya Mfarisi.

Akaka bamvovese diambu dia nkenda diavangama. Bavovele “Pilato wavonda Mingalili ana bakelanga yimenga.” (Luka 13:1) Adieyi bazolele vova?

Nanga Mingalili miami i miau miavondwa vava Ayuda ayingi batelamena Pilato vava kabonga e nzimbu muna lundilu dia tempelo muna tungisa mvuila wanene wabendela maza muna Yerusaleme. Nanga mfumu za Tempelo yau bavana Pilato nswa wavaikisa e nzimbu. O wantu bazayisi e diambu diadi kwa Yesu, babenze vo e Mingalili miamona e mpasi zazi mu kuma kia bi wau. Kansi o Yesu kakwikidi dio ko.

Yesu ubayuvuidi vo: “Nga nubenze vo Mingalili miamina basundidi Mingalili miawonso o sumuka wau bamona e mpasi zazi e?” Yesu ovovele vo, nkatu. Kansi osadidi e diambu diadi muna lukisa Ayuda, ovovele vo: “Kansi tu, avo nulembi vilukw’e ntima, yeno awonso i wau mpe nufwasilwa.” (Luka 13:2, 3) I bosi, Yesu ovovele sumbula kiankaka kiabwa mu lumbu yayina, nanga ekolo kiatungwanga o mvuila wa maza, ubayuvuidi vo:

“E 18 dia wantu babwilwa nzo e zulu muna Siloa yo fwa—nga nubenze vo basundidi awonso ana bezingilanga muna Yerusaleme o sumuka?” (Luka 13:4) O nkangu nanga uyinduidi vo e ndonga yayina yafwa mu kuma kia bi una bavanga. O Yesu kakwikidi dio ko. Kadi ozeye wo vo ‘mambu makinsalukisa’ mebwilanga wantu, e ndonga yayina yafwa ke yau ko i akwa kuma muna sumbula kiababwila. (Kimpovi 9:11) O nkangu bafwete longoka diambu muna sumbula kiaki. Yesu ubavovese vo: “Kansi avo nulembi vilukw’e ntima, oyeno awonso i una mpe nufwasilwa.” (Luka 13:5) Ekuma Yesu kavanini e longi diadi?

Kadi ozeye wo vo ntangwa yakete kaka kasidi yau muna salu kiandi. Dianu vo, otele kingana eki: “O muntu wakala yo nti a nsanda muna mpatu andi a vinyu, wizidi mo vavi bundu, kansi yau kamoni. Ovovele kwa mvati a vinyu vo, ‘Se mvu ntatu ikwiz’avavinge bundu mu nsanda wau, kansi mwau kimoni má. Kesa wo! Ekuma ufwete yambulwilwa mu ntoto wau vo ke uyimanga bundu ko?’ Kansi oyandi umvutwidi vo, ‘E Mfumu, yambula wo diaka mu mvu mosi, yatimina wo omu ndambu yo sia wo e mbole. Avo uyima e mbongo, dia matondo; avo ke wau ko, ozevo kesa wo kwaku.”—Luka 13:6-9.

Se mvu ntatu ye ndambu tuka Yesu kevangilanga mawonso mu sadisa Ayuda bakala yo lukwikilu. Kansi akete kaka mu yau bakitukidi se alongoki andi, balenda yikilwa vo mbongo a mfuntu andi. Muna mvu wa yá wa salu kiandi kia umbangi, Yesu owokese o vema kwandi. Dina nze yandi otiminanga yo zika e mbole muna nti a nsanda wa Ayuda, wau kelonganga yo samuna e nsangu zambote muna Yuda ye Perea. Nkia nluta ditwese? Akete kaka muna Ayuda bakwikidi muna yandi. E zula kiawonso kia Ayuda ke bazolele viluka ntima ko, i dianu befwasilwa.

O kondwa kwa lukwikilu lwau kumonekene diaka muna lumbu kia Vundu. Yesu wau kelonganga muna sambilu, omwene nkento mosi wakomvama e nima se mvu 18, omweswanga e mpasi kwa nkuya. Muna kunsonga e nkenda, Yesu umvovese vo: “E nkento, osasukidi kwaku muna mayela maku.” (Luka 13:12) Yesu unsimbidi, malembe-malembe o nkento otongamene, oyantikidi kembelela Nzambi.

O mbuta sambilu wau kamwene dio, ofungidi makasi, ovovele vo: “Vena ye lumbu sambanu ifwete salwanga; muna lumbu yayi nwiza wukwa, kansi ke mu lumbu kia Vundu ko.” (Luka 13:14) Mbuta ndioyo kakatikisi ko vo Yesu nkuma wa wuka kena wau; kansi otumbidi o nkangu wau bezidi wukwa muna lumbu kia Vundu. Yesu umvutwidi vo: “Akwa kivunina, muna lumbu kia Vundu, konso muntu vovo nwina, nga ke kutululanga ngombe andi ko, ovo e buluku vana dilu, kenda dio nuik’e? Nga ke diambote ko kwa nkento ndioyo wa mwan’a Abarayama, ona wakangwa kwa Satana mvu 18, kakutululwa muna kangwa kiaki mu lumbu kia Vundu e?”—Luka 13:15, 16.

Atantu a Yesu bafusukidi e nsoni, kansi e ndonga iyangalele wau bamwene mavangu ma nkuma ma Yesu. I bosi, wau kena muna Yuda, Yesu ovutukidi yingana yole ya ungunza wa Kintinu, yingana yayi watá yo vava kakala muna nzaza kuna Mbu a Ngalili.—Matai 13:31-33; Luka 13:18-21.