Ingeta. Muna Bibila muna ye mambu malenda kutukwikidisa vo Nzambi una kieleka. E Bibila kikutukasakesanga twayima lukwikilu muna Nzambi. Kansi, ke mpasi kwikila kaka ko muna mana mabundu melonganga, tufwete sadila o “zayi” yo kala yo “nyindu asikila,” i sia vo, toma fimpa. (1 Yoane 5:20; Roma 12:1) Tala dina Bibila kivovanga mu mambu malende:

•   E mpila o nsema watoma kubikilwa ye vangwa yamoyo ina ova nza, i ziku kisonganga vo vena yo Mvangi. E Bibila kivovanga vo: “Kieleka, konso nzo kwa muntu yatungwa, kansi ndiona watunga e lekwa yawonso i Nzambi.” (Ayibere 3:4) E ngindu zazi zatoma kiá, kana nkutu wantu batoma longwa bebakulanga vo ngindu zasikila. a

•   Yeto wantu twavangwa ye tima dia vava zaya e nsas’a zingu. Kana nkutu vava tulungisanga e nsatu zeto za nitu, e tima diadi dikwamanananga. Muna Bibila, e tima diadi diyikilwanga vo ‘mfunu a mambu ma Nzambi,’ kumosi yo luzolo lwa vava zaya yo sambila Nzambi. (Matai 5:3; Lusengomono 4:11) E tima dia zaya mambu ma Nzambi, ke disonganga kaka ko vo Nzambi una, kansi disonganga mpe vo Nzambi, Mvangi a zola ona ozolele vo twalungisanga e nsatu zeto za mambu ma mwanda.—Matai 4:4.

•   Ungunza wayingi wasonekwa muna Bibila vitila mvu miayingi, walungana muna mawonso. Ediadi disonganga vo ungunza wau watuka kwa muntu osundidi o wantu awonso​—2 Petelo 1:21.

•   Ana basoneka e Bibila bazaya mambu ma ngangu za nza (Ciência) mana wantu a tandu kiau ke bazaya ko. Muna bonga e nona, muna mvu miavioka wantu ayingi bakwikilanga vo ntoto va ntandu a bulu wakala, nze nzamba, ngulu a mfuta yovo ngombe. Kansi e Bibila kivovanga vo Nzambi “omanikanga o ntoto muna nkatu.” (Yobi 26:7) Bibila kivovanga mpe vo ntoto “wavindumuka.” (Yesaya 40:22) Wantu ayingi bekwikilanga vo e ngangu zina asoneki a Bibila bakala zau, kwa Nzambi zatuka.

•   Bibila kaka kivananga e mvutu za yuvu yayingi imonekanga vo yampasi. Vava wantu ke besololanga e mvutu za yuvu yayi ko, dikubafilanga mu vova vo Nzambi kena ko. Muna bonga e nona: Avo Nzambi, Nzambi a zola yo nkuma, ekuma keyambulwilanga e mbi ye mpasi ova nza? Ekuma ezak’e ntangwa mabundu mefidilanga o wantu mu vanga mambu mambi vana fulu kia kubafila mu vanga mambu mambote?—Tito 1:16.