Wau kazeye wo vo Afarisi ye buka ki’alandi a Erodi bazolele kumvonda, Yesu ye alongoki andi bele kuna Mbu a Ngalili. Ndonga inlende, ankaka batukidi muna Ngalili, muna zunga kia Turo ye Sidone, kuna simu dia Yodani, Yerusaleme, ye Edome. Yesu owukidi ayingi muna yau. Awana bena ye yimbevo yangolo bafinamene Yesu kimana kabasimba. Vana fulu kia vingila vo Yesu kabasimba, bayantikidi kumfinangesa kimana bamviakana.—Maku 3:9, 10.

Wau vo ndonga isakidi, Yesu ovovese alongoki andi bakubik’e nzaza yakete bamanta kimana bavavuka fioti e ndonga ikumfinangesanga vana kumu. Kadi olenda kubalonga wau kena muna nzaza yovo olenda kwenda ku fulu kiankaka mu sadisa diaka wantu ayingi.

Matai wa nlongoki, wasoneka vo e salu kia Yesu kialunganesa “dina diavovua muna Yesaya wa ngunza.” (Matai 12:17) Yesu nkia ungunza kalungisi o vava?

“Tala, ntaudi ame ona yasola, nzolw’ame, ona ngiangalele! O mwand’ame muna yandi isia wo, okiesesa unsongi kwa zula. Ke tantana ko, ngatu kaza, ke muntu ko owa nding’andi muna nzila zampwena. E tutu diabosoka ke tolola dio ko, e vusu difwitanga ke zima dio ko, yavana kesunda muna sikidisa unsongi. Kieleka, e zula besia nkumbu andi e vuvu.”—Matai 12:18-21; Yesaya 42:1-4.

Kieleka, Yesu i ntaudi ozolakene yo yangalelwa kwa Nzambi. Yesu osengomwene unsongi wakieleka owu ufukwanga kwa tusansu twa nsambila zaluvunu. Wau vo Afarisi besasilanga Nsiku a Nzambi mu mpila yambi, kuna kwa yau ke balendi nkutu sadisa mbevo ko muna lumbu kia Vundu. Muna songa vo unsongi yo mwand’a Nzambi una muna yandi, Yesu ovevuele o nkangu muna tusansu twavilwa. Mu kuma kiaki, mfumu za nsambila bavavidi kumvonda. Ediadi dia nkenda kikilu!

“Ke tantana ko, ngatu kaza, ke muntu ko owa nding’andi muna nzila zampwena.” E mvovo miami nkia nsasa mina? Vava Yesu kewukanga wantu, yovo vaikisanga nkuya, ke kubayambulanga ko vo ‘bazayisa kwa wantu kana yandi i nani.’ (Maku 3:12) Kazolele ko vo bamwanga e nsangu zandi muna mpambu za nzila, ngatu bendomona mana kavangidi.

Yesu osamunanga mpe nsangu za lufiaulwisu kw’awana bena nze tutu diabosoka, difumbamene. Bena nze vusu difwitanga, se dizima. Yesu ke tolola tutu diafumbama ko ngatu zima e vusu difwitanga. Vana fulu kiavanga wo, Yesu okasakesanga alembami kuna zola kwawonso yo walakazi. Kieleka, Yesu i muntu olenda bundwa e vuvu kwa wantu a nza yawonso.