Yesu olongokele mambu ma mfunu ekolo ke dianga muna nzo a mfumu ya Afarisi. Yesu osimbidi e nzila, wele kuna Yerusaleme, ndonga yele kumosi yo yandi. Ekuma? Nga bazolele kikilu kukiyekola e mvimba mu kala alongoki a Yesu?

Ekolo bekwendanga mu nzila, Yesu ovovele diambu dilwekele akaka muna ntima. Ovovele vo: “Avo muntu zolele kwiz’oku ngina, kalembi menga se diandi, ngudi, nkaz’andi, wan’andi, mpangi ye nsanga zandi, musungula moyo andi, kalendi kala nlongoki ame ko.” (Luka 14:26) E mvovo mia Yesu nkia nsasa mina?

Yesu kavovele ko vo, awonso bakitukidi se alongoki andi bafwete menga esi kanda diau. Kansi edi kazolele vova vo bafwete toma zola Yesu lutila esi kanda diau. Ke bafwete vanga ko nze muntu ona oyikwanga muna kingana kia lambu, walembi tonda e mboka wau kina vo sompa kasompa. (Luka 14:20) Yakobo, una vo nkulu wa Ayuda wavoveswa vo “kamenga” Lea yo zola Rakele, i sia vo, katoma zola Lea ke mu Rakele ko.—Etuku 29:31; mvovo vana yand’a lukaya.

Zaya wo vo Yesu wavova vo nlongoki andi kafwete menga “kana nkutu moyo andi kibeni.” Ediadi disongele vo nlongoki a kieleka kafwete zola Yesu lutila o moyo andi kibeni, yo vidisa wo nkutu avo dilendakana. Kieleka, o kala nlongoki a Kristu ke diambu diakete ko. Ka difwete vangilwa mu yenge-yenge ko, yovo lembi teka yindula.

O kala nlongoki a Yesu dilenda twasila muntu mpasi yo lubangami. Yesu wavova vo: “Konso ona olembi nata nti andi ampasi yo kwiz’andandi, kalendi kala nlongoki ame ko.” (Luka 14:27) Kieleka, o nlongoki a kieleka a Yesu kafwete tonda vo wantu bamvovela e mbi nze una Yesu kavovelwa e mbi. Yesu wavova nkutu vo ofwila vana moko ma atantu andi.

Ozevo, e ndonga yayi ikangalanga kumosi yo Yesu bafwete toma zaya mana mevavuanga mu kala nlongoki a Kristu. Yesu otomene dio kiesesa muna kingana kimosi. Ovovele vo: “Nani vovo nwina, avo ozolele tunga nzo e zulu, kalembi teka vuanda, kabadika e ntalu mu zaya kana vo una ye nzimbu zafwana mu manisa yo? Dikwa kala vo okuba nkubilwa, kansi ke lenda yo manisa ko.” (Luka 14:28, 29) O wantu ana Yesu kekwendanga yau kuna Yerusaleme, vitila bakituka alongoki andi, bafwete kukibakila e nzengo yo kukiyekola emvimba mu salu kiaki. Yesu ubatelele diaka kingana kiankaka, oku vo:

“Nkia ntinu una ye 10.000 ma makesa, avo se kekwenda nwanisa ntinu akaka wina ye 20.000 ma makesa, kalembi teka vuanda, kavanga mfulu kana vo olenda kunsunda? Avo kelenda ko, ekolo ntinu ndioyo kekala kuna vala, otuma nkunzi miandi benda vanga ungudi. Diau adimosi, konso ona olembi yambula mavua mandi mawonso, kalendi kala nlongoki ame ko.”—Luka 14:31-33.

Dialudi vo, e kingana kiaki Yesu katelele kio kaka ko kwa ndonga ikunlandanga mu nzila. Kansi kwa awonso bena vo alongoki Akristu, bena yo luzolo lwa vanga mana kavovele muna kingana kiaki. Ediadi disongele vo, muna kala alongoki a Yesu bafwete sisa yawonso bena yau, i sia vo, mavua mau yo yekola nkutu mioyo miau. Diavavanga vo batoma dio yindula yo lomba lusadisu lwa Nzambi muna sambu.

I bosi, Yesu ovutukidi diambu dimosi kavova muna Longi diandi vana Mongo, vava kavova vo alongoki andi i “mungwa a nza.” (Matai 5:13) Yesu edi kazolele vova vo, wau vo o mungwa usiwanga mu madia kimana malembi beba, alongoki andi betanina o wantu kimana balembi bebeswa muna mwanda ye muna ngindu. Wau vo e salu kiandi se kilwaka kuna mfoko, Yesu ovovele vo: “O mungwa wambote. Kansi, avo ukatukidi nzenzo andi, mu nki uzenzeselwa?” (Luka 14:34) O nkangu bazeye wo vo, vena yo mungwa wambi wasangwa yo ntoto, o mungwa wau ke ukalanga mfunu ko.

Muna mvovo miami, Yesu osongele vo kana nkutu awana bena vo alongoki tuka kolo ke bafwete yoya ko. Avo bayoyele, ke bekala diaka mfunu ko, betezaneswa yo mungwa ukatukidi o nzenzo, ke usidi diaka mfunu ko. E nza ikubaseva. Edi disundidi o bi, ke bekala diaka mfunu ko kwa Nzambi, befusulwisa nkumbu andi e nsoni. Yesu osongele o mfunu wa lembi bwa muna diambu diadi, ovovele vo: “Ndiona una ye matu manwe, yambula kawá.”—Luka 14:35.