Muna lumbu kia nsuka kia Nkinzi a Saba, i sia vo, lumbu kia nsambwadi, Yesu mu longa kena muna tempelo vana fulu kiyikilwanga vo, “lundilu dia nzimbu.” (Yoane 8:20; Luka 21:1) Nanga e kiaki i Yanzala kia Akento, i fulu kina wantu bevaninanga tukau.

Muna lumbu ya nkinzi a saba, minda mikwamanga va fulu kiaki muna fuku. Vena ye zangikilu ziyá zampwena za mini, konso zangikilu kina ye mvungu yá mianene miazala yo mazi. O ntemo a mini yayi kwandá ulwakanga. Yesu ovovele e diambu disungamese o wantu e mini yayi, ovovele vo, “Mono i ntemo a nza. Konso ona okundanda kekangadila nkutu mu tombe ko, ntemo a moyo kaka kekala wau.”—Yoane 8:12.

Afarisi ke batondele mvovo mia Yesu ko, bavovele vo: “Ngeye kibeni okuyisila umbangi; umbangi waku ke waludi ko.” Yesu ubavutwidi vo: “Kanele vo, ikuyisila umbangi, waludi o umbangi wame, e kuma kadi, nzeye ko kuna yatuka yo kuna nkwenda. Kansi oyeno ke nuzeye ko ko, kuna yatuka, ngatu kuna nkwenda. Oyeno nufundisanga mfundis’a nitu; omono kifundisa muntu ko. Kana nkutu vo mfundisi, e mfundis’ame yaludi, e kuma kadi, kina mono mosi ko, kansi o Se ona wantuma una yame. Muna Nsiku eno diasonama vo: ‘O umbangi wa wantu wole waludi.’ Omono ikuyisilanga umbangi, o Se mpe ona wantuma, okunsilanga umbangi.”—Yoane 8:13-18.

Afarisi ke batambulwidi ngindu zandi ko, banyuvuidi vo: “O Se diaku andieyi?” Yesu ubavutwidi vo: “Omono ke nunzeye ko, ngatu zaya o Se diame. Kala vo nwanzaya, o Se diame mpe nwadi kunzaya.” (Yoane 8:19) Kana una vo Afarisi bazolele vo o Yesu kakangwa, ke mosi ko muna yau olendele kunsia moko.

Yesu ovutukidi mana katekelenge vova: “Kwenda nkwenda, oyeno nukumpava, muna masumu meno nufwila. Kuna nkwenda, oyeno ke nulendi ko kwiza ko.” I bosi, Ayuda bavovele vo: “Nga vonda kekuyivonda? Kadi owu kavovele vo, ‘Kuna nkwenda, oyeno ke nulendi ko kwiza ko.’” Ubavovese vo: “Oyeno muna nsi nutuka; omono kuna ntandu ntuka. Oyeno nwa nza yayi; omono kina wa nza ko.”—Yoane 8:21-23.

Muna mvovo miami, Yesu ovovele e zingu kakala kiau kuna zulu, osongele mpe vo yandi i Masia wasilwa o nsilu yovo Kristu, ona ovingilwanga kwa mfumu zazi za mabundu. Kansi banyuvuidi kuna luvezo: “Ongeye u nani?”—Yoane 8:25.

Mu kuma kia luvezo lwau ye kitantu, Yesu ubavovese vo: “Ntangw’ame ankatu ifwasanga muna mokena yeno.” Kansi okwamanene kubavovesa mu kuma kia Se diandi, osasidi e kuma Ayuda bafwete wila Mwan’a Nzambi. Ovovele vo: “Ndiona wantuma waludi, mana yawa kwa yandi, i mana nsamunanga mu nza.”—Yoane 8:25, 26.

Nswaswani ye Ayuda, Yesu osongele vo Se diandi kebundanga e vuvu. Ovovele vo: “Vava numanika Mwan’a muntu, i bosi nuzaya wo vo i mono yuyu, omono mpe kikuyivangilanga diambu ko; kansi mana yalongwa kwa Se, i mau kaka nsamuna. Ndiona wantuma wina yame; kangiambwidi mono mosi ko, e kuma kadi, lumbu yawonso mvanganga oma mekunyangidikanga.”—Yoane 8:28, 29.

Kansi akaka muna Ayuda bakwikidi muna Yesu, ubavovese vo: “Avo nusikila muna diambu diame, nu alongoki ame kieleka, nuzaya e ludi, e ludi kikunuvevola.”—Yoane 8:31, 32.

Akaka basivikidi wau Yesu kavovele vo bevevolwa. Bavakwidi o nkalu, oku vo: “Oyeto tu mbongo ya Abarayama, ke twabundunwa nkutu kwa muntu ko. Aweyi ovovele vo, ‘Nuvevolwa’?” Ayuda bazeye wo vo, ezak’e ntangwa babundunwanga kwa nzenza, kansi kebazolele yikilwa ntaudi ko. Kansi o Yesu ubasongele vo bakinu kaka ntaudi. Ovovele vo: “Kieleka, kieleka, inusamunwini vo, konso ona ovola e sumu, i mbundu a sumu.”—Yoane 8:33, 34.

Ayuda wau balembele tambulwila vo oyau abundu a masumu, bayisidi muna vonza. Yesu ovovele vo, “Mbundu ke kalanga mu nzo yakwele mvu ko;” Kansi “o mwana yakwele mvu kekalanga.” (Yoane 8:35) O ntaudi kena yo nswa wa tambula e vua ko, kadi o mfumu a nzo olenda kumvaikisa konso ntangwa kazolele. Mwana kaka yovo mwan’a nsansi okalanga muna nzo “yakwele mvu,” i sia vo, wau ken’o moyo.

Ozevo, e ludi mu kuma kia Mwana i kiau kivevolanga o wantu yakwele mvu muna sumu ditwasanga o lufwa. Yesu ovovele vo: “O Mwana avo okunuvevola, nuvevoka kikilu.”—Yoane 8:36.