Konso muntu una ye mpil’andi ya vuatila yo kuyikubika ina ketoma yangalelanga. Avo tulende e nkanikinu mia Bibila, ke tuvuatila kaka muna mpila tuzolanga ko, kansi muna mpila iyangidikanga Yave. Yambula twafimpa miankaka muna nkanikinu miami.

1. Nkia nkanikinu milenda kutusadisa mu baka nzengo zambote mu diambu ditadidi vuata yo kuyikubika?

Wau vo tu selo ya Yave, tufwete kalanga twavelela e ntangwa zawonso muna vuatanga “mvuatu miambote, kuna zitu yo lulungalalu.” Muna mpila yayi i tusongela vo ‘Nzambi tuvuminanga.’ (1 Timoteo 2:9, 10) Tala nkanikinu yá milenda kutusadisa: (1) Mvuatu mieto mifwete kala “miambote.” Nze una omonanga muna tukutakanu, konso muntu muna nkangu a Yave una ye mpil’andi ya vuatila keyangalelanga, kansi e mvuatu mieto ye mpila tukubikilanga e nsuki zeto, ivananga o zitu kwa Nzambi tusambilanga. (2) Vuatila “kuna zitu.” Ediadi disongele vo e mvuatu mieto ke mifwete songanga nitu ko yovo fila wantu mu yindula vo songa tukuyisonganga. (3) Tusonganga “lulungalalu” muna lembi landa konso mpila ya vuatila yo kuyikubika ivaikiswanga mu nza. (4) E mpw’eto ifwete songanga o ‘vumi wa Nzambi’ kimana akaka babakula vo Nzambi aludi tusambilanga.—1 Korinto 10:31.

2. Ekuma tufwete yindulwilanga mpangi zeto vava tusolanga e mvuatu tuvuata?

Dialudi vo tuna yo nswa wasola e mvuatu tuzolele vuata, kansi diambote twayindulanga dina akaka bevova mu kuma kia mpw’eto. Ke tuzolele kendeleka akaka ko. Kansi tuzolele vanga mawonso tulenda mu ‘yangidika akweto muna wete diau yo kubakasakesa.’—Tanga Roma 15:1, 2.

3. Aweyi e mpil’eto ya vuatila ilenda fidila akaka mu longoka mambu ma Yave?

Ntangwa zawonso tuzolanga vuatila mu mpila yambote, musungula vava tukwendanga muna tukutakanu ye muna salu kia umbangi. Ke tuzolele ko vo e mpw’eto yafila wantu balembi tambulwila e nsangu zambote tunatanga. Kansi, tuzolele vo e mpw’eto yafila akaka mu zola longoka mambu ma Nzambi ona tusadilanga yo “viengesa e longi dia Nzambi wa Mvuluzi eto.”—Tito 2:10.

 ZAYA DIAKA MANKAKA

4. Vava tutoma kuyikubikanga tusonganga vo Yave tuzitisanga

Ekuma dinina o mfunu mu toma lunga-lunganga e mpw’eto? Tanga Nkunga 47:2, i bosi, vana e mvutu za yuvu eyi:

• Wau vo Yave tusunzulanga, ediadi aweyi difwete vanga muna mpil’eto ya vuatila?

• Adieyi obenze, nga diamfunu mu toma lunga-lunganga e mpw’eto vava tukwendanga muna tukutakanu ye muna salu kia umbangi? Ekuma?

 5. Aweyi olenda bakila nzengo zambote mu diambu ditadidi vuata yo kuyikubika?

Tala e VIDEO.

Kiakala vo e mvuatu mieto miantalu yovo ve, mifwete kalanga miavelela ye mifwete kala betela ye fulu kina twina. Tanga 1 Korinto 10:24; ye 1 Timoteo 2:9, 10. I bosi, yika ekuma tufwete venga vuatila mvuatu . . .

• mia mvindu yovo miavuangalakana.

• miakangama muna nitu yovo milenda fila wantu mu kala ye ngindu zambi mu kuma kieto.

Akristu ke bena kunsi a Nsiku a Mose ko, kansi ulenda kutulonga mayingi mu diambu ditadidi ngindu za Yave. Tanga Nsiku 22:5, i bosi, vana e mvutu za kiuvu eki:

• Ekuma tufwete vengela mpila ya vuatila ye kuyikubika ikitulanga akala nze akento ye akento nze akala?

Tanga 1 Korinto 10:32, 33 ye 1 Yoane 2:15, 16, i bosi, vana e mvutu za yuvu eyi:

• Ekuma tufwete kuyikebelanga kimana e mpw’eto yalembi kendeleka akaka vana belo kieto yovo muna nkutakani?

• Aweyi o wantu muna zunga kiaku bevuatilanga ye kuyikubikila?

• Nga obenze vo e mpila akaka bevuatilanga ke yambote ko kwa Akristu? Ekuma?

 MAMBU MASINA MA LONGI DIADI

Vava tubakanga nzengo zambote mu diambu ditadidi vuata yo kuyikubika, tusonganga zitu kwa Yave ye kwa akaka.

Nkia Mambu Olongokele?

• Ekuma e mpil’eto ya vuatila yo kuyikubika inina o mfunu kwa Yave?

• Nkia miaka nkanikinu milenda kutusadisa mu baka nzengo zambote mu mpila yavuatila yo kuyikubika?

• Aweyi e mpw’eto ilenda vanina kimbangi kiambote yovo kimbangi kiambi muna nkumbu a Yave?