Mvovo Miantete 2

•  Tusalu Tuna Muna Diambu dia Nzambi 3-5

  •  Longi 3

  •  Tusalu twa Mwanda 4

  •  Ntangilu a Bibila 5

•  Sila Umbangi Una Ufwene 6-14

  •  Mpila ya Yantikila e Moko 7

  •  Nkingula 8

  •  Kitula Wantu se Alongoki 9

  •  Sasila Mana Okwikilanga 10

  •  Longi 11

  •  Mbut’a diambu 12

  •  Mpila za Sila Umbangi 13

  •  Sadila Video ye Nkanda 14

•  Zingu kia Kikristu 15-16

  •  Longi dia Bibila dia Nkutakani 16

•  Mvovo Miansuka 17

•  Sanisina yo Vana Malongi 18

•  Ntangwa 19

•  Nkingul’a Nkengi a Zunga 20

•  Lumingu lwa Lukutakanu lwa Zunga yovo lwa Mvivu 21

•  Lumingu lwa Luyindulu 22

•  Nkengi a Lukutakanu Zingu ye Salu Kieto kia Kikristu 23

•  Mfidi a Lukutakanu Zingu ye Salu Kieto kia Kikristu 24

•  Nludiki 25

•  Seka Dianzole Yovo Diantatu 26

•  Video 27

1. O tuludiku tuna omu nkanda wau tusadisa awonso bena ye kiyekwa mu lukutakanu, Zingu ye Salu Kieto kia Kikristu. Alongoki awaya bafwete landa luludiku lwa kiyekwa befila luna muna Nkand’a Malongi, Zingu ye Salu Kieto kia Kikristu ye tuludiku tuna mu nkanda wau. Ateleki awonso bafwete kasakeswa mu kuyisonekesa kimana batambulanga kiyekwa. Akaka mpe ana belungananga muna tukutakanu balenda kuyisonekesa avo bekwikilanga muna malongi ma Bibila yo zingila e ngwizani ye mana mevavuanga kwa Akristu. O mfidi a Lukutakanu Zingu ye Salu Kieto kia Kikristu kafwete mokena ye konso muntu una vo ke nteleki ko osongele luzolo lwa kuyisonekesa muna sikola yayi yo kunzayisa mana mevavuanga mu kota muna sikola yayi, i bosi ozayisa kwa muntu kana vo olungisi mana mevavuanga. Ediadi difwete vangamena vana ntadisi a mpangi olongokanga yandi e Bibila (yovo vana ntadisi a se diandi yovo ngudi andi una vo Mbangi a Yave). O luludiku lwalu lusadilwanga mpe kwa awana bekitukanga se ateleki balembi vubwa.—od kapu kia 8 tini kia 8.

2. Miniti mosi. Konso lumingu, kuna mfoko a nkunga ye sambu kiantete, o mfidi a lukutakanu Zingu ye Salu Kieto kia Kikristu ozenzesa e te dia nkangu muna malongi bewá. Kafwete sia e sungididi muna mambu malenda twasa e nluta yo kasakesa o nkangu.

3. Longi: Miniti kumi. O ntu a diambu yo mambu mole yovo matatu mevovelwa muna longi diadi mena muna Nkand’a Malongi Zingu ye Salu Kieto kia Kikristu. E longi diadi divewa kwa nkuluntu yovo selo kia salu wazikuka. Avo nkanda wampa tuyantika muna ntangilu ya Bibila ya konso lumingu, vekala ye video ya nsunzul’a nkanda wowo. O mpovi olenda vovela una e video inina e ngwizani yo ntu a diambu wa longi. Kansi, kafwete kala ye ziku vo mana kevova ngwizani mena ye mambu mayikilu muna nkand’a malongi. Avo ntangwa ina, kafwete sasila e fwaniswa ye sono yankaka ya Bibila iyikilu muna longi. Olenda kwandi kudikila mambu mankaka mena e ngwizani ye longi.

 4. Tusalu twa Mwanda: Miniti kumi. E longi diadi dia yuvu ye mvutu. Ke dina mfunu ko vo mpovi kasadila mvovo miantete ngatu miansuka. Difilwa kwa nkuluntu yovo selo kia salu wazikuka. O mpovi kafwete yuvula e yuvu yawonso. Yandi mpe ozeye kana vo e sono iyikilu ifwete tangwa yovo ve. Awana besolwa mu vana e mvutu, e mvutu zau ke zifwete vioka segundu 30 ko.

