Vava Yesu kakatukidi muna Dekapole, e nsangu zandi zilweke kwa Ayuda bezingilanga ku node ya nlambu a Mbu wa Ngalili. Nanga wantu ayingi bawidi e nsangu za tembwa kia ngolo ye mavuku kavuvikidi. Akaka mpe bazeye wo vo Yesu nkwa nkuya kawukidi. Muna kuma kiaki, “ndong’ayingi” ilungalakene vana mbu, nanga muna zunga kia Kafanau, bezidi kika Yesu. (Maku 5:21) Wau kakulumukini muna nzaza, wantu awonso bazolele monana yandi.

Mosi muna wantu bazolele monana yo Yesu, i Yairo, mfidi a sambilu, nanga dimosi muna masambilu ma Kafanau. Yairo ofukamene vana malu ma Yesu, undodokele nkumbu miayingi vo: “E dumbelele kiame se kefwa. Dodokolo diaku, wiza wantenseka o moko kimana kasasuka yo kal’o moyo.” (Maku 5:23) Yesu nkia mvutu kevana kwa Yairo undodokele vo kasadisa mwan’andi amosi kaka? Mvu 12 kaka kena miau, wazolakana kikilu kwa se diandi.—Luka 8:42.

Ekolo kekwendanga kuna nzo a Yairo, Yesu owawanene ye diambu diankaka diankenda. E ndonga yilandanga Yesu, kiese kiayingi bena kiau, bazolele mona sivi diankaka kevanga. Kansi, nkento mosi wina vana vena ndonga otokananga kwayingi mu kuma kia kimbevo kiandi.

Nkento ndioyo wa Nyuda kimbevo kia vaika menga keyelanga se mvu 12. Ovavidi kala lusadisu kwa madotolo mayingi yo fwasa nzimbu zandi zawonso. Kansi ke belendanga kunwuka ko. ‘E mpasi zandi wokela kaka ziwokelanga.’—Maku 5:26.

E kimbevo kiaki nitu andi kiyoyesanga, nanga zitu wandi mpe kikululanga yo kunfusulwisa e nsoni. Ke kivovelwanga ko vana meso ma ndonga. Kuna diak’e sambu, mun’owu wa Nsiku a Mose, o nkento ovaikanga menga wafunzuka. Konso muntu okumviakana yovo viakana mvuatu andi wina yo menga, kafwete kisukula, kadi wafunzuka kekala yaku masika.—Fuka 15:25-27.

Nkento ndioyo “vava kawidi e nsangu mu kuma kia Yesu,” wele amvavi. Wau vo wafunzuka kena, okotele vana kati kwa ndonga kuna ndekwa, mpasi vo wantu balembi wo zaya. Ovovele muna nsi a ntim’andi vo: “Avo mpiakana kaka mvuatu andi, isasuka.” Vava kaviakene kaka nswiku a mvuatu a Yesu, vana vau obakwidi wo vo menga mandi makangamene! “Osasukidi muna kimbevo kiampasi.”—Maku 5:27-29.

I bosi, Yesu oyuvuidi vo: “Nani umpiakene?” Muna ngindu zaku, o nkento ndioyo aweyi kamwene wau kawidi e mvovo miami? Petelo ovovese Yesu vo: “E ndonga izungidi ye kufinangesa.” Ekuma Yesu kayuvulwidi, “Nani umpiakene?” Yesu ovovele vo: “Muntu umpiakene, kadi nzeye wo vo ngolo zimpaikidi.” (Luka 8:45, 46) Kieleka, e mpila o nkento kasusukidi ivaikisi e ngolo muna Yesu.

Wau kabakwidi vo omonekene, o nkento ofukamene vana vena Yesu, ozakamene yo wonga. Vana ndose a wantu awonso ovovele ludi mu kuma kia kimbevo kiandi, oyikidi mpe vo osasukidi. Yesu kuna zola kwawonso umfiaulwisi, oku vo: “E mwan’ame, lukwikilu lwaku lusaswidi. Wendela kuna luvuvamu, sasuka muna kimbevo kiaku kiampasi.”—Maku 5:34.

Kieleka, Nzambi wasola Yesu mu yala e nza, nkwa nkenda yo zola, ke tokanenanga kaka e wete dia wantu ko, kansi ovuidi mpe nkuma wa kubasadisa!