Wau vo muntu alunga, Yesu kabwilwa mambu mayingi ko metokanesanga yo kendeleka wantu awonso. Kana una vo i wau, wafwilanga wantu e nkenda. Wavanga mawonso muna kubasadisa, mankaka kavanga mena nze ke makala kwandi mfunu ko. Kieleka, nkenda zamfilanga mu sadisa akaka. Tala e nona ina muna Kapu kia 32, 37, 57, 99.

Wantu a ntela zawonso, kiakala ambuta yovo aleke, ke bakalanga ye lukatikisu ko mu finama Yesu, kadi kakalanga ye fu kia kuyitundika ko ngatu songa vo kakalanga ye ntangw’a mokena ko. Wau bamonanga vo Yesu nkwa ngemba, wantu ke bakalanga yo wonga ko wakala yandi vamosi. Muna zaya e ziku kia diambu diadi, tala muna Kapu kia 25, 27, 95.

Yesu wasambanga ntangwa zawonsono kwa Se diandi kiakala va fulu kia yandi kibeni yovo kumosi ye asambidi akieleka. Kasambanga kaka mu ola ya dia ko. Wasamba mu vutula matondo kwa Se diandi, muna kunkembelela yo lomba luludiku lwandi vitila kabaka nzengo zamfunu. Tala e nona ina muna Kapu kia 24, 34, 91, 122, 123.

Kana nkutu vava kakalanga wayoya, vana fulu kia vunda, ezak’e ntangwa Yesu wasadisanga akaka. Kasianga wete dia yandi kibeni va fulu kiantete ko. Eyayi i mbandu katusisila. Longoka e fu kiaki muna Kapu kia 19, 41, 52.

Yesu kalonganga kaka ko vo tufwete lolokanga akw’eto. Kansi, wasonganga mpe mbandu muna loloka alongoki andi ye wantu ankaka. Badika e nona ina muna Kapu kia 26, 40, 64, 85, 131.

Diasakulwa vo Ayuda ayingi bebembola Masia, i bosi ovondwa kwa mbeni zandi. Kansi, ediadi ke diankakidila ko mu sala yo vema yo vanga mayingi muna sadisa wantu. Wanungununa e nsambil’aludi yo vema kwawonso. Wasikidisa mbandu a vema kw’alandi andi awonso kana una vo bebangikwanga yo wanana yo wantu ke besonganga luzolo lwambote ko. Tala Kapu kia 16, 72, 103.

Yesu osundidi wantu alembi lunga muna mambu ma mpila mu mpila, nze muna zayi ye ngangu. Ka lukatikisu ko vo, wau vo muntu alunga wakala yo nkuma yo umbakuzi lutila wantu awonso. Kana una vo i wau, wasadilanga akaka yo lulembamu lwawonso. Obaka nluta muna longoka e fu kiaki muna Kapu kia 10, 62, 66, 94, 116.

Yesu ntangwa zawonso wasonganga luzindalalu kwa ntumwa zandi ye akaka vava balembi tangininanga mbandu andi yovo lembi sadila mana kavovanga. Yesu nkumbu miayingi kasonganga luzindalalu muna vutukila malongi mana bavuanga o mfunu kimana bakala se akundi a Yave. Tala una Yesu kasongela luzindalalu muna Kapu kia 74, 98, 118, 135.