 5. Ntangilu a Bibila: Miniti yá. E longi diadi difilwa kwa mwana ayakala. O nlongoki kafwete tanga e tini ina kaveno lembi vova diambu kuna lubantiku ngatu kuna mfoko. O mfidi a lukutakanu kafwete landa e ntangilu ye sungididi kiawonso kimana kazaya una kalenda sadisila alongoki mu tanga mu mpila yambote, yatoma kiá, toma vaikisa e mvovo, soba e zú dia ndinga, vunda vana fulu ina ye sinsu yo vova mu mpila ina bevovelanga. Wau vo muna tumingu twankaka tini yakete itangwa kansi muna tumingu twankaka tini yayingi, o Nkengi a Lukutakanu Zingu ye Salu Kieto kia Kikristu kafwete zayanga e tezo kia konso muntu vava kevananga e kiyekwa kwa alongoki.

6. Miniti kumi ye tanu. E kunku kiaki kiakubikwa muna vana e lau kwa awonso dia songa yo tomesa e ndekwa zau za sila umbangi yo longa. Avo dilendakana, akuluntu balenda tambula kiyekwa kia nlongoki. Konso nlongoki kafwete lungisa kiyekwa kiandi mun’owu wa mana melombwanga muna longi dina muna finkanda, Tanga yo Longa yovo Zolanga o Wantu edi dimoneka vana ndambu a kiyekwa kiandi muna Nkand’a Malongi Zingu ye Salu Kieto kia Kikristu. Ezak’e ntangwa, vekala ye longi dia mbokena yo nkangu. E longi diadi difwete filwa kwa nkuluntu yovo kwa selo kia salu wazikuka.—Muna zaya una ufidilwanga e longi dia mbokena yo nkangu, tala e  tini kia 15.

 7. Mpila ya Yantikila e Moko: E longi diadi dilenda filwa kwa nlongoki una vo yakala yovo nkento. Avo mwan’a yakala osolelo, o nsadisi kafwete kala mpe mwan’a yakala yovo yitu kiandi. Diau dimosi mpe avo mpangi ankento osolelo. O nlongoki yo nsadisi andi balenda kwau kala bavuanda yovo batelama.—Muna zaya mayingi mu kuma kia mpila ifidilwanga e kiyekwa kiaki, tala vana vasonama ntu a diambu ye mpila za sila umbangi vana  tini kia 12 ye  13.

 8. Nkingula: E longi diadi dilenda filwa kwa nlongoki una vo yakala yovo nkento. Avo mwan’ayakala osolelo, o nsadisi andi kafwete kala mpe mwan’ayakala. Diau dimosi mpe avo mpangi ankento osolelo. (km 5/97 luk. 3) O nlongoki yo nsadisi andi balenda kwau kala bavuanda yovo batelama. O nlongoki kafwete songa dina tuvova vava tuvutuka kingula muntu wasonga luzolo lwambote muna moko kiantete. Muna zaya mayingi mu kuma kia mpila ifidilwanga e kiyekwa kiaki, tala vana vasonama mbut’a diambu ye mpila za sila umbangi vana  tini kia 12 ye  13.

 9. Kitula Wantu se Alongoki: E longi diadi dilenda filwa kwa nlongoki una vo yakala yovo nkento. Avo mwan’ayakala osolelo, o nsadisi andi kafwete kala mpe mwan’ayakala. Diau dimosi mpe avo mpangi ankento osolelo. (km 5/97 luk. 3) O nlongoki yo nsadisi andi balenda kwau kala bavuanda yovo batelama. E kunku kiaki kifwete songa e mpila ya fidila e longi dia Bibila mu longi dina vo diyantikidi kala. Ke dina mfunu ko vo nlongoki kasadila mvovo mia nkotelo ngatu mvovo mia fokolwela, ovanga wo kaka avo otadilwa mu dimosi muna malongi mama.

 10. Sasila Mana Okwikilanga: Avo difilwa nze longi, yakala ofwete dio fila. Kansi, avo difilwa nze nsongesela, dilenda filwa kwa nlongoki una vo yakala yovo nkento. Avo mwan’ayakala osolelo, o nsadisi andi kafwete kala mpe mwan’ayakala yovo yitu kiandi. Diau dimosi mpe avo mpangi ankento osolelo. O nlongoki kafwete toma kiesesa o ntu a diambu yo vana e mvutu za kiuvu kansi kafwete wo vangila kuna ndekwa yo sadila e nto a malongi iyikilu muna kiyekwa kiaki. O nlongoki olenda yika yovo lembi yika e nto a malongi kasadidi ekolo kefilanga e longi.

