LONGI DIA 19
Nga Mbangi za Yave i Akristu Akieleka?
Yeto Mbangi za Yave, tukwikilanga vo tu Akristu akieleka. Ekuma? Mu longi diadi, tuzaya muna mutukanga malongi meto, e kuma tuyikilwanga vo Mbangi za Yave ye una tusongelanga o zola muntu yo nkwandi.
1. Malongi ma Mbangi za Yave amweyi metukanga?
Yesu wavova vo: ‘e diambu dia Nzambi i ludi.’ (Yoane 17:17) Nze Yesu, malongi ma Mbangi za Yave mu Diambu dia Nzambi metukanga. Tala una tuvangilanga wo tuka kuna lubantiku lwa lusansu lwa Mbangi za Yave, muna mvu mia 1870. Muna kolo kiakina buka kia wantu bayantika longoka e Bibila yo toma kio fimpa. Mana babakulanga muna Bibila i mau bakwikilanga, kana nkutu vava malongi mama makalanga maswaswana ye malongi ma mabundu mankaka. I bosi, bayantika longa e ludi kiaki kia Bibila kwa wantu ankaka. a
2. Ekuma tuyikilwanga vo Mbangi za Yave?
Yave oyikilanga asambidi andi vo mbangi zandi, kadi besamunanga e ludi mu kuma kiandi. (Ayibere 11:4–12:1) Muna bonga e nona, kuna nz’ankulu Nzambi wavovesa nkangu andi vo: “Oyeno nu mbangi zame.” (Tanga Yesaya 43:10.) Yesu oyikilwanga vo: “Mbangi Akwikizi.” (Lusengomono 1:5) Tuka muna mvu wa 1931, twayantika yikilwa Mbangi za Yave. Tuna ye kiese kia yikilwa mu nkumbu yayi.
3. Aweyi Mbangi za Yave betangininanga o zola kwa Yesu?
Yesu watoma zolanga alongoki andi, wabamwenanga vo yitu yandi. (Tanga Maku 3:35.) Diau dimosi mpe, Mbangi za Yave bena mu kintwadi kia wana-ngudi mu nza yawonso. Muna kuma kiaki, tuyikilanga muntu yo nkwandi vo mpangi. (Filemone 1, 2) Tulemvokelanga mpe o nkanikinu uvovanga vo: “Nuzolanga kintwadi kia wana-ngudi awonso.” (1 Petelo 2:17) Mbangi za Yave besonganga zola kwaku mu mpila zayingi, besadisanga mpangi zau mu nz’amvimba ana bebwilwanga e mpasi.
ZAYA DIAKA MANKAKA
Zaya diaka mayingi mu kuma kia lusansu lwa Mbangi za Yave. Zaya mpe ziku kisonganga vo tu Akristu akieleka.
Malongi ma Akristu akieleka mu Bibila metukanga ye belonganga kw’akaka mana belongokanga.
4. Malongi meto mu Bibila metukanga
Yave wasakula vo umbakuzi weto muna Bibila uwokela. Tanga Daniele 12:4 ye mvovo vana yand’a lukaya, i bosi, vana e mvutu za kiuvu eki:
-
Nki ‘kiwokela’ vana vena nkangu a Nzambi ekolo bekwamanananga fimpa e Bibila?
Tala una buka kia alongoki a Bibila kumosi ye mpangi Charles Russell, balongokelanga e Diambu dia Nzambi. Tala e VIDEO, i bosi, vana e mvutu za kiuvu kilende.
-
Nze una omwene muna video, aweyi mpangi Charles Russell ye alongoki ankaka a Bibila balongokelanga e Bibila?
Nga ozeye?
Ezak’e ntangwa, tusingikanga umbakuzi weto muna mambu tukwikilanga. Ekuma? Nze una ntangwa ivaikilanga yo kiesesa o kuma malembe-malembe, Nzambi ovananga umbakuzi wa Diambu diandi, malembe-malembe. (Tanga Ngana 4:18.) E Bibila ke kisobanga ko, kansi vava tutoma kio bakulanga, tuvanganga e nsobani muna mana tukwikilanga.
5. Tuzingilanga e ngwizani ye nkumbu tuyikilwanga
Ekuma tuyikilwanga vo Mbangi za Yave? Tanga e VIDEO, i bosi, vana e mvutu za kiuvu kilende.
