Wau kakedi lumbu yole muna Samaria, Yesu wele kuna vata diandi. Osamwini nsangu zambote una ufwene muna Yuda, kansi kavutukidi mu Ngalili ko mu kwenda vunda. Oyantikidi nkutu salu kiampwena kia samuna nsangu zambote muna zunga kina kasansukila. Yesu ke vingilanga ko vo wantu batoma kuntambula, kadi yandi kibeni wavova vo: “O ngunza ke zitiswanga ko muna yandi nsi.” (Yoane 4:44) Vana fulu kia kala yandi, alongoki andi bele vutukila e salu yau muna nzo zau.

Nkia nsangu o Yesu kayantikidi samuna? I zau zazi: “E Kintinu kia Nzambi kifinamene. Nuviluk’e ntima yo kwikila muna nsangu zambote.” (Maku 1:15) Nga wantu batambulwidi zo? Mingalili miayingi batomene tambula Yesu yo kumvana yo kunzitisa. Ke mu kuma kia nsangu zandi kaka ko. Vitila ngonde zayingi, ankaka batuka kuna Ngalili bamona masivi kavanga muna nsungi a Nduta kuna Yerusaleme.—Yoane 2:23.

Akweyi Yesu kayantikidi e salu kiampwena muna Ngalili? Nanga muna Kana, kuna kakitulwila maza se vinyu muna nkinzi a longo. Ekolo kavutukidi muna Kana, Yesu owidi e nsangu vo kindende kimosi kibakamene kimbevo kiangolo, se kefwa. I mwan’a selo kia Ntinu Erodi Antipa. O ntinu ndioyo yandi osinga vondesa Yoane wa Mvubi. E selo kiaki owidi nsangu vo Yesu otukidi kuna Yuda olweke muna Kana. Muna kuma kiaki, okatukidi kuna vata diandi Kafanau, wizidi wanana yo Yesu muna Kana. Ovovese Yesu kuna ntantu zawonso vo: “E Mfumu, nza kulumuka ekolo mwan’ame kafwidi ko.”—Yoane 4:49.

E mvutu za Yesu nanga zisivikisi muntu ndioyo: “Wenda kwaku; o mwan’aku una moyo.” (Yoane 4:50) Selo kia Erodi okwikidi muna mvutu za Yesu, ovutukidi kuna vata diandi. Muna nzila, owanane ye ntaudi zandi, banzayisi nsangu zambote. Kieleka, mwan’andi una moyo yo vimpi wambote! Muna vava zaya dina divangamene, ubayuvuidi vo: “Nkia ola kasasukidi”?

Bamvutwidi vo: “E ngianduka zono yankatukidi muna ola ina yansambwadi.”—Yoane 4:52.

Selo osungamene vo i ola ina Yesu kavovele vo, “Mwan’aku una moyo.” I bosi, selo kiaki kia mvuama ye nzo andi kumosi ye ntaudi zandi bakitukidi alongoki a Kristu.

Kana i mbanza ina Yesu kavangidi masivi mole, entete okitwidi maza se vinyu, i bosi owukidi kindende kuna vala, tezo kia kilometa 25. Kieleka, ke mau kaka ko i masivi kavangidi. Kansi, e sivi diadi dianzole diamfunu kikilu kadi disongele e mvutuk’andi omu Ngalili. Ka lukatikisu ko vo, Yesu i ngunza watumwa kwa Nzambi. Kansi yamu nkia tezo ‘kezitisilwa muna nsi andi’?

Ediadi dizayakana vava kelwaka muna vata diandi Nazarete. Nkia mambu kewanana mau?