 11. Longi: E longi diadi difwete vewa kwa nlongoki una vo yakala. Kafwete dio fidila nze longi dia nkangu. Avo e longi mu Nkudika A ya finkanda Zolanga o Wantu dibongelo, o nlongoki kafwete sasila una e sono ilenda sadilwa muna salu kia umbangi. Kasikil’owu, kafwete sasila kana nkia ntangwa kiafwana sadilwa e sono kana vo nsas’a andi kaka keyika ye una kalenda kio badikila kumosi yo muntu. Avo e longi mu finkanda Zolanga o Wantu dibongelo, o nlongoki kafwete sia e sungididi muna mpila mana kevova malenda sadilwa muna salu kia umbangi. Olenda sasila e diambu diyikilu vana diambu dia 1 dia longi yovo sasila konso sono kiyikilu muna longi avo omwene vo kilenda sadisa.

   12. Mbut’a diambu: O mambu mena mu tini kiaki ye muna tini kilende, malenda sadilwa muna longi “Mpila ya Yantikila e Moko” ye “Nkingula.” Avo ke vaveno luludiku lwankaka ko, o nlongoki kafwete sasila e ludi kia Bibila kwa muntu kemokena yandi ye kani dia ziula e nzila mu kwamanana e moko muna lumbu ilanda. O nlongoki kafwete sola e diambu dina e betela ye nsatu za zunga. Yandi ozaya kana nkia ntangwa kalenda kunkayila o nkanda yovo kunsonga e video ina muna Salanganu Yeto ya Longela. Vana fulu kia vutukila e nsunzula ina muna ntu, o nlongoki kafwete sadila e ndekwa za mokenena yo songa vo otokanenanga e wete dia muntu yo vova nze yau bemokenanga.

   13. Mpila za Sila Umbangi: O nlongoki kafwete lungisa e kiyekwa kiandi mun’owu wa nsatu za zunga. Kasikil’owu:

1.  (1) Mu Nzo ye Nzo: Muna sadila e ndekwa zazi divavanga vo twasila umbangi muna nzo ye nzo—kiakala vo mantalani, muna telefone yovo muna nkanda—yo vutuka kingula o muntu twamokena yandi muna salu kia nzo ye nzo.

2.  (2) Sila Umbangi Kuna Kinsalukisa: Muna sadila e ndekwa zazi divavanga vo twasadila konso lau mu sila umbangi kwa muntu tumokenanga yandi. Olenda mpe tangila muntu e sono kuna salu, kuna sikola, kuna belo muna taxi yovo konso fulu ekolo osalanga e salu yaku ya lumbu ke lumbu.

3.  (3) Sila Umbangi vana Fulu kia Ndonga: Muna sadila e ndekwa zazi divavanga vo twasila umbangi vana tandabala, vana zandu muna nzila yovo konso fulu olenda sololwela o wantu.

 14. Sadila Video ye Nkanda: Mun’owu wa nsatu o nlongoki olenda sadila video yovo nkanda. Avo vena ye video iyikilu muna kiyekwa kiaki yovo o nlongoki obakidi e nzengo za sadila video, kafwete yika kaka e video yo sasila mana mena mo kansi kafwete yo songa ko.

15. Kuna mfoko a nkunga, e miniti 15 milanda mikala ye longi dimosi yovo mole makubikwa mu sadisa o nkangu wazaya una bafwete sadila e Diambu dia Nzambi muna zingu kiau. Avo ke vaveno luludiku lwankaka ko, ozevo e longi diadi dilenda vewa kwa nkuluntu yovo selo kia salu wazikuka. Vo i longi dia mambu mavuilu o mfumu muna nkutakani, difwete vewa kaka kwa nkuluntu. Avo e longi dia mbokena yo nkangu, o mfidi olenda kwandi vanga yuvu yankaka vana ntandu a yuvu ina muna longi. Kafwete kufika e mvovo miandi miantete muna kala ye ntangwa yafwana muna toma kiesesa e mambu masina yo vana e lau kwa nkangu dia vana e mvutu. Avo mbokena zikala mo, vana fulu kia vuanda vana fulu kiandi, o mpangi olenda kwenda kuna ntwala, avo dilendakana.

