KUNKU KIA 4
Aweyi Nulenda Sadila Nzimbu?
‘Muna luludiku makani mesikila.’—Ngana 20:18
Yeto awonso nzimbu tuvwidi mfunu muna sumbila esi nzo eto lekwa bavwidi mfunu. (Ngana 30:8) Vana ntandu, ‘nzimbu tanina zitaninanga.’ (Kimpovi 7:12) Dilenda kala diampasi mu mokenena diambu dia nzimbu, kansi ke nuyambula ko vo nzimbu zatwasa ntantani muna longo lweno. (Efeso 4:32) Akazi bafwete kuyibundanga e vuvu yo sala kumosi vava bebakanga nzengo mu kuma kia mpila besadila e nzimbu.
1 NUVANGA MBALU
ADIYI BIBILA KIVOVANGA? “Nani vovo nwina, ovo ozolele o tunga nzo ezulu, kalembi teka vwanda, kabadika ntalu, kana wina y’eki kiamanina?” (Luka 14:28) Diambote nwavanganga nkubika muna zaya mpila nusadila e nzimbu zeno. (Amose 3:3) Nuvava zaya ina nuvwidi mfunu ye ntalu ilenda fwa. (Ngana 31:16) Ekolo nuna ye nzimbu ke disongele ko vo nufwete kala kisumbi-kisumbi. Nuvenga fu kia dia mfuka. Nusadila kaka nzimbu nuna zau.—Ngana 21:5; 22:7.
ADIEYI OLENDA VANGA?:
-
Avo nzimbu zisuvidi kuna nsuka ngonde, nubaka nzengo mu zaya una nusadila zo
-
Avo ke luna ye nzimbu zayingi ko, nuvanga nkubika mu kulula e lekwa nusumbanga. Muna bonga e nona, nulenda lamba madia meno vana fulu kia dila muna restaurante
2 NUVOVANGA LUDI
ADIEYI BIBILA KIVOVANGA? ‘Tulunga-lunganga mawonso muna unsongi, ke vana ndose a Yave kaka ko, kansi vana ndose a wantu mpe.’ (2 Korinto 8:21) Zayisa kwa nkaz’aku e ntalu a nzimbu ofutwanga ye zina osadilanga.
Teka mokena yo nkaz’aku vitila wabaka nzengo mu ina mpila osadila nzimbu. (Ngana 13:10) O mokenena diambu dia nzimbu dikunusadisa mu kala yo luvuvamu muna longo. Kubadikila nzimbu zaku ko vo za ngeye kibeni, kansi za yeno wole.—1 Timoteo 5:8.
ADIEYI OLENDA VANGA?
-
Nuwizana e ntalu a nzimbu zina konso muntu kalenda sadila lembi lomba nswa kwa nkw’andi
-
Ke nuvingila ko yavana e diambu dibwa i bosi numokena mu kuma kia nzimbu