Mun’owu wa ntima miau, o wantu mu mpila zaswaswana bebadikilanga malongi ye mavangu ma Yesu. I diau mpe divangamene mu nzo mosi muna Ngalili. Mfarisi mosi nkumbu andi Simone, obokelese Yesu kenda dila muna nzo andi, nanga ozolele vo katoma zaya muntu ndioyo ovanganga mavangu mama mampwena. O Yesu wau kabakwidi vo dilenda kala se lau dia longa wantu bena muna nzo, otambulwidi e mboka yayi, nze una katambulwila dila vamosi ye avakulwisi a mpaku ye asumuki.

Kansi, Yesu katambwilu ko nze una e nzenza betambulwilwanga. O wantu bekangalelanga muna nzila za Palestina, o malu mau mezalanga ye mbundukutu ye meyandukanga. Muna kuma kiaki, muna songa vo o nzenza otomene tambulwa, kafwete sukulwa o malu. Kansi, e diadi ke divangilu kwa Yesu ko. Ka vena mpe muntu ko umfibidi vava kakotele muna nzo, landila e fu kiau. E fu kiankaka kisonganga vo nzenza otomene tambuka i kunkusa mazi kuna nsuki. E diadi mpe ke divangilu kwa Yesu ko. Nga tulenda vova vo Yesu otomene tambulwa?

Nzenza zawonso zilungalakene vana meza, ziyantikidi o dia. Ekolo bedianga, nkento mosi okotele muna nzo lembi bokeleswa. “Muna vata, nkento ndioyo wazayakana vo nsumuki.” (Luka 7:37) Wau vo wantu awonso asumuki, o nkento ndioyo zingu kia usafu kena kiau, nanga munta-zumba. Nanga wakiwila malongi ma Yesu kumosi mpe ye mbok’andi ya vundisa ‘awonso befuntukanga yo bimuka yo mazitu.’ (Matai 11:28, 29) Nanga, e mvovo ye mavangu ma Yesu mamfididi mu kumvava.

Olweke vana vena Yesu, ofukamene vana malu mandi. E mansanga mandi mabetomokene muna malu ma Yesu, okungwini mo muna nsuki zandi. Ofibidi o malu ma Yesu, yo kusa mo mazi katwese. Simone vava kamwene wo, ovovele kuna luvezo muna ntim’andi vo: “Muntu ndioyu, kele vo ngunza, nga ozeye wo vo nkento ndioyu umviakane, nsumuki.”—Luka 7:39.

O Yesu wau kabakwidi e ngindu za Simone, ovovele vo: “E Simone, diambu ngina diau nzolele kusamunwina.” Simone ovutwidi vo: “E Nlongi, vova kwaku!” Yesu ovovele vo: “Nsompeki mosi wakala ye mindia-mfuka miole; omosi, mfuk’a 500 za denali kakala yau, kansi wankaka 50. Wau ke bena y’eki bafuta ko, ubayambulwidi zo yau wole. Nga nani otoma kunzola vana bena?” Simone ovutwidi vo: “Muna ngindu zame, ndiona kayambulwila nzimbu zayingi.”—Luka 7:40-43.

Yesu otondele mvutu za Simone. I bosi, vava katadidi o nkento, ovovele kwa Simone vo: “Omwene nkento ndioyu e? Nkotele omu nzo aku; ngeye kumpani maza ma sukula malu. Kansi oyandi, muna mansanga i kayondelekele malu mame, yo kungunwina mo muna nsuki zandi. Ongeye kumfibidi ko, kansi oyandi, tukamena kakotele mo, kayambwidi fibulula malu mame ko. Ngeye kukusi ntu ame mazi, kansi oyandi mazi mansunga kakusidi mu malu mame.” Yesu obakwidi vo mana nkento ndioyu kavangidi masongele e ziku vo ovilukidi kieleka o ntima muna mavangu mandi ma zumba. Muna kuma kiaki, Yesu ovovese Simone vo: “Isamunwini vo, o masumu mandi kana una vo mayingi, malolokelo, e kuma kadi, zola kwingi kazolele. Kansi ona ololokelo ndolok’akete, nzol’akete kaka kazolele.”—Luka 7:44-47.

Yesu kavene ndungidi kwa munta-zumba ko. Wau vo nkwa nkenda obakulanga awana bevolanga masumu mampwena, kansi besonganga luviluku lwa ntima yo vava Kristu kimana kabavevola. Nkento ndioyu ovevokele kikilu vava Yesu kavovele vo: “O masumu maku malolokelo. . . . Lukwikilu luaku luvulwizi; wendela kuna luvuvamu.”—Luka 7:48, 50.