Kuna este ya simu dia Mbu a Ngalili, Yesu odikidi mafunda ma wantu muna mpil’esivi, i bosi otinini kwandi wau bazolele kunkitula se ntinu. Muna fuku wauna, Yesu wakangala vana ntandu a mbu, wavuluza Petelo ona wadiatila mpe vana ntandu a mbu, kansi wadimuka vava kakatikisa muna lukwikilu lwandi. Yesu wadingidika mpe tembwa, nanga ediadi diavuluza e nzaza y’alongoki andi mu lembi dimuka.

Owau, Yesu ovutukidi kuna weste ya simu dia mbu, kuna zunga kia Kafanau. E ndonga ina kadikidi bezidi kwa yandi, banyuvuidi vo: “Nkia ntangwa wizidi kwaku?” Yesu ubatumbidi, ubavovese vo bamvavidi kimana kabavana diaka madia. Ubalukisi vo, “ke nusadila madia mana mekuyifwila ko, kansi madia mana mezingila yamuna moyo a mvu ya mvu.” Banyuvuidi vo: “Adieyi tufwete vanga kimana twasala e salu kia Nzambi?”—Yoane 6:25-28.

Nanga salu kiasikidiswa muna Nsiku babenze, kansi o Yesu oyikidi e salu kisundidi o mfunu, oku vo: “I kiau kiaki e salu kia Nzambi, nukwikila muna ndiona katuma.” Kana una vo o Yesu ovangidi mayingi, kansi o nkangu ke ukwikidi muna yandi ko. Bankomekene kavanga e sinsu kimana bakwikila muna yandi, banyuvuidi vo: ‘Nkia salu osalanga?’ “O mase meto badia e mana muna makanga, wauna wasonama vo: ‘Dia kwatuka kuna zulu kabavana badia.’”—Yoane 6:29-31; Nkunga 78:24.

Muna kubavana e mvutu, Yesu ubasongele e Tuku dia madia ma sivi. Ovovele vo: “Inusamunwini vo Mose kanuvana dia kwatuka kuna zulu ko, kansi o Se diame wanuvan’o dia kwaludi kwatuka kuna zulu. Kadi o dia kwa Nzambi i ndiona okulumukini kuna zulu, kavana e nza o moyo.” Wau vo kebabakwidi ko dina o Yesu kavovele, bamvovese vo: “E Mfumu, utuvananga o dia kwaku lumbu yawonso.” (Yoane 6:32-34) Nkia “madia” o Yesu kavovele?

Yesu ubasasidi vo: “Mono i dia kwa moyo. Ndiona okwiza kwa mono, kefwa nkutu nzala ko, ndiona okwikila omu mono, kemona nkutu vuina ko. Wauna inuvovese vo, numbwene kansi yeno ke nukwikila. . . . kadi nkulumukini kuna zulu, ke mu vanga luzolo lwame ko, kansi lwa ndiona wantuma kaka. I lwau lulu o luzolo lwa ndiona wantuma, yalembi vidisa kana mosi muna awonso kampana, kansi se yabafutumuna muna lumbu kiambaninu. Kadi i lwau lulu o luzolo lwa Se diame, konso ona ozaya Mwana yo kwikila muna yandi, moyo a mvu ya mvu kevua.”—Yoane 6:35-40.

E mvovo mia Yesu mifungisi wantu o makasi, Ayuda bayantikidi yidima mu kuma kiandi. Bavovele vo, ekuma kavovele vo: “Omono i dia kwakulumuka kuna zulu”? (Yoane 6:41) Kuna kwa yau, o Yesu mpasi muntu kwandi, kadi mase mandi esi Ngalili muna mbanz’a Nazarete. O nkangu uyuvuidi vo: “Ndioyu, ke yandi ko i Yesu wa mwan’a Yosefe? O se diandi yo ngudi andi tubazeye.”—Yoane 6:42.

Yesu ubavutwidi vo: “Nuyambula yìdima. Ke vena muntu ko olenda kwiza kwa mono, avo o Se, ona wantuma, kalembi kuntunta, omono mpe ikumfutumuna muna lumbu kia mbaninu. Angunza basoneka vo: ‘Yau awonso belongwa kwa Yave.’ Konso ona owanga oma metuka kwa Se yo longoka, kwa mono kekwiza. Ke vena muntu ko wamona Se, nanga ndiona kaka watuka kwa Nzambi; i yandi wamona Se. Kieleka, kieleka, inusamunwini vo, konso ona okwikilanga, una yo moyo a mvu ya mvu.”—Yoane 6:43-47; Yesaya 54:13.

Vava o Yesu kamokena yo Nikodemo, wavovela moyo a mvu ya mvu, wasonga mpe vo o wantu bafwete kwikila muna Mwan’a muntu muna vua o moyo wau. Ubavovese vo: “Konso on’okwikilanga muna [Mwan’a mosi kaka a Nzambi] ke fwaswa ko, moyo a mvu ya mvu kevua.” (Yoane 3:15, 16) Kansi owau, ovovese ndonga vo muna yandi kaka bevuila o moyo a mvu ya mvu, ke mu mana ko yovo mbolo ina bedianga muna Ngalili. Ozevo, o muntu aweyi kalenda vuila o moyo a mvu ya mvu? Yesu ovutukidi diaka e mvovo miandi, oku vo: “Omono i dia kwa moyo.”—Yoane 6:48.

O wantu bakwamanene vovela o dia kutukidi kuna zulu. E moko kiaki kibundumukini diaka vava Yesu kelonganga muna sambilu muna Kafanau.