-
Ekuma Mbangi za Yave basolela e nkumbu yayi?
Ekuma Yave kasolela wantu bakala mbangi zandi? Wabasola kimana basamuna vo yandi i Nzambi aludi, kadi mambu mayingi maluvunu melongwanga mu kuma kiandi. Yambula twavovela mambu mole maluvunu.
Mabundu mankaka melonganga kwa minkwikizi miau vo Nzambi ozolele vo basadilanga e teke muna nsambil’au. Kansi, tanga Levitiku 26:1, i bosi, vana e mvutu za yuvu eyi:
-
Nga Nzambi ozolele vo twasadilanga e teke muna kunsambila? Aweyi Yave kemwenanga teke?
Afidi ankaka a mabundu bevovanga vo Yesu i Nzambi. Kansi, tanga Yoane 20:17, i bosi, vana e mvutu za yuvu eyi:
-
Nga Yesu i Nzambi? Nga Nzambi yo Yesu muntu mosi?
-
Aweyi omwene wau ozeye wo vo Yave watuma Mbangi zandi kimana balonganga e ludi mu kuma kiandi yo Mwan’andi?
6. Tusonganga o zola kwa muntu yo nkwandi
Bibila kitezanesanga Akristu ye yikwa yaswaswana ina muna nitu a muntu. Tanga 1 Korinto 12:25, 26, i bosi, vana e mvutu za yuvu eyi:
-
Adieyi Akristu bafwete vanga avo mpangi zau babwidilu mambu mampasi?
-
Aweyi omonanga mu kuma kia zola kuna Mbangi za Yave besongaziananga?
Vava Mbangi za Yave muna nsi zankaka bekalanga mu mpasi, e Mbangi za Yave mu nza yawonso bekubasadisanga vana vau. Tala nona kimosi. Tala e VIDEO. I bosi, vana e mvutu za kiuvu kilende.
-
Aweyi Mbangi za Yave besongelanga o zola kwau vava mpangi zau bebwilwanga e sumbula?
Akristu akieleka, besonganga o zola kw’awana bekalanga mu mpasi.
AVO MUNTU UVOVESE VO: “Mbangi za Yave, dibundu diampa.”
-
Tuka nkia kolo Yave keyikilanga asambidi andi vo mbangi zandi?
MAMBU MASINA MA LONGI DIADI
Mbangi za Yave i Akristu akieleka. I asambidi bena mu kintwadi kia wan’a ngudi mu nz’amvimba. Malongi mau mu Bibila metukanga. Ludi besamunanga mu kuma kia Yave.
Nkia Mambu Olongokele?
-
Ekuma tuyikilwanga vo Mbangi za Yave?
-
Aweyi tusongelanga o zola muntu yo nkwandi?
-
Nkia ziku una kiau vo Mbangi za Yave i Akristu akieleka?
TALA MPE OMA MALENDE
Zaya diaka mankaka mu kuma kia lusansu lweto.
Testemunhas de Jeová—Fé em Ação, Parte 1: Da Escuridão para a Luz (1:00:53)
Tala nona kimosi kisonganga vo Mbangi za Yave ke bemonanga wonga ko wasenzeka malongi maluvunu.
Tala yuvu yankaka wantu beyuvulanga mu kuma kia Mbangi za Yave.
“Yuvu Itoma Yuvulwanga mu kuma kia Mbangi za Yave” (malongi mena muna jw.org)
Stephen wakivananga muna mavangu mansoki. Zaya diambu kamona kwa Mbangi za Yave diamfila mu soba zingu kiandi.
“E Zingu Kiame Beba Kaka Kiabebanga” (Eyingidilu dia 1 dia Yuli, 2015)
a Tuka muna mvu wa 1879, nkangu a Yave wayantika vaikisa Eyingidilu disasilanga malongi ma Bibila.
Nanga Oyangalela Mpe Malongi Mama
YUVU ITOMA YUVULWANGA
Ameyi Mevangamanga Muna Longi dia Bibila ye Mbangi za Yave?
Muna programa yayi ya ngovo ya longokela isadilwanga kwa Mbangi za Yave, olenda sadila kwaku konso nsekola ya Bibila. Olenda kwaku bokelesa esi nzo aku yawonso yovo akundi aku ana ozolele.
