Yesu wakinu kaka muna Yerusaleme ku Nkinzi a Saba yovo Sudi. Oyangalele wau vo “ndonga ikwikidi muna yandi.” Kansi mfumu za mabundu ke bayangalele dio ko. Batumini makesa yovo mapolisi benda kanga Yesu. (Yoane 7:31, 32) Kansi, o Yesu kasweme ko.

Mu longa kena vana vena e ndonga muna Yerusaleme, ovovele vo: “Yakinu yeno mu fikolo, vitila ngienda kwa Ndiona wantuma. Nukumpava, kansi ke nukunsolola ko, kuna nkala, oyeno ke nulendi ko kwiza ko.” (Yoane 7:33, 34) Ayuda ke babakwidi ko. Dianu vo, bavovazianene vo: “O muntu ndioyu akweyi kekwenda, oyeto twalembi kunsolola? Kwenda kekwenda kwa Ayuda ana bamwangana muna Mingerekia, kalonga Mingerekia e? Aweyi disongele edi kavovele vo, ‘Nukumpava, kansi ke nukunsolola ko, kuna nkala, oyeno ke nulendi ko kwiza ko’?” (Yoane 7:35, 36) Kinga o Yesu lufwa yo lufuluku lwandi kuna zulu kavovele, atantu andi ke balendi kunlanda ko.

E lumbu kia nsambwadi kia nkinzi a saba kifwene. Konso lumbu kia nkinzi, muna mene, ngang’a Nzambi oyitilanga maza ma Sima kia Silowa kimana makukula kunansi a ziku. Dianu vo, muna sungamesa nkangu e diambu diadi, Yesu ovovele muna nding’angolo, oku vo: “Avo muntu omona e vuina, yambula keza kwa mono, kanua. Konso ona okwikilanga omu mono, wauna uvovele e sono: ‘Muna nsi andi a mbundu muvaikila nzadi za maza mamoyo.”—Yoane 7:37, 38.

Muna mvovo miami, Yesu osongele dina divangama vava alongoki andi bekuswa muna mwand’avelela yo tambula e mboka yakwenda kuna zulu. Alongoki bakuswa kuna nima lufwa lwa Yesu. Tuka muna lumbu kia Pentikosti kia mvu ulanda, e sima ya maza mamoyo meyantika kukula vava alongoki bekuswa muna mwanda yo yantika samuna e ludi kwa wantu.

Wantu wau bawidi malongi ma Yesu, bavovele vo: “Kieleka, ndioyu i Ngunza,” i sia vo, ngunza ndiona wasakulwa vo osundidi Mose. Ankaka bavovele vo: “Ndioyu i Kristu.” Kansi ankaka bavovele vo: “Kristu, nga muna Ngalili ketuka e? Nga e sono ke yivovanga ko vo o Kristu muna mbongo a Davidi ketuka, kuna Beteleme, e vata dina diakala Davidi e?”—Yoane 7:40-42.

O nkangu uvambanene muna ngindu. Akaka bazolele vo Yesu kakangwa, kansi ke muntu ko olendele kunsia moko. Vava makesa mavutukidi moko mankatu kwa mfumu za mabundu, nganga zambuta ye Afarisi, babayuvuidi vo: “Ekuma nulembele kuntwasila?” O makesa bavutwidi vo: “Ke vena nkutu muntu ko wavova kala nze muntu ndioyo.” Afarisi bavutwidi vo: “Oyeno mpe nuvukumwinu e? Nga mosi muna akuluntu yovo muna Afarisi, okwikidi muna yandi e? E ndonga yayi ilembele zaya o Nsiku, yasibwa.”—Yoane 7:45-49.

Nikodemo, una vo Mfarisi ye mosi muna afundisi kuna Mbazi a Nkanu, okotele Yesu. Se mvu miole ye ndambu miviokele kala tuka Nikodemo kakwikila muna Yesu vava kayenda mokena yandi muna fuku. Nikodemo ovovese akwandi vo: “Nga muna Nsiku eto tulenda fundisa muntu lembi teka kunwa yo zaya dina kavangidi e?” Bamvutwidi vo: “Nki, ongeye mpe u Mungalili e? Nda sati, wazaya wo vo muna Ngalili ke mutuka ngunza ko.”—Yoane 7:51, 52.

Muna Sono, ke mwasikidiswa ko vo muna Ngalili ngunza ivaikila mo. Kansi, e Diambu dia Nzambi disonganga vo Kristu mu mbanza yayi ketuka. Diasakula vo, “ntemo anene” umoneka muna “Ngalili ya esi zula.” (Yesaya 9:1, 2; Matai 4:13-17) Ozevo, wauna diasakulwa, Yesu wawutukila muna Beteleme, yandi i mbongo a Davidi. Kana una vo Afarisi bazeye mambu mama, nkanu ampwena banete wau bezayisanga wantu mambu ma luvunu mu kuma kia Yesu.