  16. Longi dia Bibila dia Nkutakani: Miniti makumatatu. Difwete vewa kwa nkuluntu wazikuka. (E nkutakani ke zina ye akuluntu ayingi ko, balenda sadila selo ya salu yazikuka) E buka kia akuluntu kifwete baka e nzengo kana nani una wafwana mu fila e Longi dia Bibila dia Nkutakani. Awana besolwa mu fila e longi diadi bafwete kala bafwana kimana bafila dio muna ntangwa yasikidiswa, batoma sasila e sono yasina yo sadisa awonso mu bakula o mfunu wa sadila mambu masina mayikilu muna longi. Bafwete landa tuludiku twavaikiswa muna nkanda mieto tuna tusonganga e mpila ifwete fidilwa e longi dia yuvu ye mvutu. (w23.04 luk. 24, babu) Avo mambu makubikilu mu kuma kia lumingu lolo mamene fimpwa kala yo sasilwa, ke dina mfunu ko vo e longi diakwamanana. Avo dilendakana, nulenda sadila mpangi zaswaswana ana befila yo tanga e longi diadi. Avo o mfidi a lukutakanu Zingu ye Salu Kieto kia Kikristu ovovele vo e longi diadi difwete kufikwa, o mpangi ofila e longi ozaya una kekufikila dio. Olenda baka e nzengo za lembi tanga e tini yankaka.

17. Miniti tatu. O mfidi a Lukutakanu Zingu ye Salu Kieto kia Kikristu ovutukila o mambu mamfunu mavovelo muna lukutakanu. O mfidi osunzula mpe mu lukufi o mambu melongokwa muna lumingu lukwiza. Avo e ntangwa ina, olenda yika e nkumbu za wan’a sikola befila malongi muna lumingu lukwiza. Avo ke vaveno luludiku lwankaka ko, ozevo mfidi a lukutakanu yandi otanga tuzayisu ye konso nkanda mitwikilu mu nkutakani, ovanga wo mu kolo kiaki. Tuzayisu twankaka nze nkubika za salu kia umbangi ye za luveleleso lwa Seka dia Kintinu ke tufwete zayisilwa kuna tend’a nkongolo ko, kansi tufwete lamikwa kuna babu kia tuzayisu. Avo mfidi a lukutakanu omwene vo e ntangwa yayi ke yafwana ko mu vana tuzayisu kena twau yovo tanga e nkanda kena miau, kafwete lomba kwa mpangi befila malongi muna kunku Zingu kia Kikristu bakufika malongi mau. (Tala e  tini kia 16 ye  19.) O lukutakanu lufokokela muna nkunga ye sambu.

18. Kuna mfoko a konso longi dia mwan’a sikola, o mfidi a Lukutakanu Zingu ye Salu Kieto kia Kikristu osadila miniti mosi muna kunsanisina yo vana e longi. Vava o mfidi kezayisa e kiyekwa kina o mwan’a sikola kelungisa, kafwete zayisa ko e longi dina ketadilwa. Kansi, vava o mwan’a sikola kefokola e longi diandi, entete o mfidi okunsanisina, i bosi ovovela e longi dina katadilu yo yika e kuma kalungisidi e longi dina katadilu yovo sasila kuna ngemba zawonso e kuma kafwete sila diaka e sungididi muna longi diodio. O mfidi olenda mpe vovela mambu mankaka kamwene mana malenda sadisa mwan’a sikola yovo mpangi zankaka. Kuna mfoko a lukutakanu yovo mu ntangwa yankaka, o mfidi olenda vana luludiku lwankaka lwa finkanda Zolanga o Wantu, Tanga yo Longa, yovo muna nkanda Escola do Ministério kwa nlongoki vana fulu kia yau awole kaka.—Muna zaya diaka mayingi mu kuma kia kiyekwa kia mfidi a Lukutakanu Zingu ye Salu Kieto kia Kikristu ye kiyekwa kia nludiki, tala e  tini kia 19,  24, ye  25.

