Vava Yave kasikidisa nkubika ya esi nzo, wavana kiyekwa kia longa wana kwa mase. (Kolosai 3:20) Yeno mase nuvwidi mbebe ya longa mwan’eno kimana kazola Yave yo kituka muntu ambote vava kekola. (2 Timoteo 1:5; 3:15) Nufwete mpe vava zaya edi dina muna ntim’a mwan’eno. E mbandu eno mpe mfunu ina. Nulenda longa Diambu dia Yave kwa mwan’eno avo nutekele dio kotesa muna ntima mieno.—Nkunga 40:8.

ADIEYI BIBILA KIVOVANGA? “Konso muntu, mbula kawa-wa-wa, o vova, malembe.” (Yakobo 1:19) Sadisa wan’aku bamokenanga yaku kondwa kwa lukatikisu. Yau bafwete zaya vo una yo luzolo lwa kubawá avo diambu bazolele vova. Yambula vo wana bavova konso diambu dikubatokanesanga. (Yakobo 3:18) Avo bamwene vo u nkwa ntim’a mbadi yovo mfundisi, ediadi dilenda kubafila mu lembi ziula ntima miau. Songa luzindalalu kwa wan’aku, ubasonga vo zola okubazolanga.—Matai 3:17; 1 Korinto 8:1.

ADIEYI OLENDA VANGA?

• Songanga luzolo lwa wá avo wan’aku bazolele mokena

• Kumokena kaka yo wan’aku ko avo diambu dibwidi, kansi mokenanga yau ntangwa zawonso

ADIEYI BIBILA KIVOVANGA? ‘On’osonga umbakuzi muna diambu, osolola wete.’ (Ngana 16:20) Ezak’entangwa, ofwete toma badika e mvovo mia wan’aku muna bakula ngindu zau. Nkumbu miayingi wana bevovanga mambu mana ke bakanini ko. “On’ovana mvutwilu ke mu teka wa ko, dia uzowa yo luvungu kwa yandi.” (Ngana 18:13) Venga fu kia funga makasi mu nzaki.—Ngana 19:11.

ADIEYI OLENDA VANGA?

• Venga fu kia zenga mvovo mia wan’aku kana nkutu vo mana bevova ke mekuyangidika ko

• Sungamena una wabadikilanga mambu ye mana wamonanga vo mamfunu vava wakala muna ntel’au

ADIEYI BIBILA KIVOVANGA? “E mwan’ame, w’elongi di’es’aku, kulembwa nsiku a ngw’aku ko.” (Ngana 1:8) Yave wavana wisa kwa mase mu kuma kia wana. Nufwete longa wana banulemvokelanga yo kunuzitisa. (Efeso 6:1-3) Wana balenda bakula vo mase mau ke bena “yo nyindu mosi” ko. (1 Korinto 1:10) Ke nutantani vana meso ma wan’eno ko, ediadi dilenda kubafila mu lembi kunuzitisa.

ADIEYI OLENDA VANGA?

• Nuwizana una nulongela wan’eno

• Avo ngindu zaswaswana luna zau muna mpila lusansila wan’eno, teza bakula ngindu za nkaz’aku

ADIEYI BIBILA KIVOVANGA? ‘Longa mwana e nzila kekwenda.’ (Ngana 22:6) O longa wana una ufwene ke divangamenanga kuna kinsalukisa ko. Nuteka vanga nkubika ya mpila nulongela wan’eno. (Nkunga 127:4; Ngana 29:17) O longa ke tumba kaka ko, kansi sadisa wana babakula e kuma ubalongele. (Ngana 28:7) Ubasadisa mpe bazolanga Diambu dia Yave yo bakula nkanikinu miandi. (Nkunga 1:2) Ediadi dikubasadisa mu kala ye ntona zambote.—Ayibere 5:14.

ADIEYI OLENDA VANGA?

• Sadisa wan’aku bazaya vo Nzambi muntu akieleka ona balenda bunda e vuvu

• Ubasadisa kimana babakulanga yo venga mambu ma vonza nze mana mesongwanga muna internete. Ubalonga una balenda vengela vukumunwa kwa akwa mavangu ma nsoki ma zumba