Menga mfunu kikilu mena, kondwa kwa menga ke tulendi zinga ko. Wau vo Nzambi i Mvangi eto, yandi ofwete kutuzayisa e mpila tulenda sadila e menga. Adieyi Nzambi kevovanga mu kuma kia menga? Nga malenda diwa yovo siwa muna nitu? Aweyi olenda bakila nzengo zambote mu diambu diadi?

1. Yave aweyi kebadikilanga e menga?

Yave wavovesa asambidi andi kuna nz’ankulu vo: “O moyo a vangwa ya mpila zawonso i menga mandi.” (Levitiku 17:14) Kuna kwa Yave, e menga i moyo. Wau vo moyo i lukau lwamfunu lwatuka kwa Nzambi, o menga mpe mfunu kikilu mena kwa yandi.

2. Nkia mpila yambi yasadila e menga Nzambi kesimanga?

Yave wakanikina asambidi andi kuna nz’ankulu vo ke badie menga ko. (Tanga Tuku 9:4 ye Levitiku 17:10.) Wavutukila nkanikinu wau vava buka kia selo yambuta bavovesa Akristu vo, ‘bayikenga . . . muna menga.’—Tanga Mavangu 15:28, 29.

O kuyikenga muna menga, aweyi disongele? Avo dotolo uvovese vo uyikenga muna malavu mankolwa, disongele vo kufwete mo nua ko. Kansi, nga olenda dia madia masiwa malavu mankolwa yovo sadila ntumbu mu kotesa mo muna mianzi miaku? Dialudi vo kuvanga wo ko. Diau dimosi mpe, o nkanikinu wa Nzambi wakuyikenga muna menga, usongele vo ke tufwete nua menga ko yovo dia mbizi yalembi zengwa vana laka mu vaikisa menga. Ke tufwete mpe dia konso madia ko masilu menga.

Adieyi tuvova mu diambu ditadidi sadila menga muna mawuku? Vena ye mpila zankaka za mawuku zikululanga nsiku a Nzambi, nze siwa menga yovo ngengele zau yá, i sia vo, glóbulos vermelhos, glóbulos brancos, plaquetas ye plasma. Kansi, vena ye mpila zankaka za mawuku ke zitoma songanga ko kana vo nsiku a Nzambi zikululanga. Muna bonga e nona, muna mawuku mankaka, madotolo besadilanga lekwa ikenzuanga (frações) muna ngengele zankaka za menga. Muna mawuku mankaka, besadilanga menga ma muntu yandi kibeni. O tambulwila yovo lembi tambulwila e mpila zazi za mawuku, konso muntu kafwete baka nzengo yandi kibeni. a—Ngalatia 6:5.

 ZAYA DIAKA MANKAKA

3. Mpila za mawuku Yave keyangalelanga

Muna diambu ditadidi mawuku, aweyi olenda bakila nzengo zina betela ye ngindu za Nzambi? Tala e VIDEO, i bosi, yika o mfunu wa sadila mambu malende.

• Lomba ngangu muna sambu.—Yakobo 1:5.

• Vavulula nkanikinu mia Bibila ye zaya una olenda mio sadila.—Ngana 13:16.

• Zaya mpila za mawuku zisadilwanga muna nsi ozingilanga.

• Fimpa mpila za mawuku zina vo zambote kwa ngeye.

• Baka nzengo zikusadisa mu kala ye ntona zambote.—Mavangu 24:16. b

• Sungamena wo vo, ke muntu mosi ko, kiakala nkaz’aku, nkuluntu yovo nlongi aku a Bibila ofwete kuvovesa dina ofwete vanga muna diambu dina ngeye kibeni ofwete bakila nzengo mun’owu wa ntona zaku.—Roma 14:12.

• Soneka nzengo zaku kimana akaka bazaya zo.

4. Mbangi za Yave mawuku mambote bevavanga

Olenda tatidila nsiku a Nzambi mu kuma kia menga yo tambulwila mawuku ke mesadilwanga menga ko. Tala e VIDEO.

Tanga Tito 3:2, i bosi, vana e mvutu za kiuvu eki:

• Ekuma tufwete songelanga ngemba ye luzitu vava tumokenanga ye madotolo?

 5. Nkia nzengo olenda baka mu kuma kia sadila lekwa ikenzwanga muna menga?

Vena ye mpila ziya za ngengele za menga, i sia vo, glóbulos vermelhos, glóbulos brancos, plaquetas ye plasma. Muna ngengele zazi mulenda kenzwa lekwa yayingi yakete iyikilwanga vo frações de sangue. c E yankaka muna lekwa yayi isadilwanga mu vanga e nlongo mu wuka yimbevo yovo kakidila menga malembi vaika.

Mu diambu ditadidi lekwa ikenzwanga muna menga (frações), konso Nkristu kafwete sadila ntona zandi zalongwa muna Bibila mu baka nzengo. Akaka balenda baka nzengo zalembi tambulwila mawuku mesadilwanga lekwa ikenzwanga muna menga (frações). Kansi, kuna kwa akaka e ntona zau zilenda kubafila mu tambulwila mawuku mama.

Avo ozolele baka nzengo muna diambu diadi, ukiyuvula kiuvu eki:

• Ekuma nzolele tambulwila yovo lembi tambulwila mawuku mesadilwanga frações za menga? Aweyi ndenda sasila nzengo zame kwa dotolo?

 MAMBU MASINA MA LONGI DIADI

Yave ozolele vo twavenga fu kia sadila menga mu mpila yambi.

Nkia Mambu Olongokele?

• Ekuma Yave kebadikilanga menga vo mamfunu kikilu?

• Aweyi tuzayidi wo vo nkanikinu a Nzambi wakuyikenga muna menga, ufwete sadilwa mpe muna diambu dia siwa menga?

• Aweyi olenda bakila nzengo zambote mu diambu ditadidi mawuku mesadilwanga menga?