19. Ke vena muntu ko ofwete viokesa e ntangwa, kana nkutu mfidi a Lukutakanu Zingu ye Salu Kieto kia Kikristu vava kevovanga. Kana una vo o Nkand’a Malongi, Zingu ye Salu Kieto kia Kikristu usikidisanga e ntangwa ya konso kiyekwa, avo malongi mamene fimpwa yo sasilwa, ke dina diaka mfunu ko mu kudikila e mambu muna lungisa kaka e ntangwa. Avo malongi mankaka ma lukutakanu maviokele ntangwa, o nludiki ovana e longi kuna ndekwa zawonso ye va fulu kia yau kaka. (Tala e  tini kia 24 ye  25.) O lukutakanu lwawonso kumosi ye nkunga ye sambu lufwete zingila ola 1 ye miniti 45.

20. Avo e nkutakani mu nkingula ya nkengi a zunga ina, o lukutakanu lufidilwa landila mana masonama muna Nkand’a Malongi Zingu ye Salu Kieto kia Kikristu; edi kaka disoba: Vana fulu kia Longi dia Bibila dia Nkutakani muna kunku Zingu kia Kikristu, vevingiswa e longi dia salu dia nkengi a zunga dia miniti 30. Vitila kasunzula e longi dia salu dia nkengi a zunga, o mfidi a lukutakanu Zingu ye Salu Kieto kia Kikristu, ovutukila o mambu masina malongokelo, osunzula o mambu melongokwa muna lumingu lukwiza, ovana konso luzayisu luvuilu o mfunu yovo tanga konso nkanda; i bosi, osunzula e longi dia nkengi a zunga. Kuna mfoko a longi, o nkengi a zunga osunzula o nkunga una kasolele. Avo ozolele, o nkengi a zunga olenda bokela mpangi ankaka kafila e sambu kiansuka. Ke vafwete kala buka ko kia ndinga ya nkutakani kivangila lukutakanu muna seka diazole muna lumingu lwa nkengi a zunga. E buka kifwete vanga lukutakanu lwau muna lumingu lwa nkingul’a nkengi a zunga. Kansi, e buka kifwete lungana kumosi ye nkutakani muna longi dia salu dia nkengi a zunga.

21. Muna lumingu lwa lukutakanu lwa zunga yovo lwa mvivu, o tukutakanu twa nkutakani ke tuvangama ko. Ampangi bafwete sungameswa vo konso muntu kalongoka malongi ma lumingu lolo muna longi dia yandi kibeni yovo muna nsambila ya esi nzo.

22. Avo Luyindulu va kati kwa lumingu lukala, o Lukutakanu Zingu ye Salu Kieto kia Kikristu ke luvangama ko.

23. E buka kia akuluntu kisola mosi muna akuluntu kakala se nkengi a Lukutakanu Zingu ye Salu Kieto kia Kikristu. E kiyekwa kiandi i sikidisa vo lukutakanu lwalu lwavangamena mu mpila yambote landila tuludiku twa nkanda wau. Kafwete toma mokenanga yo nludiki. Avo Nkand’a Malongi wizidi, o nkengi a lukutakanu Zingu ye Salu Kieto kia Kikristu kafwete vana e iyekwa kwa awonso befila malongi muna ngonde zole i sia vo ampangi befila malongi, ampangi befila lukutakanu konso lumingu kumosi ye wana sikola. (Tala e  tini kia 3-16 ye  24.) Vava kesolanga alongoki befila malongi, kafwete sungamena e mvu mia nlongoki, umbakuzi wandi ye una kesasila e diambu divovelwa. Kafwete sadila umbakuzi wau umosi vava kevananga iyekwa yankaka ya lukutakanu kwa ampangi. O nlongoki kafwete vewa e kiyekwa kiandi tumingu tatu vitila e lumbu kevanga e longi diandi, kafwete kio vaninua muna finkanda Kiyekwa Muna Lukutakanu Zingu ye Salu Kieto kia Kikristu (S-89). O nkengi a Lukutakanu Zingu ye Salu Kieto kia Kikristu kafwete vava zaya kana vo e nkumbu za wantu awonso ana befila malongi zina kuna baya dia tuzayisu. E buka kia akuluntu balenda sola nkuluntu wankaka yovo selo kia salu muna kunsadisa. Kansi, akuluntu kaka bafwete sola ampangi ana befila malongi mankaka ma lukutakanu, i sia vo, mana ke mefilwa kwa wana sikola ko.

