Vava kawukidi o ntaudi a mfumu makesa, Yesu wele kuna Naini, mbanza ina kwandá, tezo kia 30 ma kilometa kuna sude ya Kafanau. Kena yandi mosi ko. Una kumosi ye alongoki andi ye ndong’ayingi. Ekolo bafinamene muna mbanz’a Naini, o kuma kubwitidi. Bawawanene ye buka kia Ayuda banete vimbu dia toko dimosi. Mu kwenda dio zika bena kuna ziami kuna mbazi a mbanza.

O ngudi a toko yandi una ye ntantu zayingi. Wafwilwa yakala, owau mwan’andi mosi kaka ofwidi diaka. Vava yakala diandi kafwa, mwan’andi anzolwa kaka kasala yandi. Yindula una kazolelanga mwana ndioyo, vuvu kiandi kiawonso muna yandi kiakala. Owau, o mwana diaka ofwidi. Nani diaka kezinga yandi? Nani okunsadisa?

Vava kamwene e ntantu za nkento ndioyo, Yesu okendalele kikilu. Kuna ngemba yo ntim’a vuvama, Yesu umvovese vo: “Yambul’o dila.” I bosi, ubafinamene, osimbidi kipoyo kina ye mvumbi. (Luka 7:13, 14) Wantu basivikidi kikilu mu kuma kia dina Yesu kavangidi, baningamene. Nanga akaka bayuvuidi vo: ‘E diadi aweyi disongele?’ ‘Adieyi kazolele vanga?’

Adieyi tuvova mu kuma kia wantu bekangalanga yo Yesu, ana bamwene mavangu mandi ma nkuma yo ulolo wa mbevo kewukanga? Ke basidi kumona ko kafutumuna mafwa. Kana una vo vakala yo wantu bafuluka kuna nz’ankulu, nga Yesu olenda fula mafwa? (1 Ntinu 17:17-23; 2 Ntinu 4:32-37) Yesu ovovele vo: “E toko, ivovese vo, telama!” (Luka 7:14) Vana vau, otelamene. Ovuende, yantikidi ovova! I bosi Yesu umvene kwa ngudi andi okedi ye ntantu zayingi, kansi owau oyangalele. Kena diaka yandi mosi ko.

Vava e ndonga yimwene vo toko una moyo, bakembelele Yave wa Mvani a Moyo, oku vo: “Ngunza anene obundumukini ova twina.” Akaka vava babakwidi e nsas’a sivi diampwena kavangidi Yesu, bavovele vo: “O Nzambi ovutwidi e sungididi kiandi kwa nkangu andi.” (Luka 7:16) Vana vau, e nsangu za sivi diadi zimwanganene mu zunga yawonso, nanga zilweke kuna Nazarete, vata dia Yesu, tezo kia kilometa 10. E nsangu zazi zilweke mpe kuna sude ya Yuda.

Yoane wa mvubi wakinu mu pelezo, ozolele zaya una salu kia Yesu kidiatilanga. Alongoki andi banzayisi masivi mana Yesu kevanganga. Adieyi Yoane wa Mvubi kavovele?