Yesu ye alongoki andi balueke muna Betesaida. Alongoki batwese mpofo kwa Yesu ye bandodokele kamviakana kimana kawukwa.

Yesu osimbidi mpofo ndioyo muna koko, wele yandi kuna fula dia vata. Una kantawidi o mete muna meso, Yesu unyuvuidi vo: “Nki omwene?” Oyandi oku vo: “Wantu mbwene, bena nze nti, kansi bediatanga.” (Maku 8:23, 24) Yesu untensekele moko muna meso, o meso mandi mavutukidi una makala. Wau vo otomene mona, Yesu unsindikidi kenda kuna nzo andi, unkanikinu vo kalembi viokela vana kati kwa vata.

I bosi, Yesu ye alongoki andi bele kuna node ya zunga kia Kaisaria-Filipi. Nkangalu wandá kikilu, tezo kia kilometa 40. E vata diadi vana ntandu a mongo dina, o mbu vana yanda tezo kia kilometa 350, lukufi ye mongo a Keremone wazala ye mbungezi. Nanga lumbu yole bediata muna lwaka ko.

Ekolo bekwendanga, Yesu ovavukidi alongoki andi, wele va fulu kia yandi kaka kasamba. Muna kolo kiaki, ngonde vua yovo kumi zisidi kimana o Yesu kavondwa. Dianu vo, Yesu otokanene kwayingi mu kuma kia alongoki andi. Kadi ke kolo ko ayingi muna yau bayambwidi kunlanda, akaka batokanene muna ngindu yovo bayoyele. Nanga mu kukiyuvula bena ekuma Yesu kazolele ko vo wantu bankitula se ntinu yovo ekuma kazolele vangila sinsu ko mu sadisa wantu babakula kana nani kikilu kena.

Alongoki bezidi vana fulu kina Yesu kesambilanga, ubayuvuidi vo: “O Mwan’a muntu, nani keyikilwanga kwa wantu?” “Bavutwidi vo: “Ankaka bevovanga vo Yoane wa Mvubi, ankaka vo Eliya, ankaka mpe vo Yeremiya yovo mosi muna angunza.” Kieleka, o wantu beyindulanga vo Yesu olenda kala mosi muna wantu awaya bafutumuka muna mafwa. Muna zaya e ngindu za alongoki, Yesu ubayuvuidi vo: “Oyeno, nani nukungikilanga?” Vana vau, Simone Petelo ovutwidi vo: “Ongeye u Kristu, wa Mwan’a Nzambi amoyo.”—Matai 16:13-16.

Yesu ovovese Petelo kamona e kiese wau vo o Nzambi unsengomwene diambu diadi. Yesu umvovese diaka vo: “Ivovese mpe vo: Ongeye u Petelo, muna tadi diadi itungila e nkutakani ame, mielo mia Ziami ke misunda yo nkuma ko.” Muna mvovo miami, Yesu osongele vo yandi kibeni otunga e nkutakani, avo selo ya nkutakani yayi basikidi ye kwikizi ova ntoto, kana nkutu Ziami ke kilenda kubasimbinina ko. Yesu osidi nsilu kwa Petelo, oku vo: “Ikuvana e nsabi za Kintinu kia zulu.”—Matai 16:18, 19.

Yesu kasolele Petelo ko kakala va fulu kiantete muna alongoki andi ngatu kunkitula se nkubilw’a nkutakani. O Yesu yandi kibeni i Tadi dina e nkutakani andi itungilwa. (1 Korinto 3:11; Efeso 2:20) Vo i Petelo nsabi zitatu ketambula. Yandi okala ye lau dia ziula e nzila kimana wantu ankaka bakota muna Kintinu kia zulu.

Petelo osadila e nsabi yantete muna Pentekosti wa mvu wa 33 wa tandu kieto, vava kesonga kwa Ayuda ye mintayila mia kiyuda ana beviluka o ntima, dina bafwete vanga muna vuluzwa. Petelo osadila nsabi yanzole mu ziula e nzila kwa mikwikizi mia esi Samaria kimana bakota muna Kintinu kia Nzambi. I bosi, muna mvu wa 36 wa tandu kieto, Petelo osadila nsabi yantatu muna ziula e nzila kwa esi zula yankaka ana ke bazengwa ko, Koneleo ye akaka mpe.—Mavangu 2:37, 38; 8:14-17; 10:44-48.

Ekolo Yesu kemokenanga yau, ntumwa zandi bakendalele vava Yesu kabavovese e mpasi kemweswa ye lufwa lwandi muna Yerusaleme. Wau vo ke babakwidi ko vo Yesu ofutumuka kenda zingila kuna zulu, Petelo unète vana ndambu, oyantikidi kunsemba, oku vo: “Kuvovi wo ko e Mfumu, e diambu diadi ke dilendi kubwila ko.” Kansi Yesu ovilukidi, ovovese Petelo vo: “Viluka oku nim’ame, e Satana! Ongeye u sakuba kwa mono, kadi kuna ye ngindu za Nzambi ko, za wantu kaka.”—Matai 16:22, 23.

Yesu obokele wantu akaka beza vana vena ntumwa zandi. I bosi osasidi vo ke diambu diakete ko muna kala nlandi andi. Yesu ovovele vo: “Konso ona ozolele kwiz’andandi, yambula kayivanina o nkalu yo nata nti andi ampasi yo kwamanana kundanda. Kadi konso ona ozolele vuluza moyo andi, vidisa kevidisa wo, kansi konso ona ovidisa moyo andi muna kuma kiame ye mu kuma kia nsangu zambote, vuluza kevuluza wo.”—Maku 8:34, 35.

Muna yangalelwa kwa Yesu, alandi andi bafwete songanga unkabu yo vevola e zingu kiau. Yesu ovovele vo: “Kadi konso ona okumbwen’e nsoni ye mambu mame vana vena mbandu yayi ya minta-zumba, yasumuka, o Mwan’a muntu okumwena mpe e nsoni vava kekwiza muna nkembo a Se diandi ye mbasi zandi zavelela.” (Maku 8:38) Dialudi vo, muna lumbu kina Yesu kekwiza, ‘osenda konso muntu mun’owu wa mavangu mandi.’—Matai 16:27.