24. Konso lumingu, nkuluntu mosi okala se mfidi a lukutakanu Zingu ye Salu Kieto kia Kikristu. (Avo e nkutakani ke ina ye akuluntu ayingi ko, valenda solwa selo ya salu yazikuka kimana basala e salu kiaki.) Yandi okala ye mbebe ya kubika e mvovo miantete ye mvovo miansuka. Yandi mpe obokela e mpangi zawonso zifila malongi, avo ke vena akuluntu ayingi ko, oyandi olenda mpe fila malongi mankaka ma lukutakanu. E nkomena kevana kuna mfoko a konso longi zifwete kala zankufi. E buka kia akuluntu kifwete sola akuluntu bena vo bafwana mu lungisa e kiyekwa kiaki. Akuluntu ana bena vo bafwana, yau bekala fila lukutakanu, nkuluntu mosi muna konso lumingu. Landila e nsatu za konso nkutakani, o nkengi a Lukutakanu Zingu ye Salu Kieto kia Kikristu yandi okala toma sadilwa se mfidi a lukutakanu lutila akuluntu ankaka. Avo nkuluntu wasolwa mu kala se mfidi a Longi dia Bibila dia Nkutakani, disongele vo wafwana mpe mu kala se mfidi a Lukutakanu Zingu ye Salu Kieto kia Kikristu. Kansi, nuzaya dio vo o mfidi a lukutakanu kafwete sanisinanga wan’a sikola yo kubavana malongi mamfunu kuna zola kwawonso. O mfidi a lukutakanu kafwete mpe zayanga vo lukutakanu lufwete fokoka muna ola yasikidiswa. (Tala e  tini kia 17 ye  19.) Avo mfidi a lukutakanu ozolele wo yovo avo vena ye fulu kiafwana vana tend’a nkongolo, o mfidi a lukutakanu olenda sadila micro yankaka muna sunzula e longi ekolo mpangi ofila dio kekubamanga vana vovelo mu yantika e longi diandi. Muna lembi dia e ntangwa, o mfidi a lukutakanu mpe olenda vuanda va kunda kuna tend’a nkongolo ekolo nlongoki kevanganga e Ntangilu a Bibila ye muna kunku Sila Umbangi Una Ufwene.

25. Avo dilendakana, nuvana e kiyekwa kiaki kwa nkuluntu una vo mpovi ambote. E salu kiandi i vana longi kwa akuluntu ye selo ya salu kuna ndekwa vava befilanga konso longi, kiakala muna lukutakanu Zingu ye Salu Kieto kia Kikristu, longi dia nkangu awonso, vava befilanga e longi dia Eyingidilu yovo Longi dia Bibila dia Nkutakani ye vava betambulanga kiyekwa kia tanga. (Tala e  tini kia 19.) Avo muna nkutakani akuluntu ayingi bena mo ana bena vo mpovi zambote ye betoma longanga, konso mvu nulenda sola nkuluntu mosi kakala se nludiki. Ke dina mfunu ko vo nludiki kavananga longi kwa ampangi konso ntangwa befila malongi.

26. Landila o lutangu lwa wan’a sikola, e nkutakani ilenda ziula seka dianzole yovo diantatu mu kuma kia iyekwa ya wan’a sikola. Konso seka difwete kala yo nludiki una vo wafwana, kansi diambote kakala nkuluntu. Avo ke dilendakana ko, nulenda sola selo kia salu wazikuka kakala ye mbebe yayi. E buka kia akuluntu bafwete sola kana nani wafwana vewa kiyekwa kiaki, bafwete mpe baka nzengo kana vo nkwa kiyekwa kiaki sobwa kekala sobwa yovo ve. O nludiki kafwete landanga luludiku luna muna  tini kia 18. Avo vena ye maseka mankaka, o wan’a sikola befidila malongi muna maseka momo bafwete zayiswa vo bavaika kuna mfoko a longi Tusalu twa Mwanda, muna kunku Tusalu Tuna Muna Diambu dia Nzambi. Kuna mfoko a kunku Sila Umbangi Una Ufwene, wan’a sikola bevutuka vana seka diantete.

27. Omu lukutakanu lwalu video zikala mo songwa, zatoma solwa. E video za lukutakanu lwa kati kwa lumingu zisiwa muna aplicativo JW Library®, zilenda kulumunua mu aparelho za mpila mu mpila.

© 2023 Watch Tower Bible and Tract Society of Pennsylvania

S-38-KG 11/23